Jagdeep Dhankhar Resigns: جگدیپ دھنکھڑ کے استعفیٰ کے بعد کون ہوگا ملک کا اگلا نائب صدر؟ سب سے آگے ہے یہ نام

آپ کو بتا دیں کہ 74 سالہ جگدیپ دھنکھڑ نے اگست 2022 میں ملک کے 14ویں نائب صدر کے طور پر حلف لیا تھا۔ وہ تین سالوں تک راجیہ سبھا کے چیئرمین کے طورپرکام کرتے رہے اوراب دوسال سے زیادہ مدت باقی رہتے ہوئے انہوں نے عہدہ چھوڑدیا۔ اب اس اہم آئینی عہدے پر کون بیٹھے گا؟ اس پرسیاسی گلیاروں میں کافی بحث ہورہی ہے۔

ڈپٹی چیئرمین ہری ونش نارائن سنگھ سب سے مضبوط دعویدار

بی جے پی کی قیادت والے این ڈی اے اتحاد کی طرف سے نئے نائب صدر عہدے کے امیدوارکا اعلان جلد ہونے کا امکان ہے۔ اس دوڑ میں سب سے مضبوط نام راجیہ سبھا کے ڈپٹی چیئرمین ہری ونش نارائن سنگھ کا مانا جا رہا ہے۔ انہوں نے آج صدرجمہوریہ دروپدی مرمو سے ملاقات بھی کی ہے۔ آپ کو بتا دیں کہ ڈپٹی چیئرمین ہری ونش نارائن سنگھ جنتا دل (یونائیٹیڈ) کے راجیہ سبھا رکن ہیں اور2020 سے ڈپٹی چیئرمین کے طورپر کام کررہے ہیں۔ ہری ونش سنگھ کو مرکز کی مودی حکومت کا قریبی اور قابل اعتماد چہرہ مانا جاتا ہے۔

دیگرممکنہ امیدواروں میں کون ہیں شامل؟

بی جے پی کسی ریاست کے موجودہ گورنرکوبھی امیدواربنا سکتی ہے۔ جیسے جگدیپ دھنکھڑ مغربی بنگال کے لیفٹیننٹ گورنررہ چکے تھے۔ ساتھ ہی تجربہ کارمرکزی وزیریا پارٹی کے تنظیمی لیڈرکا نام بھی سامنے آسکتا ہے۔ پارٹی ذرائع کے مطابق، ہائی کمان کے پاس کئی متبادل ہیں اورکئی ناموں پرغورکیا جاسکتا ہے۔

گزشتہ نائب صدورسے بی جے پی کا رشتہ

جگدیپ دھنکھڑ سے پہلے ایم وینکیا نائیڈونائب صدرتھے اوروہ بھی بی جے پی کے سینئرلیڈررہ چکے تھے۔ اس سے پہلے کے رجحانوں کو دیکھتے ہوئے یہ مانا جا رہا ہے کہ اس باربھی این ڈی اے ایک ایسا چہرہ سامنے لائے گا، جو تنظیمی طورپرمضبوط اور ایوان کو چلانے میں اہم رول ادا کرسکے۔

 نتیش کمارکے نام کی بھی قیاس آرائی

دوسری جانب، پٹنہ میں جب میڈیا نے بہارکے وزیراعلیٰ نتیش کمارکے نائب صدرعہدے کی دوڑمیں شامل ہونے کی قیاس آرائیوں پر ردعمل مانگا توبہارحکومت میں وزیرنیرج کمارسنگھ ببلونے کہا کہ یہ اچھی بات ہے۔ اگروہ نائب صدر بنتے ہیں تو اس میں کیا پریشانی ہے؟ حالانکہ اب تک جے ڈی یو یا نتیش کمار کی طرف سے اس پرکوئی باضابطہ طور پربیان جاری نہیں کیا گیا ہے۔ حالانکہ آرجے ڈی رکن اسمبلی مکیش روشن نے کہا کہ بہارمیں بی جے پی الیکشن تک اپنا وزیراعلیٰ بنانا چاہتی ہے۔ آگے بھی حکومت بننے پراپنا وزیراعلیٰ بنائے گی۔ اگلا استعفیٰ وزیراعلیٰ نتیش کمارکا ہوگا۔ انہوں نے کہا کہ جے ڈی یوکوختم کرنے میں بی جے پی لگی ہے۔ نتیش کمارکے قریبی لیڈران اوربی جے پی نے اپنے پالے میں کرلیا ہے۔ کھیلا شروع ہوگیا ہے۔ اب بی جے پی ان کو نائب صدربنا سکتی ہے۔ اس پرجے ڈی یوکوٹے کے وزیر اور رکن اسمبلی مدن سہنی نے ایک پرائیویٹ ٹی وی چینل سے بات چیت میں کہا کہ نتیش کمارنائب صدرنہیں بنیں گے۔ بہارکے وزیراعلیٰ ہیں۔ آگے بھی رہیں گے۔ آرجے ڈی جھوٹا من گھڑت دعویٰ کررہی ہے۔ این ڈی اے میں کسی کے ساتھ زبردستی نہیں کیا جاتا۔ انہوں نے کہا کہ جگدیپ دھنکھڑ نے اپنی صحت کی وجہ سے استعفیٰ دیا ہے۔ جبراً نہیں ہٹائے گئے ہیں۔ ان کے استعفیٰ کونتیش کمارسے نہ جوڑا جائے۔