Indo-Pak Tension: نئی دہلی نے اسلام آباد کی معاشی ریڑھ توڑنے کا بنایا پلان، پھر سے ’گرے‘ لسٹ میں جا سکتا ہے پاکستان

نئی دہلی: ہندوستان پاکستان کو ہر محاذ پر شکست دینا چاہتا ہے۔ اسٹریٹجک اور سفارتی گھیراؤ کے ساتھ ہی نئی دہلی اسلام آباد کو ایک ایک پائی کا محتاج بنانا چاہتا ہے۔ میڈیا رپورٹس کے مطابق ہندوستان بین الاقوامی مالیاتی فنڈ سمیت کثیر الجہتی ایجنسیوں سے پاکستان کو دیے گئے فنڈز اور قرضوں پر نظر ثانی کرنے کو کہے گا۔ اس کے علاوہ، عالمی اینٹی منی لانڈرنگ ایجنسی، فنانشل ایکشن ٹاسک فورس (FATF) سے اسلام آباد کو ‘گرے’ لسٹ میں ڈالنے کی اپیل کی جائے گی۔

ایک سرکاری ذریعے نے بتایا کہ ہندوستان، دیوالیہ ہونے سے بچنے میں مدد کے لیے حالیہ مہینوں میں آئی ایم ایف کی طرف سے پاکستان کو دی گئی سہولیات کے جائزہ کی مانگ کرے گا۔ وہ ورلڈ بینک اور ایشین ڈویلپمنٹ بینک جیسی دیگر ایجنسیوں سے بھی رابطے میں ہیں جو پروجیکٹس کو فنڈ فراہم کرتے ہیں۔

سب جانتے ہیں کہ پاکستان ایک گہرے معاشی بحران سے گزر رہا ہے۔ یہ مکمل طور پر غیر ملکی قرضوں پر منحصر ہے۔ اگر پاکستان کو دی جانے والی غیر ملکی اقتصادی امداد روک دی گئی یا اسے مشکل بنا دیا گیا تو اس کے لیے سب سے بڑا سوال اپنے وجود کو بچانے کا ہو گا۔

پاکستان نے گزشتہ سال آئی ایم ایف سے 7 بلین ڈالر کا بیل آؤٹ پروگرام حاصل کیا اور مارچ میں 1.3 بلین ڈالر کا نیا موسمیاتی قرضہ حاصل کیا۔ جنوری 2025 میں، عالمی بینک نے 20 بلین ڈالر کے قرض کے پیکج کی منظوری دی تاکہ نقدی کی کمی کا شکار پاکستان کو اس کے چیلنجوں پر قابو پانے میں مدد ملے۔

آئی ایم ایف کا ایگزیکٹو بورڈ توسیعی فنانسنگ کے پہلے جائزے کے لیے 9 مئی کو پاکستانی حکام سے ملاقات کرے گا۔

ماہرین کا کہنا ہے کہ 22 اپریل کو پہلگام میں ہونے والے حملے کے مد نظر آئی ایم ایف کو پاکستان کے ساتھ اپنے تعلقات کا از سر نو جائزہ لینا چاہیے۔ دہشت گردی کے لیے پاکستان کی حمایت کو دیکھتے ہوئے، سخت شرائط کے بغیر مالی امداد جاری رکھنے سے معاشی استحکام اور اصلاحات کے بنیادی مقاصد کو نقصان پہنچنے کا خطرہ ہو گا۔ آئی ایم ایف کو اس بات کو یقینی بنانے کی ضرورت ہے کہ مالی امداد نادانستہ طور پر ایسی سرگرمیوں کو فروغ نہ دے جس سے علاقائی اور عالمی سلامتی کو خطرہ ہو۔

ہندوستان ایکسپریس۔