کنگنا رانوت پر متنازعہ تبصرہ، پھنس گئی سپریا شرینیت، وویمن کمیشن نے الیکشن کمیشن سے کیا بڑا مطالبہ

قومی خواتین کمیشن (این سی ڈبلیو) نے پیرکے روزالیکشن کمیشن کو خط لکھ کرلوک سبھا الیکشن میں ہماچل پردیش کی منڈی سیٹ سے بی جے پی امیدواراور اداکارہ کنگنا رانوت پرمبینہ قابل اعتراض تبصرہ کرنے کے معاملے میں کانگریس لیڈر سپریا شرینیت اورایچ ایس اہیرکے خلاف سخت کارروائی کا مطالبہ کیا۔ شرینیت کے انسٹا گرام اکاؤنٹ سے کنگنا رانوت سے متعلق قابل اعتراض پوسٹ کیا گیا، جسے بعد میں ہٹا دیا گیا۔ کسان کانگریس کے ریاستی جوائنٹ کوآرڈینیٹرایچ ایس اہیرنے بھی کنگنا رانوت کے خلاف مبینہ طورپرتوہین آمیزتبصرہ کیا تھا۔

این سی ڈبلیو نے کہا کہ کمیشن کی چیئرپرسن ریکھا شرما نے الیکشن کمیشن کو خط لکھ کرسپریا شرینیت اورایچ ایس اہیر کے خلاف کارروائی کا مطالبہ کیا ہے۔ اس نے اپنی پوسٹ میں کہا ہے کہ قومی خواتین کمیشن سپریا شرینیت کے ہتک آمیزسلوک سے حیران ہے۔

 کنگنا رانوت کے بارے میں کیا توہین آمیز تبصرہ

سپریا شرینیت اورایچ ایس اہیرنے سوشل میڈیا پرکنگنا رانوت کے بارے میں قابل اعتراض تبصرہ کیا تھا۔ ایسا کرنا ناقابل برداشت ہے اور خواتین کی عزت کے خلاف ہے۔ ریکھا شرما نے الیکشن کمشنرکو خط بھیج کران کے خلاف فوری اورسخت کارروای کا مطالبہ کیا ہے۔ آئیے سبھی خواتین کے لئے احترام اور وقار بنائے رکھیں۔ خواتین کا احترام کریں۔

ہرخاتون عزت کی حقدار، کنگنا کا پلٹ وار

واضح رہے کہ سپریا شرینیت کے انسٹا گرام اکاونٹ سے کنگنا رانوت سے متعلق ایک قابل اعتراض پوسٹ کیا گیا تھا۔ اس پوسٹ پرکنگنا رانوت نے زبردست پلٹ وارکیا۔ کنگنا رانوت نے کہا کہ ایک فنکارکے طورپراپنے کیریئرکے گزشتہ 20 سالوں میں میں نے ہرطرح کی خواتین کا کردارنبھایا ہے۔ ہمیں اپنی بیٹیوں کو تعصب کے بندھنوں سے آزاد کرنا چاہئے۔ ہمیں ان کے جسم کے اعضاء کے بارے میں تجسس سے اوپراٹھنا چاہئے۔ ہرعورت اپنی عزت کی مستحق ہے۔

سپریا شرینیت کی وضاحت

سپریا شرینیت نے پورے معاملے میں وضاحت دیتے ہوئے کہا کہ ان کے فیس بک اور انسٹاگرام اکاؤنٹ تک کئی لوگوں کی پہنچ ہے اوران میں سے کسی نے آج بے حد غیرمناسب پوسٹ کیا۔ انہوں نے کہا کہ جیسے ہی مجھے پتہ چلا میں نے وہ پوسٹ ہٹا دیا۔ جو لوگ مجھے جانتے ہیں، وہ یہ بھی جانتے ہی کہ میں کبھی بھی کسی خاتون کے تئیں ذاتی اورنامناسب تبصرہ نہیں کرسکتی۔ میں جاننا چاہتی ہوں کہ یہ کیسے ہوا۔