Kalpana Speech in Jharkhand Assembly: ’’ہیمنت سورین کے پانچ ماہ کون واپس کرے گا…‘‘؟ کلپنا سورین نے جھارکھنڈ اسمبلی میں کہہ دی بڑی بات

رانچی: جے ایم ایم ایم ایل اے کلپنا سورین نے منگل کے روز جھارکھنڈ اسمبلی میں اپنی پہلی تقریر میں کہا کہ ایجنسی کی غلط کارروائی کی وجہ سے قبائلی وزیر اعلیٰ ہیمنت سورین کو پانچ ماہ تک جیل میں رہنا پڑا۔ یہ پانچ مہینے انہیں کون لوٹائے گا؟ اس کا جواب جھارکھنڈ کی عوام آنے والے انتخابات میں دے گی۔

یہ گجرات نہیں جھارکھنڈ ہے: کلپنا

بی جے پی کو نشانہ بناتے ہوئے انہوں نے کہا کہ یہ گجرات نہیں جھارکھنڈ ہے۔ یہاں کا ہر شخص آج ہیمنت جی کے ساتھ کھڑا ہے۔ ہم اپنے کام کے دم پر انتخابی میدان میں جائیں گے لیکن یہ لوگ جھوٹی کہانیوں پر ووٹ مانگنے جائیں گے۔ اس بار انہیں ووٹ نہیں ملیں گے۔ یہ لوگ آئینی اداروں کی آڑ میں جمہوری طور پر منتخب حکومت کو گرا دیتے ہیں۔ جس طرح جھارکھنڈ کی عوام نے لوک سبھا انتخابات میں انہیں جواب دیا ہے، اسی طرح آئندہ اسمبلی انتخابات میں بھی انہیں شکست کا منہ دیکھنا پڑے گا۔

انہوں نے کہا کہ جب منی پور میں قبائلی خواتین پر تشدد اور مدھیہ پردیش میں قبائلی نوجوانوں پر مظالم ہوئے تو مرکزی حکومت کہاں تھی؟ بی جے پی کے لوگ بتائیں کہ ریاست میں پسماندہ طبقات کے 27 فیصد ریزرویشن کو کس نے کم کیا؟

’’عورت کے لیے فیملی چلانا مشکل‘‘

کلپنا سورین نے کہا کہ مرکزی حکومت نے جھارکھنڈ کو دیئے گئے حقوق اور حصہ میں مسلسل کمی کی ہے۔ اپوزیشن بی جے پی پر خواتین مخالف ہونے کا الزام لگاتے ہوئے انہوں نے کہا کہ ان کی وجہ سے مہنگائی اس حد تک بڑھ گئی ہے کہ عورت کے لیے اپنی فیملی چلانا مشکل ہو گیا ہے۔ ہیمنت سورین کی حکومت نے 21 سے 50 سال کی خواتین کو ہر ماہ ایک ہزار روپے دینے کے لیے ’جھارکھنڈ چیف منسٹر مینیاں سمان یوجنا‘ شروع کیا ہے۔

گانڈے اسمبلی سیٹ سے ایم ایل اے ہیں کلپنا

جھارکھنڈ کے سی ایم ہیمنت سورین کی اہلیہ کلپنا سورین حال ہی میں گانڈے اسمبلی سیٹ پر ضمنی انتخاب جیتنے کے بعد ایوان میں پہنچی ہیں۔ منگل کے روز اسپیکر نے انہیں ایوان میں پہلی تقریر کرنے کا موقع فراہم کیا۔

بھارت ایکسپریس۔