B Sudershan Reddy files nomination: انڈیا بلاک کے نائب صدر کے امیدوار بی سدرشن ریڈی نے داخل کی نامزدگی،کانگریس قیادت اور کئی اتحادی رہنماؤں کی موجودگی میں کارروائی مکمل

انڈیا بلاک کے نائب صدر کے امیدوار اور سابق جج سپریم کورٹ بی سدرشن ریڈی نے جمعرات کو اپنی نامزدگی داخل کردی۔ اس موقع پر کانگریس صدر ملکارجن کھڑگے، کانگریس پارلیمانی پارٹی کی صدر سونیا گاندھی اور لوک سبھا میں اپوزیشن لیڈر راہل گاندھی موجود تھے۔ این سی پی (ایس سی پی) کے سربراہ شرد پوار، سماجوادی پارٹی کے ایم پی رام گوپال یادو، ڈی ایم کے کے ایم پی تروچی سیوا، شیوسینا (یو بی ٹی) کے ایم پی سنجے راوت سمیت انڈیا بلاک کے متعدد رہنما بھی اس موقع پر موجود تھے۔

نظریات کی جنگ، نمبروں کی نہیں — بی سدرشن ریڈی

نامزدگی سے قبل میڈیا سے گفتگو میں بی سدرشن ریڈی نے کہا کہ وہ ہرجماعت سے حمایت کی امید رکھتے ہیں کیونکہ وہ کسی سیاسی پارٹی سے تعلق نہیں رکھتے۔ انہوں نے کہا، ’’میں نے کل واضح کر دیا تھا کہ یہ نظریات کی جنگ ہے، نمبروں کی نہیں۔‘‘ بی سدرشن ریڈی نے مزید کہا کہ ’’پروگرام سادہ ہے، میں محض ریٹرننگ آفیسر کے پاس جا کر نامزدگی کاغذات جمع کرا رہا ہوں۔‘‘

انتخابی شیڈول اور خالی عہدہ

الیکشن کمیشن کے مطابق نائب صدر کے انتخاب کے لیے پولنگ 9 ستمبر کو ہوگی اور اسی دن ووٹوں کی گنتی بھی مکمل کرلی جائے گی۔ نامزدگی داخل کرنے کی آخری تاریخ 21 اگست ہے، جبکہ امیدوار 25 اگست تک اپنی نامزدگی واپس لے سکتے ہیں۔ نائب صدر کا عہدہ 21 جولائی کو اس وقت خالی ہوا جب جگدیپ دھنکھڑ نے مانسون سیشن کے پہلے دن صحت وجوہات کی بنا پر استعفیٰ دے دیا۔

انتخابی عمل کی آئینی حیثیت

نائب صدر کا انتخاب پارلیمنٹ کے دونوں ایوانوں کے اراکین پر مشتمل الیکٹورل کالج کے ذریعے کیا جاتا ہے۔ یہ انتخاب بھارتی آئین کے آرٹیکل 64 اور 68 کی دفعات کے تحت ہوتا ہے، جبکہ صدارتی و نائب صدارتی انتخاب ایکٹ 1952 کے مطابق الیکشن کمیشن اس کا نوٹیفکیشن جاری کرتا ہے۔ آرٹیکل 66(1) کے تحت نائب صدر کا انتخاب سنگل ٹرانسفریبل ووٹ کے ذریعے تناسبی نمائندگی کے نظام سے کیا جاتا ہے اور ووٹنگ خفیہ بیلٹ کے ذریعے ہوتی ہے۔

بھارت ایکسپریس اردو۔