India should play a role in Russia-Ukraine conflict:  بھارت کو روس-یوکرین تنازع کے حل میں کردار ادا کرنا چاہیے، روس۔یوکرین تنازع پر فن لینڈ کے صدر الیگزینڈر اسٹب کا بیان

ہیلسنکی: فن لینڈ کے صدر الیگزینڈر اسٹب نے کہا ہے کہ بھارت کو روس-یوکرین تنازع کے حل میں کردار ادا کرنا چاہیے کیونکہ ’’بھارت کا اس معاملے میں جغرافیائی سیاسی مفاد ہے۔‘‘ ہیلسنکی سکیورٹی فورم 2025 میں خطاب کرتے ہوئے اسٹب نے کہا: ’’میں نے حال ہی میں وزیر اعظم نریندر مودی سے یوکرین کی صورتحال پر بات کی ہے۔ بھارت کا یہاں ایک جغرافیائی سیاسی داؤ پر لگا ہوا ہے، اس لیے ہمیں انہیں شامل کرنے کی ضرورت ہے۔‘‘

جنگ بندی اور مذاکرات پر زور

صدر اسٹب نے زور دیا کہ امن کی طرف بڑھنے کے لیے سب سے پہلا قدم جنگ بندی ہے۔ انہوں نے کہا: ’’سب سے پہلے جنگ بندی ہونی چاہیے، تب ہی امن مذاکرات شروع ہوسکتے ہیں۔ اس کے بعد صدر زیلنسکی اور صدر پیوٹن کی دو طرفہ ملاقات کی باضابطہ تاریخ طے ہونی چاہیے۔ اس کے بعد زیلنسکی پیوٹن سے فون پر رابطہ کر سکتے ہیں تاکہ ممکنہ ایجنڈے پر بات ہوسکے۔‘‘

روس پر دباؤ اور یوکرین کی حمایت

فن لینڈ کے صدر نے کہا کہ ماسکو پر دباؤ بڑھاتے رہنے کے ساتھ ساتھ کیف کی بھرپور مدد بھی ضروری ہے۔ ’’ہمیں روس پر اقتصادی پابندیاں مزید سخت کرنی ہوں گی اور یوکرین کی فوجی صلاحیت کو بڑھانے کے لیے اسے دفاعی وسائل فراہم کرنے ہوں گے۔‘‘

یورپی و امریکی رہنماؤں کی واشنگٹن ملاقات

گزشتہ ماہ یوروپی رہنماؤں اور امریکی صدر ڈونلڈ ٹرمپ کی ملاقات کے نتائج پر بات کرتے ہوئے اسٹب نے کہا کہ یورپ طویل مدتی سلامتی کے اقدامات پر کام کر رہا ہے۔ ’’ہم یوروپی سکیورٹی انتظامات اور سلامتی کی ضمانتوں کے تصور پر کام کر رہے ہیں۔ فوجی سطح پر یہ تقریباً تیار ہیں۔‘‘

بھارت-فن لینڈ تعلقات اور مودی-اسٹب رابطہ

بھارت کی وزارت خارجہ کے مطابق، اگست میں وزیراعظم نریندر مودی اور صدر اسٹب کے درمیان فون پر گفتگو ہوئی تھی۔ اس دوران صدر اسٹب نے یوروپی، امریکی اور یوکرینی رہنماؤں کی واشنگٹن ملاقات کی تفصیلات سے مودی کو آگاہ کیا۔ وزیراعظم مودی نے تنازع کے پرامن حل اور امن و استحکام کی جلد بحالی کے لیے بھارت کی مستقل حمایت کو دہرایا۔ دونوں رہنماؤں نے بھارت-فن لینڈ تعلقات میں پیش رفت کا جائزہ لیا اور کوانٹم ٹیکنالوجیز، 6G، مصنوعی ذہانت، سائبر سکیورٹی اور پائیداری کے شعبوں میں تعاون بڑھانے پر اتفاق کیا۔ صدر اسٹب نے بھارت-یوروپی یونین آزاد تجارتی معاہدے (FTA) کی جلد تکمیل کی حمایت کی اور 2026 میں بھارت کی میزبانی میں ہونے والی AI Impact Summit کی کامیابی کے لیے تعاون کا یقین دلایا۔ وزیراعظم مودی نے صدر اسٹب کو بھارت کے دورے کی دعوت بھی دی تھی۔ وزیراعظم مودی نے ایکس (سابقہ ٹوئٹر) پر لکھا تھا: ’’صدر الیگزینڈر اسٹب سے اچھی گفتگو ہوئی۔ فن لینڈ یوروپی یونین میں ایک قیمتی شراکت دار ہے۔ تجارت، ٹیکنالوجی اور پائیداری جیسے شعبوں میں تعاون مضبوط بنانے پر بات ہوئی۔ یوکرین تنازع کے پرامن حل پر بھی خیالات کا تبادلہ کیا۔‘‘

بھارت ایکسپریس اردو۔