Amit Shah Jammu and Kashmir Visit: جموں و کشمیر میں امت شاہ کا خطاب، کہا- ’دشمن کے لیے دیوار ہے بی ایس ایف‘، شہیدوں کو پیش کیا خراجِ عقیدت اور جوانوں کو دیا اعزاز

جموں: مرکزی وزیر داخلہ امت شاہ نے جموں و کشمیر کے کٹھوعہ ضلع کے ہرانگر علاقے میں واقع بوبیا بارڈر آؤٹ پوسٹ (بی او پی) کا دورہ کیا، جہاں انہوں نے بارڈر سکیورٹی فورس (بی ایس ایف) کے جوانوں کے حوصلے، قربانی اور غیر متزلزل عزم کو سلام پیش کیا۔ اس موقع پر انہوں نے سرحدی محافظوں کے لیے متعدد فلاحی منصوبوں کا ورچوئل افتتاح اور سنگ بنیاد بھی رکھا۔ بی ایس ایف کے جوانوں سے خطاب کرتے ہوئے امت شاہ نے کہا کہ بی ایس ایف ملک کے لیے ایک مضبوط دیوار کی طرح کھڑی ہے، جو دشمن کی ہر سازش کو ناکام بنانے کی صلاحیت رکھتی ہے۔ انہوں نے کہا کہ جب بھی ملک کی سرحدوں پر دراندازی یا حملے کی کوشش کی گئی، بی ایس ایف نے پوری قوت اور بہادری کے ساتھ اس کا مقابلہ کیا۔ ان کے مطابق بی ایس ایف نے ہر چیلنج میں اپنی پیشہ ورانہ مہارت اور قربانی سے نئی مثالیں قائم کی ہیں۔

مرکزی وزیر داخلہ نے کہا کہ حالیہ برسوں میں انجام دیے گئے مختلف آپریشنز، خصوصاً ’آپریشن سندور‘ کے دوران بی ایس ایف نے جرات اور قربانی کا سنہرا باب رقم کیا۔ انہوں نے کہا کہ یہ فورس نہ صرف دشمن کے ناپاک عزائم کو ناکام بناتی ہے بلکہ ہر محاذ پر ملک کی سلامتی کی ضمانت بھی بنتی ہے۔ امت شاہ نے پنجاب میں آنے والی شدید سیلابی صورتحال کا حوالہ دیتے ہوئے کہا کہ اس مشکل گھڑی میں بھی بی ایس ایف کے جوانوں نے اپنی ذمہ داریوں سے بڑھ کر انسانیت کی خدمت کی۔ انہوں نے بتایا کہ جوانوں نے سرحدی حفاظت کے ساتھ ساتھ سیلاب متاثرین کی مدد کی اور شہریوں کو محفوظ مقامات تک پہنچانے میں اہم کردار ادا کیا۔ ان کے مطابق بی ایس ایف صرف ایک سکیورٹی فورس نہیں بلکہ آفات کے وقت عوام کے لیے ڈھال بھی ہے۔

وزیر داخلہ نے اعلان کیا کہ حکومت بی ایس ایف جوانوں کی فلاح و بہبود کے لیے ایک نئی خصوصی اسکیم لانے جا رہی ہے۔ انہوں نے کہا کہ سرحدی سکیورٹی نظام کو جدید ٹیکنالوجی سے لیس کیا جائے گا اور اس مقصد کے لیے مرکزی حکومت خطیر رقم خرچ کرے گی، تاکہ جوانوں کو بہتر سہولیات، جدید آلات اور محفوظ انفراسٹرکچر فراہم کیا جا سکے۔ اس سے قبل امت شاہ نے بوبیا بی او پی پر قائم شہید اسمارک ’اجے پرہری‘ پر پہنچ کر ملک کی حفاظت میں جان قربان کرنے والے بہادر جوانوں کو خراجِ عقیدت پیش کیا۔ انہوں نے کہا کہ شہداء کی قربانی قوم کے لیے ہمیشہ مشعلِ راہ رہے گی اور ان کا حوصلہ ہر بھارتی کو فخر سے سر بلند کرتا ہے۔

بعد ازاں امت شاہ نے سوشل میڈیا پلیٹ فارم ’ایکس‘ پر بی ایس ایف سے متعلق اپنے تجربات کا ذکر کرتے ہوئے کہا کہ بوبیا آؤٹ پوسٹ کے دورے سے متعلق پوسٹ پر آئے تبصروں سے واضح ہوتا ہے کہ پورا ملک بی ایس ایف کے جوانوں کے جذبے، قربانی اور خدمات کو سلام پیش کرتا ہے۔ انہوں نے کہا کہ یہ عوامی اعتماد ہی جوانوں کی سب سے بڑی طاقت ہے۔ دورے کے اختتام پر وزیر داخلہ نے بتایا کہ وہ ہفتہ کے روز لوک بھون میں جموں و کشمیر میں جاری ترقیاتی منصوبوں سے متعلق ایک اعلیٰ سطحی جائزہ میٹنگ کی صدارت بھی کریں گے، جس میں ریاست کی مجموعی ترقی پر غور کیا جائے گا۔

بھارت ایکسپریس اردو۔