Congress on 11 Years of Modi Government: ’’گزشتہ 11 برسوں میں ملک کی جمہوریت، معیشت اور سماجی تانے بانے کو کیا گیا ہے تباہ‘‘، کانگریس نے مودی حکومت کو بنایا نشانہ

کانگریس نے پیر کے روز مودی حکومت کے گیارہ سال مکمل ہونے کے موقع پر اسے سخت تنقید کا نشانہ بنایا ہے۔ کانگریس نے کہا کہ مودی حکومت نے گزشتہ 11 سالوں میں ملک کی جمہوریت، معیشت اور سماجی تانے بانے کو گہرا دھچکا پہنچایا ہے۔ سوشل میڈیا پلیٹ فارم ’ایکس‘ پر ایک پوسٹ میں کانگریس صدر ملکارجن کھڑگے نے الزام لگایا کہ حکومت نے ان 11 سالوں میں آئین کے ہر صفحے پر صرف ’’آمریت کی سیاہی‘‘ ہی ڈالی ہے۔

گزشتہ گیارہ سالوں میں صرف خوف پھیلانے کی ہوئی ہے کوشش: ملکارجن کھڑگے

انھوں نے کہا کہ بی جے پی-آر ایس ایس نے ہر آئینی ادارے کو کمزور کیا ہے اور ان کی خود مختاری پر حملہ کیا ہے۔ کھڑگے نے مزید کہا کہ ’’چاہے یہ رائے عامہ کے خلاف ہو اور پچھلے دروازے سے حکومتوں کو گرانا ہو یا زبردستی یک جماعتی آمریت مسلط کرنا ہو، اس عرصے کے دوران، ریاستوں کے حقوق کو نظر انداز کیا گیا ہے اور وفاقی ڈھانچہ کمزور ہوا ہے۔۔۔نفرت، دھمکیوں اور خوف کا ماحول پھیلانے کی بھی مسلسل کوششیں کی جا رہی ہیں۔‘‘

کانگریس صدر نے پوسٹ میں لکھا کہ ’’دلتوں، قبائلیوں، پسماندہ، اقلیتوں اور کمزور طبقات کے استحصال میں مسلسل اضافہ ہوا ہے۔ انھیں ریزرویشن اور مساوی حقوق سے محروم کرنے کی سازش جاری ہے۔ منی پور میں نہ ختم ہونے والا تشدد بی جے پی کی انتظامی ناکامی کا سب سے بڑا ثبوت ہے۔‘‘

گزشتہ گیارہ برسوں میں کروڑوں لوگوں کا مستقبل تباہ ہوا: کھڑگے

وہیں کانگریس سربراہ نے دعویٰ کیا کہ بی جے پی-آر ایس ایس نے ملک کی جی ڈی پی کی شرح نمو کو 5-6 فیصد پر رکھنے کی عادت بنا لی ہے، جو یو پی اے کے دوران اوسطاً 8 فیصد تھی۔ انھوں نے کہا ’’سالانہ 2 کروڑ نوکریوں کے وعدے کو پورا کرنے کے بجائے، نوجوانوں سے کروڑوں نوکریاں چھین لی گئیں۔ مہنگائی کی وجہ سے عوامی بچت 50 سالوں میں سب سے کم ہو گئی ہے اور معاشی عدم مساوات 100 سالوں میں سب سے زیادہ ہو گئی ہے۔‘‘ کھڑگے نے دعویٰ کیا کہ نوٹ بندی، غلط جی ایس ٹی، غیر منصوبہ بند لاک ڈاؤن اور غیر منظم شعبے کو نقصان نے کروڑوں لوگوں کا مستقبل تباہ کر دیا ہے۔

انھوں نے الزام لگایا کہ میک ان انڈیا، اسٹارٹ اپ انڈیا، اسٹینڈ اپ انڈیا، ڈیجیٹل انڈیا، نمامی گنگے اور 100 اسمارٹ سٹی جیسے پروگرام ناکام ہو چکے ہیں۔ گھڑے نے مزید کہا ’’ریلوے کو برباد کر دیا گیا ہے، صرف اس بنیادی ڈھانچے کے ربن کو کاٹا گیا ہے جسے کانگریس-یو پی اے نے بڑی محنت سے بنایا تھا۔ مودی حکومت نے آئین کے ہر صفحے پر آمریت کی سیاہی بکھیرنے میں گزشتہ 11 سال ضائع کردیئے ہیں۔‘‘

بی جے پی نے گنوائیں حکومت کی کامیابیاں

واضح رہے کہ بی جے پی حکومت اپنے دورِ اقتدار کے گیارہ سال مکمل ہونے کا جشن منا رہی ہے۔ وزیر اعظم مودی نے پیر کے روز زور دے کر کہا کہ ان کی حکومت کے تحت ہندوستان نہ صرف سب سے تیزی سے ترقی کرنے والی بڑی معیشت بن گیا ہے بلکہ آب و ہوا کی کارروائی اور ڈیجیٹل اختراع جیسے اہم مسائل پر ایک اہم عالمی آواز کا درجہ بھی حاصل کر چکا ہے۔

بھارت ایکسپریس اردو