Mukesh Ambani keynote address: مکیش امبانی نے WAVES 2025 میں بھارت کی قیادت میں عالمی تفریحی انقلاب کے ویژن کا اعلان کیا

“بھارت صرف ایک ملک نہیں بلکہ کہانیوں کی ایک تہذیب ہے، جہاں کہانی سنانا زندگی کا ایک انداز ہے۔” ریلائنس انڈسٹریز کے چیئرمین اور منیجنگ ڈائریکٹر مکیش امبانی نے آج ممبئی میں شروع ہونے والے عالمی میڈیا اور تفریحی سربراہی اجلاس WAVES 2025 سے کلیدی خطاب کرتے ہوئے یہ بات کہی۔

امریکی مصنف مارک ٹوین کے الفاظ نقل کرتے ہوئے امبانی نے بھارت کو “انسانی نسل کا گہوارہ، انسانی زبان کی جائے پیدائش، تاریخ کی ماں، قرار دیا۔ انہوں نے زور دیا کہ کہانی سنانا بھارتی زندگی کا ایک لازمی جزو ہے۔ انہوں نے کہا، “ہماری لازوال مہاکاویات سے لے کر دیومالائی کہانیوں تک، کہانیاں ہماری وراثت ہیں۔ مواد بادشاہ ہے—اور اچھی کہانیاں ہمیشہ بکتی ہیں۔ یہی لازوال اصول عالمی تفریح کی بنیاد ہے۔”

انہوں نے دنیا کی ثقافت اور تخلیقی صلاحیتوں پر بھارت کے بڑھتے ہوئے اثر کو اجاگر کیا اور وزیر اعظم نریندر مودی کے جرات مندانہ وژن کو اس تبدیلی کی تحریک قرار دیا اور WAVE سمٹ کو اس سمت میں ایک تاریخی قدم قرار دیا۔ امبانی نے کہا، “لوگ کہتے ہیں میڈیا اور تفریح بھارت کی سافٹ پاور ہے—میں کہتا ہوں یہ بھارت کی اصل طاقت ہے۔”

انہوں نے تخلیقی منظرنامے کو تبدیل کرنے والے دو بڑے عوامل کی نشاندہی کی: جیو- اکنامکس اور ٹیکنالوجی۔ انہوں نے کہا آرٹیفیشیل اینٹلیجنس تخیل اور عمل درآمد کے درمیان سرحدیں مٹا رہا ہے۔ جو تبدیلی آج AI تفریح میں لا رہا ہے وہ اُس تبدیلی سے لاکھوں گنا زیادہ ہے جو ایک صدی پہلے خاموش کیمرے سے سنیما میں آئی تھی۔

بھارت کی منفرد صلاحیتوں کو اجاگر کرتے ہوئے امبانی نے کہا کہ بھارت تین ستونوں کے ذریعے تفریحی انقلاب کی قیادت کے لیے تیار ہے: دلچسپ مواد، متحرک آبادی، اور تکنیکی برتری۔

انہوں نے کہا، “بھارت کا ڈیجیٹل انقلاب صرف پیمانے کی کہانی نہیں، بلکہ یہ امنگ، خواہش اور تبدیلی کی کہانی ہے۔”

اس عالمی تقریب میں 90 ممالک کے نمائندے اور 10,000 سے زائد مندوبین شریک ہوئے۔ اس موقع پر وزیر اعظم نریندر مودی، مرکزی وزیر اشونی ویشنو اور مہاراشٹرا کے وزیر اعلیٰ دیویندر فڈنویس بھی موجود تھے۔

وزیر اعظم مودی کی موجودگی — اتحاد اور عزم کی علامت

مکیش امبانی نے خاص طور پر وزیر اعظم نریندر مودی کی موجودگی کو اہم قرار دیا، خاص طور پر حال ہی میں پہلگام میں ہونے والے دہشت گرد حملے کے بعد۔ انہوں نے شہداء کے اہل خانہ سے ہمدردی کا اظہار کرتے ہوئے کہا: “145 کروڑ بھارتی مودی جی کے ساتھ کھڑے ہیں۔ بھارت کی جیت طے ہے۔”

بھارت کی تفریحی طاقت — سافٹ نہیں، اصل طاقت

امبانی نے کہا کہ بھارت کی ثقافتی اور تفریحی صنعت صرف “سافٹ پاور” نہیں بلکہ “ریئل پاور” ہے۔

انہوں نے کہا کہ بھارت کی ہزاروں سال پرانی روایات میں رامائن، مہابھارت اور لوک کہانیوں جیسے لامحدود قصے شامل ہیں، جو آج بھی دنیا بھر کے دلوں کو چھو رہے ہیں۔

انہوں نے کہا کہ ان کہانیوں میں محبت، ہمدردی، بہادری اور قدرت سے ربط جیسے عالمگیر انسانی اقدار پوشیدہ ہیں۔

ڈیجیٹل ٹیکنالوجی سے کہانیوں کو نئی پرواز

انہوں نے بتایا کہ بھارت کی نوجوان نسل جدید ڈیجیٹل ٹیکنالوجیز اور AI جیسے اوزاروں کے ذریعے ان کہانیوں کو مزید مؤثر بنا سکتی ہے۔

ان کا یقین تھا کہ بھارت کے تخلیقی ماہرین عالمی تفریحی صنعت میں اہم مقام حاصل کریں گے۔

میڈیا انڈسٹری کی قدر $100 بلین تک پہنچنے کی امید

مکیش امبانی نے کہا کہ اس وقت بھارت کی میڈیا اور تفریحی صنعت کی قدر 28 ارب ڈالر ہے، جو آئندہ دس سالوں میں 100 ارب ڈالر تک پہنچ سکتی ہے۔

اس سے نہ صرف روزگار کے نئے مواقع پیدا ہوں گے بلکہ معیشت کو بھی مضبوطی ملے گی۔

 WAVES ایک بھارتی روح، ایک عالمی آواز

اپنے خطاب کے اختتام پر امبانی نے WAVES کو دنیا کا سب سے بڑا تخلیقی پلیٹ فارم بنانے کے عزم کا اعادہ کیا۔

انہوں نے کہا کہ یہ پلیٹ فارم ہر سال ترقی کرے گا اور عالمی سطح پر بھارت کی تخلیقی طاقت کو اجاگر کرے گا۔

انہوں نے اپنے خطاب کا اختتام ان الفاظ سے کیا: “کہانیوں کو بہنے دو۔ لہروں کو اُٹھنے دو۔“

بھارت ایکسپریس اردو۔