Five Maoists including a woman were arrested in Ballia: یوپی میں اے ٹی ایس کی ٹیم کو ملی بڑی کامیابی، بلیا میں ایک خاتون سمیت پانچ ماؤنوازوں کو کیا گرفتار

بلیا: اترپردیش پولیس کے انسداد دہشت گردی دستہ (اے ٹی ایس) نے بلیا ضلع کے سہتوار تھانہ علاقے سے ایک خاتون نکسل سمیت پانچ نکسلیوں کو گرفتار کیا ہے۔ اتر پردیش پولیس کے انسداد دہشت گردی اسکواڈ (اے ٹی ایس) وارانسی برانچ نے ایک بیان جاری کرتے ہوئے کہا کہ 15 اگست کو ضلع کے سہتوار تھانہ علاقے کے تحت آنے والے بسنت پور گاؤں کے قریب سے خاتون نکسلائٹس تارا دیوی عرف منجو عرف منیشا، للو رام عرف ارون، ستیہ پرکاش ورما، رام مورت اور ونود ساہنی کو گرفتار کیا گیا ہے۔

ایس پی نے کی گرفتاری کی تصدیق

بلیا کے پولیس سپرنٹنڈنٹ ایس آنند نے جمعرات کے روز ماؤنوازوں کی گرفتاری کی تصدیق کی۔ بیان میں کہا گیا کہ اطلاع ملی تھی کہ نکسلائیٹ بہار اور جھارکھنڈ کے سرحدی اضلاع میں نکسلی سرگرمیوں کو بڑھانے کے لیے نئے ممبروں کی بھرتی اور نکسلی نظریات کا پرچار کرنے کے لیے ایک خفیہ میٹنگ کر رہے تھے، تب انھیں گرفتار کر لیا گیا۔

بلیا ضلع کے ہیں تمام نکسلائیٹ

تمام نکسلائیٹ بلیا ضلع کے مختلف تھانہ علاقوں کے رہنے والے ہیں۔ اے ٹی ایس نے ان کے پاس سے بڑی مقدار میں نکسلی لٹریچر، پمفلٹ، ہاتھ سے لکھے ہوئے پیغامات، الیکٹرانک آلات اور ہتھیار برآمد کیے ہیں۔ بلیا ضلع سے پانچ ماؤنوازوں کی گرفتاری کے بعد بلیا پولس چوکس ہوگئی ہے۔ پولیس سپرنٹنڈنٹ ایس آنند نے کہا کہ پولس ضلع میں نکسلی سرگرمیوں کو لے کر چوکنا ہے اور تحقیقاتی ایجنسی سے ملی اطلاع کی بنیاد پر کارروائی کر رہی ہے۔

ملزم کو ریمانڈ پر لینے کی تیاری

اے ٹی ایس کا کہنا ہے کہ ان کے ذریعہ مسلح بغاوت برپا کرنے کی کوشش کی جارہی تھی۔ اے ٹی ایس تنظیم کے کچھ دیگر ارکان کی بھی تلاش میں ہے۔ ملزمان سے سات موبائل فون، لیپ ٹاپ، کالعدم تنظیم سے متعلق لٹریچر، دستاویزات، پمفلٹس، ایک نائن ایم ایم پستول، دو کارتوس اور دس ہزار روپے برآمد ہوئے ہیں، جن کی بنیاد پر مزید تفتیش کی جا رہی ہے۔ ملزمان کو پولیس ریمانڈ پر لینے کی تیاریاں جاری ہیں۔

سونپی گئی تھیں مختلف ذمہ داریاں

اے ٹی ایس کی تفتیش میں انکشاف ہوا ہے کہ گرفتار ملزمان کو مختلف ذمہ داریاں سونپی گئی تھیں۔ ستیہ پرکاش پڑھا لکھا ہے۔ اسے کسانوں کے لیے ایک تنظیم بنانے، اس کی آڑ میں میٹنگیں کرنے اور لوگوں میں پمفلٹ کے ذریعے نکسلائی نظریات کو فروغ دینے کا کام سونپا گیا تھا۔ وہ ایک پرتشدد تحریک شروع کرنے کے لیے کام کر رہا تھا۔

بھارت ایکسپریس۔