India-France Ties: وزیراعظم مودی-میکرون کی ’سپر ڈیل‘: بھارت میں بنیں گے فرانس کے ہیلی کاپٹر، ایمس میں اے آئی سے ہوگا بیماریوں کا علاج

نئی دہلی: وزیراعظم نریندر مودی اور فرانس کے صدر ایمانوئل میکرون کی دوستی اب صرف رسمی ملاقاتوں تک محدود نہیں رہی بلکہ یہ بھارت کی ٹیکنالوجی، صحت اور عوام کی زندگیوں میں تبدیلی لانے والے اقدامات کی شکل اختیار کر گئی ہے۔ ’انڈیا-فرانس انوویشن ایئر 2026‘ کے تحت دونوں ممالک نے متعدد بڑے سمجھوتوں پر دستخط کیے، جو ایوی ایشن، مصنوعی ذہانت اور سکل ڈویلپمنٹ کے شعبوں میں اہم پیش رفت کے مترادف ہیں۔

تکنیکی اور سائنسی تعاون پر وزیراعظم کی خوشی
ممبئی میں منعقدہ تقریب کے دوران وزیراعظم مودی نے سوشل میڈیا پر اپنے جذبات کا اظہار کرتے ہوئے کہا کہ یہ تعاون مستقبل پر مبنی اقدامات کی واضح مثال ہے۔ انہوں نے لکھا “صحت کے شعبے میں اے آئی کے لیے بھارت-فرانس مرکز، ڈیجیٹل سائنس اور ٹیکنالوجی کے لیے بھارت-فرانس مرکز اور ہوابازی میں مہارت کی تربیت کے لیے ایک قومی مرکز کی بنیاد بھارت-فرانس کے مستقبل کے لیے تعاون کی ایک روشن مثال ہیں۔”

اسپیشل گلوبل اسٹریٹجک پارٹنرشپ
اس ملاقات کے دوران بھارت اور فرانس کے تعلقات کو ’اسپیشل گلوبل اسٹریٹجک پارٹنرشپ‘ کا درجہ دیا گیا۔ اس سے دونوں ممالک کے دفاعی، تکنیکی اور صنعتی شعبوں میں تعاون کو نئی شناخت ملی۔ خاص طور پر کینرٹاکا کے وی ایم گل میں ایئربس ایچ 125 ہیلی کاپٹر کی اسمبلی لائن کا افتتاح کیا گیا، جس سے بھارت میں ہیلی کاپٹر کی تیاری ممکن ہوگی اور انہیں عالمی منڈی میں برآمد بھی کیا جا سکے گا۔

صحت اور ٹیکنالوجی میں پیش رفت
ایمس میں قائم ہونے والا اے آئی سینٹر بھی اس تعاون کی اہم جھلک ہے، جہاں مصنوعی ذہانت کے ذریعے بیماریوں کے علاج اور جدید تحقیق پر کام کیا جائے گا۔ اس اقدام سے نہ صرف مریضوں کی دیکھ بھال میں بہتری آئے گی بلکہ بھارت کے سائنسی میدان میں عالمی سطح پر اثر و رسوخ بھی بڑھے گا۔ یہ ’سپر ڈیل‘ بھارت اور فرانس کے تعلقات کو محض سفارتی تعلقات سے آگے لے کر ایک عملی اور مستقبل پر مبنی شراکت داری میں بدل رہی ہے، جو دفاع، صحت، ایوی ایشن اور ٹیکنالوجی کے شعبوں میں دونوں ممالک کے لیے نئے مواقع فراہم کرے گی۔

بھارت ایکسپریس اردو۔