Maharashtra cabinet expansion: مہاراشٹر کابینہ میں توسیع، چھگن بھجبل نے وزیر کے عہدے کا لیا حلف، وزیراعظم، وزیر داخلہ اور فڑنویس کیلئے اظہار تشکر

مہاراشٹر میں منگل کو ’مہایوتی‘ حکومت کی کابینہ میں توسیع ہوئی۔ کابینہ توسیع کو لے کر راج بھون میں منعقد ایک تقریب کے دوران این سی پی اجیت گروپ کے قد آور رہنما چھگن بھجبل نے وزیر کے عہدہ کا حلف لیا۔ تقریب میں مہاراشٹر کے وزیر اعلیٰ دیویندر فڑنویس، نائب وزیر اعلیٰ ایکناتھ شندے اور اجیت پوار بھی موجود رہے۔

چھگن بھجبل کو این سی پی گروپ کے کوٹے سے دھننجے منڈے کی جگہ وزیر بنایا گیا ہے۔ منڈے نے مارچ 2025 میں صحت وجوہات کا حوالہ دیتے ہوئے خوراک اور سول سپلائز کی وزارت سے استعفیٰ دے دیا تھا۔

وزیر کے عہدے کا حلف لینے کے بعد چھگن بھجبل نے ذرائع ابلاغ کے نمائندوں سے بات چیت کرتے ہوئے کہا، ’’میں 1991 سے وزیر بنتا آ رہا ہوں۔ وزارت داخلہ سمیت کئی محکموں کی ذمہ داری سنبھالی ہے۔ مجھے کسی خاص محکمہ کی لالچ نہیں ہے، جو ملے گا، وہ ذمہ داری سے ادا کروں گا۔‘‘ انہوں نے کہا ’آل اِز ویل‘ اور سبھی سینئر رہنماؤں کا اظہار تشکر کیا، جن میں وزیر اعظم نریندر مودی، وزیر داخلہ امت شاہ، دیویندر فڑنویس، اجیت پوار، ایکناتھ شندے، سنیل تٹکرے اور پرفل پٹیل کے نام شامل ہیں۔

چھگن بھجبل کی کابینہ میں شمولیت پر نائب وزیر اعلیٰ ایکناتھ شندے نے خوشی کا اظہار کرتے ہوئے کہا کہ بھجبل جی تجربہ کار رہنما ہیں۔ وہ پہلے بھی کئی اہم محکموں کی ذمہ داری ادا کر چکے ہیں۔ ان کے تجربہ سے ریاستی حکومت کو مضبوطی ملے گی۔

واضح رہے کہ دسمبر 2004 میں ہوئی کابینہ کی توسیع میں جگہ نہیں ملنے پر چھگن بھجبل نے عوامی طور پر ناراضگی کا اظہار کیا تھا۔ اس کے بعد سے ہی انہیں کابینہ میں شامل کرنے کی قیاس آرائیاں لگائی جا رہی تھیں۔ دھننجے منڈے کے استعفیٰ کے بعد ان کے لیے راستہ صاف ہو گیا۔

بھارت ایکسپریس اردو۔