Karur stampede: کرور حادثہ، وزیراعظم مودی نے مہلوکین کے لواحقین کو 2 لاکھ اور زخمیوں کو 50 ہزار روپے امداد دینے کا کیا اعلان

نئی دہلی: تمل ناڈو کے ضلع کرور میں منعقدہ تملگا ویتری کژگم (ٹی وی کے) کی ریلی ایک حادثے میں تبدیل ہوگئی۔ ریلی میں اچانک بھگدڑ مچنے سے 38 افراد ہلاک ہوگئے جبکہ کئی لوگ شدید زخمی ہوگئے۔ اس دردناک واقعے نے پورے صوبے کو سوگ میں مبتلا کردیا ہے۔

اس حادثے پر وزیراعظم نریندر مودی نے گہرے رنج و غم کا اظہار کیا ہے۔ وزیراعظم کے دفتر نے سوشل میڈیا پلیٹ فارم ایکس پر ایک پوسٹ میں لکھا، ’’وزیراعظم نریندر مودی نے تمل ناڈو کے کرور میں سیاسی ریلی کے دوران پیش آنے والے اس افسوسناک واقعے میں ہلاک افراد کے لواحقین کو وزیراعظم ریلیف فنڈ سے 2 لاکھ روپے کی معاوضہ رقم دینے کا اعلان کیا ہے، جبکہ زخمیوں کو 50 ہزار روپے دیے جائیں گے۔‘‘

اس سے قبل، تمل ناڈو کے وزیراعلیٰ ایم کے اسٹالن نے بھی اس حادثے کو نہایت افسوسناک اور تکلیف دہ قرار دیتے ہوئے متاثرہ خاندانوں کے ساتھ ہمدردی کا اظہار کیا۔ وزیراعلیٰ نے کہا کہ یہ حادثہ انتہائی رنجیدہ اور اذیت ناک ہے، میری دعائیں اور ہمدردیاں مہلوک افراد کے خاندانوں کے ساتھ ہیں۔ صوبائی حکومت ان کی ہر ممکن مدد کرے گی۔ انہوں نے اعلان کیا کہ ہر مہلوک فرد کے اہل خانہ کو وزیراعلیٰ ریلیف فنڈ سے 10 لاکھ روپے کی مالی امداد دی جائے گی، جبکہ زخمیوں کو 1 لاکھ روپے امداد دی جائے گی۔

اس حادثے کی تفصیلی تحقیقات کے لیے وزیراعلیٰ نے ایک عدالتی تحقیقاتی کمیشن قائم کرنے کا بھی حکم دیا ہے۔ اس کمیشن کی سربراہی ہائی کورٹ کی ریٹائرڈ جج جسٹس ارونا جگدیشان کریں گی۔ کمیشن کو ہدایت دی گئی ہے کہ وہ واقعے کی مکمل تحقیقات کرکے رپورٹ حکومت کو پیش کرے۔

ڈی جی پی جی وینکٹرمن نے اس حادثے کے حوالے سے کہا کہ یہ ایک نہایت افسوسناک واقعہ ہے۔ انہوں نے کہا کہ واقعے کے فوراً بعد ہم نے کارروائی کرتے ہوئے ایڈیشنل ڈائریکٹر جنرل آف پولیس ڈیوڈسن کی سربراہی میں 3 انسپکٹر جنرلز، 2 ڈپٹی انسپکٹر جنرلز اور 10 سپرنٹنڈنٹس آف پولیس سمیت 2000 پولیس اہلکار تعینات کیے۔

انہوں نے بتایا کہ تملگا ویتری کژگم (ٹی وی کے) کے گزشتہ پروگراموں کو مدنظر رکھتے ہوئے ان کی درخواست پر پروگرام کا مقام مختص کیا گیا تھا۔ حالانکہ تقریباً 10 ہزار افراد کے آنے کی توقع تھی، لیکن تقریباً 27 ہزار لوگ جمع ہوگئے۔ وجے کی مہم کے دوران سیکورٹی کے لیے 500 پولیس اہلکار تعینات تھے۔

بھارت ایکسپریس۔