Budget 2026: بجٹ تجاویز کے باعث بھارت بنے گا اورنج اکانومی کا گلوبل لیڈر: ڈاکٹر دنیش شرما

لکھنؤ: راجیہ سبھا کے رکنِ پارلیمنٹ اور اتر پردیش کے سابق نائب وزیر اعلیٰ ڈاکٹر دنیش شرما نے مرکزی بجٹ پر ردِعمل ظاہر کرتے ہوئے کہا ہے کہ اس بجٹ نے بھارت کو اورنج اکانومی کا عالمی لیڈر بنانے کی سمت واضح کر دی ہے۔ ان کے مطابق اب دنیا بھارت کے نوجوانوں کی تخلیقی صلاحیتوں سے روشناس ہوگی اور ویژول ایفیکٹس، اینیمیشن اور تخلیقی صنعتوں میں بھارت کا غلبہ قائم ہوگا۔

ڈاکٹر دنیش شرما نے بتایا کہ اس مقصد کے تحت ملک کی اقتصادی راجدھانی ممبئی میں انڈین انسٹی ٹیوٹ آف کری ایٹو ٹیکنالوجی قائم کیا جائے گا، جبکہ ملک بھر کے 15 ہزار اسکولوں اور 5 ہزار کالجوں میں کانٹینٹ کری ایٹو لیبز بنائی جائیں گی۔ انہوں نے کہا کہ گزشتہ برس وزیر اعظم نریندر مودی نے عالمی تخلیقی معیشت میں بھارت کے بڑھتے کردار کو اجاگر کیا تھا اور موجودہ بجٹ میں اسی وژن کو عملی شکل دی گئی ہے۔

انہوں نے بجٹ کو ہمہ گیر اور ہر طبقے کی ترقی کے لیے وقف قرار دیتے ہوئے کہا کہ بینکنگ سیکٹر کو عوام کے لیے کھولنے کے بعد اب حکومت اسے خود کفیل اور ترقی یافتہ بھارت کی ضروریات کے مطابق مضبوط بنا رہی ہے۔ اب بینک ترقی کے نئے ساتھی کے طور پر کردار ادا کریں گے۔ انہوں نے وزیر اعظم نریندر مودی اور وزیر خزانہ نرملا سیتارمن کا شکریہ ادا کرتے ہوئے کہا کہ حکومت نے ترقی کے ساتھ ساتھ مالیاتی نظم و ضبط بھی برقرار رکھا ہے۔

ڈاکٹر شرما کے مطابق کارپوریٹ اور میونسپل بانڈز کو فروغ دینا چھوٹے شہروں کی ترقی کے لیے نعمت ثابت ہوگا، جس سے شہروں میں ضرورت کے مطابق بنیادی ڈھانچے کی سہولیات تیار ہوں گی۔ نئے انکم ٹیکس قانون کے نفاذ کے بعد ٹیکس نظام سزا دینے کے بجائے تعاون فراہم کرنے والا ہوگا، جس میں ایماندار شہریوں کو احترام ملے گا۔

انہوں نے کہا کہ بجٹ میں انفراسٹرکچر کی ترقی پر خاص زور دیا گیا ہے۔ ملک میں سات ہائی اسپیڈ ریل کوریڈورز کی تعمیر سے ریلوے شعبے کی شکل بدل جائے گی۔ ریکارڈ سرمایہ جاتی اخراجات کی تجاویز سے روزگار کے مواقع پیدا ہوں گے، نجی سرمایہ کاری کو تقویت ملے گی اور علاقائی توازن مضبوط ہوگا۔

ڈاکٹر دنیش شرما نے مزید کہا کہ ساحلی سیاحتی مقامات کی نشاندہی، صنعتی کوریڈورز کی ترقی، گرین ٹرانسپورٹ کے لیے ای-بسوں کا انتظام، اسپتالوں میں ایمرجنسی اور ٹراما کیئر کی توسیع اور جدید ٹیکنالوجی میں سرمایہ کاری حکومت کے پائیدار ترقی کے عزم کو ظاہر کرتی ہے۔ بجٹ میں مالیاتی کمیشن کی سفارشات کو قبول کر کے ترقی کو رفتار دینے کا راستہ ہموار کیا گیا ہے، جس سے دیہات اور شہروں دونوں میں خدمات اور سہولیات بہتر ہوں گی۔

انہوں نے بتایا کہ ملک کے مختلف حصوں میں پانچ یونیورسٹی ٹاؤن شپ بڑے صنعتی اور لاجسٹک کوریڈورز کے آس پاس قائم کی جائیں گی، جن سے طلبہ کو براہِ راست فائدہ ہوگا۔ ان ٹاؤن شپ میں اسکل سینٹرز، ہائی ٹیک لیبارٹریاں، جدید کالج، ریسرچ سینٹرز اور انوویشن ہب قائم کیے جائیں گے، جس سے تعلیم کے معیار میں بہتری اور مقامی سطح پر روزگار کے نئے مواقع پیدا ہوں گے۔ اس کے علاوہ مشرقی بھارت میں نیشنل انسٹی ٹیوٹ آف ڈیزائن (این آئی ڈی) قائم کرنے کا بھی اعلان کیا گیا ہے۔

بھارت ایکسپریس۔