PM Modi addresses Indian community in Auckland: ’’بھارت-نیوزی لینڈ تعلقات کی ’واکا‘ نئی منزل کی جانب’، آکلینڈ میں وزیر اعظم مودی کا بھارتی برادری سے خطاب

آکلینڈ: وزیر اعظم نریندر مودی اپنے چھ روزہ غیر ملکی دورے کے آخری مرحلے میں آکلینڈ میں منعقدہ بھارتی برادری کے ایک بڑے اجتماع میں شریک ہوئے۔ اس موقع پر بڑی تعداد میں ہند نژاد افراد موجود تھے۔ جیسے ہی وزیر اعظم مودی خطاب کے لیے اسٹیج پر پہنچے، پورا ہال ’مودی، مودی‘ کے نعروں سے گونج اٹھا۔

وزیر اعظم مودی کی آمد پر شرکا میں غیر معمولی جوش و خروش دیکھنے میں آیا۔ اپنے خطاب کا آغاز کرتے ہوئے انہوں نے کہا، ’’چالیس برس بعد کوئی بھارتی وزیر اعظم نیوزی لینڈ کی سرزمین پر آیا ہے۔ یہ میرے لیے باعثِ سعادت ہے کہ میں ایک سو چالیس کروڑ بھارتیوں کی نیک تمنائیں نیوزی لینڈ کے عوام کے لیے لے کر آیا ہوں۔ اگرچہ وزیر اعظم کی حیثیت سے یہ میرا پہلا دورہ ہے، لیکن پچیس سے تیس سال قبل، جب میں نہ کسی حکومت کا حصہ تھا اور نہ ہی عوامی زندگی میں مجھے کوئی جانتا تھا، تب بھی مجھے یہاں آنے کا موقع ملا تھا۔‘‘

انہوں نے کہا کہ اُس وقت انہیں تین تحائف ملے تھے، جنہیں وہ اپنے ساتھ بھارت لے گئے تھے: ایک مفلر، ایک ٹوپی اور ایک دستانہ، کیونکہ اُس وقت سخت سردی تھی۔ انہوں نے بتایا کہ ان تحائف میں سے یہی مفلر آج بھی ان کے پاس محفوظ ہے اور وہ اسے اس دورے پر اپنے ساتھ لائے ہیں۔ انہوں نے کہا، ’’یہ مفلر مجھے 25 سے 30 سال پہلے نیوزی لینڈ کے ایک دوست نے دیا تھا۔ میں نے برسوں اس کا استعمال کیا اور آج بھی اسے اسی محبت سے سنبھال کر رکھا ہے، جیسے آپ سب کی محبت کو اپنے دل میں محفوظ رکھا ہے۔‘‘

وزیر اعظم مودی نے کہا کہ بھارت اور نیوزی لینڈ کے تعلقات صرف دوستی تک محدود نہیں بلکہ ان میں یادیں، مشترکہ اقدار اور مضبوط عزم بھی شامل ہے۔ انہوں نے کہا کہ نیوزی لینڈ کی ایک خوبصورت روایت ’واکا‘ ان تعلقات کی بہترین ترجمانی کرتی ہے۔ ’واکا‘ صرف ایک کشتی کا نام نہیں بلکہ مشترکہ سفر کی علامت ہے، اور آج بھارت و نیوزی لینڈ کے تعلقات کی یہی ’واکا‘ ایک نئے سفر کے لیے تیار ہے۔

انہوں نے کہا کہ ہمارے سامنے مواقع سے بھرا وسیع سمندر ہے، ہوائیں ہمارے ساتھ ہیں، سمندر کی بلند لہریں ہمارا ساتھ دے رہی ہیں اور مضبوط ارادوں کا نیلا آسمان بھی ہمارے ساتھ ہے۔ انہوں نے کہا کہ اس مشترکہ سفر کی کامیابی پر انہیں مکمل یقین ہے، کیونکہ اس سفر کے اصل کشتی بان وہ خود نہیں بلکہ نیوزی لینڈ میں بسنے والی پوری بھارتی برادری ہے، جو آکلینڈ سے ویلنگٹن اور کرائسٹ چرچ سے کوئینز ٹاؤن تک ہر گوشے میں بھارت کا وقار بلند کر رہی ہے۔

وزیر اعظم نے نیوزی لینڈ کے وزیر اعظم کرسٹوفر لکسن، نیوزی لینڈ حکومت، لیبر پارٹی اور تمام معزز شخصیات کا شکریہ ادا کرتے ہوئے کہا کہ اس سے ظاہر ہوتا ہے کہ بھارت اور نیوزی لینڈ کے تعلقات کو وسیع سیاسی حمایت حاصل ہے۔ انہوں نے کہا کہ نیوزی لینڈ میں بھارتی برادری کی کامیابیاں دونوں ممالک کے تعلقات کو مزید مضبوط بنا رہی ہیں۔

انہوں نے کہا کہ کیوی انڈین برادری ہر میدان میں اپنی صلاحیتوں کا لوہا منوا رہی ہے۔ انہوں نے اپوزیشن لیڈر کرس ہپکنز کے اس رقص کا بھی ذکر کیا جو بھارت کے یومِ آزادی کے موقع پر ’دمادم مست قلندر‘ گیت پر وائرل ہوا تھا، اور کہا کہ اس نے بھارتی برادری کے دل جیت لیے۔ وزیر اعظم نے نیوزی لینڈ کو ایک پُرامن، خوشحال، خوبصورت اور ثقافتی طور پر مالا مال ملک قرار دیتے ہوئے وہاں کے عوام کی فراخ دلی کی تعریف کی۔

انہوں نے کہا کہ نیوزی لینڈ کے عوام نے بھارتی برادری کو کھلے دل سے قبول کیا، ان کی صلاحیتوں پر اعتماد کیا اور انہیں معاشرے کا اہم حصہ بنایا۔ آج نیوزی لینڈ کی معیشت اور سماجی زندگی میں کیوی انڈین برادری نمایاں کردار ادا کر رہی ہے۔

وزیر اعظم مودی نے کہا کہ نیوزی لینڈ وہ ملک ہے جہاں نکھل روی شنکر ایئر نیوزی لینڈ کے چیف ایگزیکٹو آفیسر بن سکتے ہیں، آنند ستیہ نند گورنر جنرل بن سکتے ہیں، جبکہ رچن رویندر، ایش سودھی اور اعجاز پٹیل جیسے ہند نژاد کھلاڑی قومی کرکٹ ٹیم میں اپنی صلاحیتوں کا مظاہرہ کر سکتے ہیں۔ انہوں نے کہا کہ نیوزی لینڈ کی سڑکوں پر بھی ہندوستانی شہروں کے نام جیسے کھنڈالہ، بمبئی ہلز، کورومنڈل، کلکتہ اسٹریٹ، دہلی کریسنٹ اور امرتسر اسٹریٹ بھارت اور نیوزی لینڈ کی گہری دوستی کی علامت ہیں۔ آخر میں انہوں نے کہا کہ جب بھی وہ نیوزی لینڈ کی قیادت سے ملتے ہیں تو وہ بھارتی برادری کی بے حد تعریف کرتے ہیں، اور جب آپ کی تعریف ہوتی ہے تو میرا سر بھی فخر سے بلند ہو جاتا ہے۔

بھارت ایکسپریس۔