Mehbooba Mufti attacks BJP: اجیت پوار کے مہاراشٹر حکومت میں شامل ہونے پر محبوبہ مفتی کا بی جے پی پر حملہ، کہا: بی جے پی ایم ایل اے کو خریدنے کی کوشش میں مصروف

سری نگر: پیپلز ڈیموکریٹک پارٹی (پی ڈی پی) کی صدر محبوبہ مفتی نے اتوار کے روز مہاراشٹر کی کابینہ میں این سی پی لیڈر اجیت پوار کی شمولیت کے بعد بھارتیہ جنتا پارٹی (بی جے پی) پر حملہ کرتے ہوئے الزام لگایا کہ حکمراں جماعت ایم ایل اے کو خریدنے کی کوشش میں مشغول ہے۔ محبوبہ نے ٹویٹ کر کے کہا، ”بی جے پی نے جس طرح مہاراشٹر میں عوامی مینڈیٹ کو بار بار مجروح کیا ہے اس کی مذمت کے لیے الفاظ نہیں ہیں۔ جمہوریت کا نہ صرف قتل کیا جا رہا ہے بلکہ وہ اس طرح کی گھناؤنی حرکتوں کو چھپانے کے لیے قومی ترانے کا استعمال کر رہے ہیں۔

بتا دیں کہ نیشنلسٹ کانگریس پارٹی (این سی پی) لیڈر اجیت پوار اتوار کے روز ایکناتھ شندے کی قیادت والی مہاراشٹر سرکار میں پارٹی کے آٹھ دیگر افراد کے ساتھ شامل ہو گئے۔ ممبئی کے راج بھون میں منعقدہ ایک تقریب میں گورنر رمیش بیس نے پوار کو نائب وزیر اعلیٰ کے عہدے کا حلف دلایا، جب کہ این سی پی کے دیگر آٹھ لیڈران نے وزیر کے طور پر حلف لیا۔

وہیں نائب وزیر اعلیٰ کے طور پر حلف لینے کے بعد اجیت پوار نے کہا، “پی ایم مودی کی قیادت میں ملک ترقی کر رہا ہے۔ وہ دوسرے ممالک میں بھی مقبول ہے۔ ہر کوئی ان کی حمایت کرتا ہے اور ان کی قیادت کو سراہتا ہے۔ ہم آئندہ لوک سبھا اور اسمبلی انتخابات ان (بی جے پی) کے ساتھ لڑیں گے اور اسی لیے ہم نے یہ فیصلہ لیا۔

یہ بھی پڑھیں: شرد پوار اپنی پارٹی میں تقسیم سے نہیں ہیں پریشان، وہ نئے سرے سے کر سکتے ہیں شروعات: سنجے راوت

اجیت پوار نے مزید کہا کہ، “ہمارے پاس تمام نمبر ہیں، تمام ایم ایل اے میرے ساتھ ہیں۔ ہم یہاں ایک پارٹی کے طور پر جمع ہوئے ہیں۔ ہم نے تمام سینئرز کو بھی مطلع کر دیا ہے۔ جمہوریت میں اکثریت کو اہمیت دی جاتی ہے۔ ہماری پارٹی 24 سال پرانی ہے اور نوجوان قیادت کو آگے آنا چاہئے۔”

 یہ بھی پڑھیں: مہاراشٹر کی سیاست میں ہلچل تیز، این سی پی اندرونی خلفشار کا شکار، اجیت پوار مہارشٹر کے نائب وزیر اعلی بنے

 

 

بھارت ایکسپریس۔