India AI Impact Summit 2026: فرانس کے صدر ایمانویل میکرون نے کی بھارت کی تعریف، بچوں کے لیے سوشل میڈیا پر پابندی لگانے کی اپیل

نئی دہلی: قومی دارالحکومت میں واقع بھارت منڈپم میں منعقدہ انڈیا اے آئی امپیکٹ سمٹ 2026 کے دوران فرانس کے صدر ایمانویل میکرون نے بھارت کی ڈیجیٹل ترقی اور مصنوعی ذہانت کے میدان میں اس کی پیش رفت کو سراہتے ہوئے اسے عالمی سطح پر اے آئی انجینئروں کا مرکز قرار دیا۔ انہوں نے اپنے خطاب میں وزیر اعظم نریندر مودی کی میزبانی اور قیادت کی بھی تعریف کی۔

صدر میکرون نے اپنی تقریر کا آغاز ”نمستے“سے کیا اور کہا کہ اس شاندار شہر اور عظیم ملک میں ان کا استقبال کرنا باعثِ مسرت ہے۔ انہوں نے کہا کہ گزشتہ دس برسوں میں بھارت میں حیرت انگیز تبدیلیاں رونما ہوئی ہیں۔ ایک دہائی قبل ممبئی کا ایک اسٹریٹ وینڈر بینک اکاؤنٹ نہیں کھول سکتا تھا کیونکہ اس کے پاس پتہ یا ضروری دستاویزات موجود نہیں تھیں، مگر آج وہی شخص موبائل فون کے ذریعے فوری ادائیگیاں وصول کر رہا ہے۔ ان کے مطابق یہ تبدیلی ڈیجیٹل شمولیت اور ٹیکنالوجی کے مؤثر استعمال کا نتیجہ ہے۔

فرانسیسی صدر نے کہا کہ بھارت ہر سال لاکھوں اے آئی انجینئروں کو تربیت فراہم کر رہا ہے اور تقریباً پانچ لاکھ انجینئروں کے ساتھ دنیا کی دوسری سب سے بڑی ڈیولپر کمیونٹی رکھتا ہے۔ انہوں نے مزید کہا کہ بھارت نے 1.4 ارب افراد کے لیے ڈیجیٹل شناختی نظام قائم کیا، ایسا ادائیگی کا نظام تیار کیا جو ہر ماہ 20 ارب لین دین انجام دیتا ہے اور ایک صحت کا بنیادی ڈھانچہ تشکیل دیا جس کے تحت 50 کروڑ ڈیجیٹل ہیلتھ آئی ڈیز جاری کی جا چکی ہیں۔ انہوں نے اس ماڈل کو ”انڈیا اسٹیک اوپن انٹرآپریبل سوورن“ قرار دیتے ہوئے کہا کہ دنیا کو اس سے سیکھنے کی ضرورت ہے۔

سمٹ کے دوران صدر میکرون نے وزیر اعظم مودی سے ایک اہم اپیل بھی کی۔ انہوں نے کہا کہ فرانس میں 15 سال سے کم عمر بچوں کے لیے سوشل میڈیا کے استعمال پر پابندی عائد کی جا چکی ہے اور امید ظاہر کی کہ بھارت بھی اسی سمت میں پیش رفت کرے گا۔ ان کا کہنا تھا کہ کم عمر بچوں کے تحفظ اور ذہنی صحت کے پیش نظر اس طرح کے اقدامات وقت کی ضرورت ہیں۔ انڈیا اے آئی امپیکٹ سمٹ 2026 میں دنیا بھر سے سربراہانِ مملکت، پالیسی ساز، صنعت کار اور ماہرین شریک ہیں۔ یہ اجلاس مصنوعی ذہانت کے مستقبل، عالمی تعاون اور ذمہ دارانہ ٹیکنالوجی کے فروغ کے لیے ایک اہم پلیٹ فارم فراہم کر رہا ہے۔

بھارت ایکسپریس اردو۔