Lionel Messi visits wildlife Vantara: مایہ ناز فٹبالر لیونل میسی نے کی ونتارا کی سیر، جنگلی حیات کے تحفظ اور نگہداشت کیلئے وزیراعظم مودی کی وابستگی کی ستائش

عالمی شہرت یافتہ فٹبال اسٹار لیونل میسی نے گجرات کے جام نگر میں واقع ونتارا کا خصوصی دورہ کیا۔ یہ وائلڈ لائف ریسکیو، ری ہیبلیٹیشن اور کنزرویشن سینٹر اننت امبانی کی جانب سے قائم کیا گیا ہے۔ ونتارا میں سرگرمیوں کا آغاز عموماً سناتن دھرم کی روایات کے مطابق برکت طلب کرنے سے کیا جاتا ہے، جو فطرت کے احترام اور تمام جانداروں کے تقدس پر زور دیتا ہے۔ میسی کا یہ دورہ اسی ثقافتی روایت کی عکاسی کرتا نظر آیا۔

روایتی استقبال اور مذہبی رسومات

میسی، اپنے انٹر میامی کلب کے ساتھی کھلاڑیوں لوئس سواریز اور روڈریگو ڈی پال کے ہمراہ ونتارا پہنچے، جہاں ان کا شاندار روایتی استقبال کیا گیا۔ رنگا رنگ لوک موسیقی، پھولوں کی بارش اور رسمی آرتی کے ساتھ ان کا خیرمقدم ہوا۔ اس موقع پر میسی نے مندر میں مہاآرتی میں شرکت کی، جس میں امبے ماتا پوجا، گنیش پوجا، ہنومان پوجا اور شیوابھیشیک شامل تھے۔ انہوں نے عالمی امن اور اتحاد کے لیے دعائیں کیں، جو بھارت کی قدیم اقدار کی عکاس ہیں۔

وانتارا کے کنزرویشن نظام کا مشاہدہ

استقبال کے بعد میسی نے ونتارا کے وسیع کنزرویشن ایکو سسٹم کا دورہ کیا، جہاں دنیا بھر سے لائے گئے بچائے گئے شیر، چیتے، ٹائیگر، ہاتھی، چرند پرند، رینگنے والے جانور اور کم عمر جانوروں کی دیکھ بھال کی جاتی ہے۔ انہوں نے گرین انرجی کمپلیکس اور دنیا کے سب سے بڑے ریفائنری کمپلیکس کا بھی مشاہدہ کیا اور ان کے حجم و وژن پر حیرت کا اظہار کیا۔

جنگلی جانوروں سے قربت اور جدید طبی سہولیات

میسی نے شیروں، تیندؤوں اور دیگر خطرے سے دوچار انواع کے کیئر سینٹرز کا دورہ کیا، جہاں جانور قدرتی ماحول سے قریب تر سہولیات میں پرورش پا رہے ہیں۔ انہوں نے ہربی وور کیئر سینٹر اور ریپٹائل کیئر سینٹر بھی دیکھے، جہاں خصوصی ویٹرنری نگہداشت، متوازن غذائیت، تربیت اور جدید دیکھ بھال کے طریقے اپنائے جا رہے ہیں۔ علاوہ ازیں میسی نے ملٹی اسپیشلٹی وائلڈ لائف ہاسپٹل میں حقیقی وقت کے طبی اور جراحی اقدامات کا مشاہدہ کیا اور بعد ازاں اوکاپی، گینڈے، ژراف اور ہاتھیوں کو اپنے ہاتھ سے خوراک بھی کھلائی۔

بھارتی قیادت کی ستائش

عالمی تناظر میں میسی نے بھارت میں جنگلی حیات کے تحفظ اور نگہداشت کو فروغ دینے کے لیے بھارتی وزیر اعظم کے عزم اور وابستگی کی بھی تعریف کی۔

فوسٹر کیئر سینٹر اور ’لیونل‘ نامی شیر کا بچہ

فوسٹر کیئر سینٹر میں میسی نے یتیم اور کمزور جانوروں کی بحالی کے سفر کے بارے میں جانا۔ ایک جذباتی لمحے میں اننت امبانی اور رادھیکا امبانی نے ایک شیر کے بچے کا نام ’’لیونل‘‘ رکھا جو امید اور تسلسل کی علامت کے طور پر فٹبال لیجنڈ کے نام سے منسوب کیا گیا۔

ہاتھی کیئر سینٹر میں یادگار لمحہ

دورے کا سب سے یادگار لمحہ ہاتھی کیئر سینٹر میں دیکھنے کو ملا، جہاں میسی نے مانِک لال نامی ہاتھی کے بچے سے ملاقات کی۔ یہاں میسی نے مانک لال کے ساتھ ایک فوری فٹبال سرگرمی میں حصہ لیا۔ کھیل کی عالمی زبان نے سب کے دل جیت لیے اور ہاتھی کے بچے نے بھی پُرجوش انداز میں ردعمل دیا۔

لیونل میسی کا اظہار خیال

اننت امبانی کی جانب سے شکریہ ادا کیے جانے پر میسی نے ہسپانوی زبان میں کہا: ’’ونتارا جو کام کر رہا ہے وہ واقعی خوبصورت ہے۔ جانوروں کے لیے کی جانے والی کوششیں ان کی دیکھ بھال اور بحالی کا طریقہ بے حد متاثر کن ہے۔ ہم نے یہاں بہت اچھا وقت گزارا، خود کو بالکل مطمئن محسوس کیا اور یہ تجربہ ہمیشہ یاد رہے گا۔ ہم دوبارہ ضرور آئیں گے تاکہ اس بامعنی کام کی حمایت اور حوصلہ افزائی جاری رکھ سکیں۔‘‘

روایتی اختتام اور مشترکہ اقدار

دورے کے اختتام پر میسی نے روایتی رسومات میں شرکت کی، جو نیک شگون اور خوش آئند آغاز کی علامت ہیں۔ امن اور فلاح و بہبود کی دعاؤں کے ساتھ تقریب کا اختتام ہوا۔ تعلیم، صحت اور بچوں کی فلاح کے لیے کام کرنے والی لیو میسی فاؤنڈیشن کے بانی کی حیثیت سے میسی نے ونتارا کے مقصد اور جانوروں کی فلاح کے لیے اس کے سائنسی اور ہمدردانہ وژن سے گہری ہم آہنگی کا اظہار کیا۔