Jamiat Ulama-E-Hind Boycotts Secular Leaders Events: نتیش کمار اور نائیڈو جیسے سیکولر لیڈران کی افطار پارٹی اور عید ملن کے بائیکاٹ کا اعلان، مولانا ارشد مدنی نے کہہ دی یہ بڑی بات

انہوں نے کہا کہ مسلمانوں کو حاشیے پر دھکیلنے کی منصوبہ بند سازشیں ہو رہی ہیں۔ مذہبی جذبات بھڑکائے جا رہے ہیں۔ مذہبی مقامات کو تنازعہ میں گھسیٹا جا رہا ہے۔ فسادات کراکر حکومت کی طرف سے مسلمانوں کو نشانہ بنایا جا رہا ہے۔ ان حادثات پر بھی یہ مبینہ سیکولرلیڈران آنکھیں بند کئے ہیں۔ انہوں نے بہارکے وزیراعلیٰ نتیش کمار، آندھرا پردیش کے وزیراعلیٰ چندرا بابو نائیڈو اور مرکزی وزیر چراغ پاسوان جیسے لیڈران کی تنقید کی اور ایک طرح سے ان کے بائیکاٹ کا اعلان کردیا۔ انہوں نے کہا کہ ایسے لیڈر اقتدار کی خاطر نہ صرف مسلمانوں کے خلاف ہورہی نا انصافی کو نظرانداز کررہے ہیں بلکہ ملک کے آئین اور جمہوری اقدار کو بھی نظرانداز کررہے ہیں۔  انہوں نے کہا کہ وقف ترمیمی بل 2024 پر ان لیڈران کے رویے سے ان کا دوہرا چہرہ اور کردار اجاگرہوگیا ہے۔ یہ لیڈر صرف مسلمانوں کے ووٹ حاصل کرنے کے لئے دکھاوے کا سیکولرازم اپناتے ہیں، لیکن اقتدارمیں آنے کے بعد مسلم طبقے کے موضوعات اورایشوز کو پوری طرح سے بھلا دیتے ہیں۔

جمعیۃ علماء ہند نے کیا یہ بڑا فیصلہ

اسی کے پیش نظر جمعیۃ علماء ہند نے فیصلہ کیا ہے کہ وہ ایسے لیڈران کی تقریبات میں شامل ہوکر ان کی پالیسیوں کو درست ٹھہرانے میں تعاون نہیں دے گی۔ انہوں نے ملک کی دیگرمسلم ت نظیموں اور اداروں سے بھی اپیل کی ہے کہ وہ بھی اس علامتی مخالفت میں شامل ہوں اوران لیڈران کی افطار پارٹیوں اور عید ملن جیسی تقریبات میں حصہ لینے سے پرہیز کریں۔ جب ملک میں نفرت اور نا انصافی کا ماحول پنپ رہا ہے، تب ان لیڈران نے خاموشی اختیار کرکے اصلی چہرے کو بے نقاب کردیا ہے۔ جمعیۃ علماء ہند نے ملک بھرمیں آئین بچاؤکانفرنس کا انعقاد کرکے ان لیڈران کو اجاگر کرنے کی کوشش کی، لیکن اس کا بھی ان پر کوئی اثر نہیں پڑا۔ مولانا سید ارشد مدنی نے واضح طورپرکہا کہ جب یہ لیڈران ہمارے دکھ درد سے کوئی سروکار نہیں رکھتے تو ہمیں بھی ان سے کسی طرح کی امید نہیں رکھنی چاہئے۔