Massive fire breaks out in Noida: نوئیڈا  کےسیکٹر 119 سوسائٹی کی 22ویں منزل میں اے سی دھماکے سے لگی خوفناک آگ

دہلی-این سی آرمیں آگ لگنے کے واقعات کے درمیان اتر پردیش کے نوئیڈا میں پیر کی صبح ایک ہائی رائز سوسائٹی میں زبردست آگ لگنے سے ہلچل مچ گئی۔ یہ واقعہ نوئیڈا کے سیکٹر 119 میں واقع ارنیا سوسائٹی میں پیش آیا، جہاں ایک ٹاور کی 22ویں منزل پر موجود فلیٹ میں اچانک آگ بھڑک اٹھی۔ آگ کی شدت اتنی زیادہ تھی کہ فلیٹ سے بلند شعلے اٹھنے لگے اور پورے علاقے میں سیاہ دھوئیں کا گہرا غبار چھا گیا۔ابتدائی معلومات کے مطابق آگ ایک اے سی میں دھماکے کے بعد لگی۔ بتایا جا رہا ہے کہ 22ویں منزل پر واقع ایک فلیٹ کی بالکونی میں نصب اے سی اچانک پھٹ گیا، جس کے بعد دیکھتے ہی دیکھتے آگ نے خطرناک شکل اختیار کرلی۔ فلیٹ سے نکلنے والی لپٹوں نے قریب موجود ایک دوسرے فلیٹ کو بھی اپنی زد میں لے لیا۔

آگ لگنے کے بعد سوسائٹی میں رہنے والے لوگوں میں خوف و ہراس پھیل گیا۔ کئی افراد نے فوری طور پر اپنے فلیٹس خالی کرنا شروع کر دیے، جبکہ کچھ لوگوں نے آس پاس کے رہائشیوں کو بھی محفوظ مقامات پر جانے کی اپیل کی۔ مقامی افراد نے فوری طور پر فائر بریگیڈ کو اطلاع دی اور اپنی سطح پر بھی آگ پر قابو پانے کی کوششیں کیں۔اطلاع ملتے ہی فائر بریگیڈ کی چھ گاڑیاں موقع پر پہنچ گئیں۔ فائر اہلکاروں نے بلند منزل پر لگی آگ کو بجھانے کے لیے سخت محنت کی، کیونکہ 22ویں منزل پر آگ ہونے کی وجہ سے کارروائی میں دشواری پیش آ رہی تھی۔ کئی گھنٹوں کی کوشش کے بعد فائر ٹیموں نے آگ کی خطرناک لپٹوں پر قابو پالیا۔

نوئیڈا کے چیف فائر آفیسر بھی موقع پر پہنچے اور صورتحال کا جائزہ لیا۔ ان کے ساتھ پولیس کی ٹیم بھی جائے حادثہ پر موجود رہی۔ فائر ڈپارٹمنٹ کے مطابق واقعے میں ابھی تک کسی جانی نقصان کی اطلاع نہیں ہے۔ حکام کے مطابق تمام افراد کو محفوظ نکال لیا گیا ہے، تاہم آگ سے فلیٹ کو بھاری نقصان پہنچنے کا خدشہ ہے۔حادثے کے بعد انتظامیہ بھی حرکت میں آگئی۔ اتر پردیش کے وزیر اعلیٰ یوگی آدتیہ ناتھ نے نوئیڈا سیکٹر 119 کی ہائی رائز بلڈنگ میں لگی آگ کا نوٹس لیتے ہوئے افسران کو فوری طور پر موقع پر پہنچنے کی ہدایت دی۔ وزیر اعلیٰ نے حکام کو ہدایت کی کہ راحت اور بچاؤ کے کاموں میں تیزی لائی جائے، ہر سطح پر احتیاط برتی جائے اور اگر کوئی شخص زخمی ہو تو اس کے علاج کا فوری انتظام کیا جائے۔واقعے کے بعد سوسائٹی میں حفاظتی انتظامات اور اے سی کی جانچ کو لے کر بھی سوالات اٹھنے لگے ہیں۔ فائر ڈپارٹمنٹ کی جانب سے معاملے کی مزید جانچ کی جا رہی ہے تاکہ آگ لگنے کی اصل وجہ کا مکمل طور پر پتہ لگایا جا سکے۔

بھارت ایکسپریس اردو