West Bengal: قریبی لیڈرکی مبینہ خودکشی پر ممتا بنرجی بولیں۔ آخری دنوں میں انہیں کتنا ذہنی دباؤ جھیلنا پڑا

نئی دہلی :مغربی بنگال اسمبلی کے سابق ڈپٹی اسپیکر اور وزیر اعلیٰ ممتا بنرجی کے قریبی ساتھی آشیش بنرجی کی موت کے بعد سیاسی حلقوں میں ہلچل مچ گئی ہے۔ 74 سالہ ترنمول کانگریس (ٹی ایم سی) لیڈرکی لاش بیربھوم ضلع میں واقع پارٹی دفتر میں پھندے سے لٹکی ہوئی ملی۔ ابتدائی طور پر ان کی موت کو مبینہ خودکشی قرار دیا جا رہا ہے۔ واقعے کے بعد پولیس نے معاملے کی تفتیش شروع کر دی ہے۔ اس دوران ممتا بنرجی نے آشیش بنرجی کی موت پر گہرے دکھ کا اظہار کرتے ہوئے اشاروں میں بھارتیہ جنتا پارٹی (بی جے پی) کو بھی نشانہ بنایا ہے۔ممتا بنرجی نے سوشل میڈیا پلیٹ فارم ایکس پر ایک پوسٹ میں کہا کہ آشییش بنرجی کے انتقال سے انہیں گہرا صدمہ پہنچا ہے۔ انہوں نے کہا کہ آشیش بنرجی نے اپنی زندگی کا بیشتر حصہ پوری لگن کے ساتھ تدریس اور سماجی خدمت میں گزارا۔ وہ اپنے نرم مزاج اور رام پورہاٹ و بیربھوم کے لوگوں کے ساتھ قریبی تعلقات کے لیے ہمیشہ جانے جاتے تھے۔

ممتا بنرجی نے کہا کہ آشیش بنرجی پانچ مرتبہ رکن اسمبلی منتخب ہوئے اور اسمبلی کے سابق ڈپٹی اسپیکر اور چیئرمین بھی رہے۔ انہوں نے رام پورہاٹ کی ترقی کے لیے خود کو وقف کر دیا تھا اور علاقے کے لوگوں کے لیے کئی اہم کام انجام دیے تھے۔ تاہم، ممتا بنرجی کا کہنا ہے کہ اتنی طویل عوامی خدمت کے باوجود انہیں بار بار بدنام کیا گیا، ان پر جھوٹے الزامات عائد کیے گئے اور مسلسل دباؤ میں رکھا گیا۔ٹی ایم سی سربراہ نے کہا کہ اس افسوسناک واقعے کو مزید تکلیف دہ بنانے والی بات یہ ہے کہ اپنے آخری دنوں میں آشیش بنرجی کو کتنا شدید ذہنی اور جذباتی دباؤ برداشت کرنا پڑا ہوگا۔ انہوں نے کہا کہ عوامی خدمت کا طویل ریکارڈ رکھنے والے شخص کو جس طرح کی مبینہ اذیت اور ذہنی دباؤ کا سامنا کرنا پڑا، وہ ہم سب کو یہ سوچنے پر مجبور کرتا ہے کہ مسلسل سیاسی دشمنی کی انسانی قیمت آخر کیا ہوتی ہے۔

ممتا بنرجی نے آشیش بنرجی کے اہل خانہ، چاہنے والوں، سابق طلبہ اور ان کے بے شمار مداحوں سے تعزیت کرتے ہوئے کہا کہ ان کی کمی ہمیشہ محسوس کی جائے گی۔دوسری جانب آشییش بنرجی کی موت پر بی جے پی لیڈر شبھیندو ادھیکاری نے بھی تحقیقات کا مطالبہ کیا ہے۔ انہوں نے کہا کہ اس بات کی جانچ کی جائے گی کہ آیا آشیش بنرجی کو کسی نے دھمکی دی تھی۔ انہوں نے شبہ ظاہر کیا کہ ٹی ایم سی کے اندر موجود مبینہ بدعنوان عناصر نے انہیں دھمکیاں دی ہوں گی۔ شبھیندو ادھیکاری کے مطابق، آشیش بنرجی کے لیٹر ہیڈ پر ملنے والے مبینہ خودکشی نوٹ کی بھی جانچ کی جائے گی اور تحریر کی تصدیق کے لیے ہینڈ رائٹنگ ٹیسٹ کرایا جائے گا۔ مبینہ نوٹ میں بنرجی نے اپنی موت کے لیے کسی کو ذمہ دار نہیں ٹھہرایا اور سیاست میں آنے پر افسوس کا اظہار کیا ہے۔ ان کے پسماندگان میں اہلیہ اور ایک بیٹا شامل ہیں۔

بھارت ایکسپریس اردو