PM Modi in Assam: ڈبل انجن سرکار میں ترقی کا دھارا برہم پتر کی طرح بلا تعطل جاری، شمال مشرق کی ترقی کو ملی نئی رفتار: وزیراعظم مودی

گوہاٹی (آسام): وزیراعظم نریندر مودی نے ہفتہ کے روز لوک پریہ گوپیناتھ بردولائی بین الاقوامی ہوائی اڈے کی نئی ٹرمینل عمارت کا افتتاح کرتے ہوئے کہا کہ جس طرح آسام میں دریائے برہم پتر مسلسل بہتا رہتا ہے، اسی طرح بی جے پی کی ڈبل انجن سرکار کے تحت ریاست میں ترقی کا دھارا بھی بلا رکاوٹ جاری ہے۔

آسام نہیں، پورے شمال مشرق کی ترقی کا جشن

گوہاٹی میں ایک اجتماع سے خطاب کرتے ہوئے وزیراعظم نے کہا کہ یہ دن صرف آسام ہی نہیں بلکہ پورے شمال مشرقی خطے کی ترقی کا جشن ہے۔ انہوں نے کہا: ’’آج ترقی کا جشن منایا جا رہا ہے۔ پورا ملک دیکھے گا کہ آسام ترقی کا تہوار منا رہا ہے۔‘‘

جدید ہوائی اڈے نئی امیدوں کے در وا کرتے ہیں

وزیراعظم مودی نے کہا کہ جدید اور عالمی معیار کی ہوائی اڈے کی سہولتیں کسی بھی ریاست کے لیے نئے امکانات پیدا کرتی ہیں اور یہ عوام کے اعتماد اور ریاست کے بڑھتے ہوئے خود اعتمادی کا ستون بنتی ہیں۔

آسام کی مٹی اور عوام سے جذباتی وابستگی

انہوں نے کہا کہ آسام کی سرزمین سے ان کی وابستگی، یہاں کے عوام خصوصاً ماؤں اور بہنوں کی محبت انہیں مسلسل متاثر اور حوصلہ افزائی کرتی ہے، جس سے شمال مشرق کی ترقی کے لیے ان کا عزم مزید مضبوط ہوتا ہے۔ ان کے بقول ’’آج آسام کی ترقی میں ایک نیا باب شامل ہو رہا ہے۔‘‘

ترقی اور وراثت کا حسین امتزاج

وزیراعظم نے کہا کہ نئی ٹرمینل عمارت میں قدم رکھتے ہی ترقی اور وراثت کے امتزاج کا حقیقی مفہوم واضح ہو جاتا ہے۔ ہوائی اڈے کو آسام کی قدرتی خوبصورتی اور ثقافت کو مدنظر رکھتے ہوئے ڈیزائن کیا گیا ہے اور ہریالی سے بھرپور یہ عمارت مسافروں کو سکون اور راحت کا احساس دیتی ہے۔

بانس (بیمبو) کے فروغ پر زور

بانس کے فروغ کا ذکر کرتے ہوئے وزیراعظم نے کہا کہ 2014 سے قبل ملک میں ایک ایسا قانون تھا جس کے تحت بانس کو درخت مانا جاتا تھا اور اس کی کٹائی کی اجازت نہیں تھی، حالانکہ دنیا بھر میں بانس کو ایک پودا تسلیم کیا جاتا ہے۔ انہوں نے کہا: ’’ہم نے اس قانون کو ختم کیا اور بانس کو گھاس کے زمرے میں شامل کر کے اسے اس کا جائز مقام دیا۔‘‘

2047 کے ہدف کی جانب بھارت

وزیراعظم مودی نے کہا کہ بھارت تیزی سے دنیا کی تیسری سب سے بڑی معیشت بننے کی طرف بڑھ رہا ہے۔ گزشتہ 11 برسوں میں جدید بنیادی ڈھانچے کی ترقی اس تبدیلی کا سب سے بڑا سبب رہی ہے۔ انہوں نے کہا کہ 2047 کے ترقی یافتہ بھارت کے مشن میں ملک کی ہر ریاست اور ہر خطے کا اہم کردار ہے۔

بھارت ایکسپریس اردو۔