IMD Weather Alert: یہ تو بس ٹریلر ہے، اصل تصویر ابھی باقی ہے…! خلیجِ بنگال سے راجستھان تک پھیلی مانسونی ٹرف، آئندہ 48 گھنٹوں تک موسم ڈھائے گا قہر

ملک بھر میں مانسون نے اس وقت شدید تباہی مچا رکھی ہے۔ دہلی-این سی آر سے لے کر ممبئی اور سورت تک سڑکیں زیرِ آب آچکی ہیں، جبکہ ندی نالے اور دریا طغیانی پر ہیں۔ تاہم محکمۂ موسمیات کے مطابق موجودہ صورتحال محض آغاز ہے اور آئندہ 48 گھنٹوں کے دوران کئی ریاستوں میں مزید شدید بارش، تیز ہوائیں اور خراب موسم دیکھنے کو مل سکتا ہے۔بھارتی محکمۂ موسمیات (آئی ایم ڈی) کے تازہ بلیٹن کے مطابق خلیجِ بنگال سے شمال مغربی راجستھان تک مانسونی ٹرف فعال ہے۔ اس کے علاوہ شمال مغربی مدھیہ پردیش اور جنوب مغربی اتر پردیش کے اوپر کم دباؤ کا ایک مضبوط نظام (لو پریشر سسٹم) بھی سرگرم ہو گیا ہے، جس کے باعث ملک کی تقریباً 18 ریاستوں میں شدید بارش کا امکان ہے۔

دہلی اور این سی آر میں بارش کا اورینج الرٹ

دہلی اور این سی آر کے لیے محکمۂ موسمیات نے اورنج الرٹ جاری کیا ہے۔ دہلی، نوئیڈا، غازی آباد، گروگرام اور فرید آباد میں موسلا دھار سے انتہائی موسلا دھار بارش، گرج چمک اور تیز ہواؤں کی پیش گوئی کی گئی ہے۔ بعض علاقوں میں ہوا کی رفتار 70 کلومیٹر فی گھنٹہ تک پہنچ سکتی ہے، جس سے درخت گرنے، بجلی کی فراہمی متاثر ہونے اور نشیبی علاقوں میں پانی بھرنے کا خدشہ ہے۔ انتظامیہ نے غیر ضروری طور پر گھروں سے باہر نہ نکلنے کی اپیل کی ہے۔

یوپی- بہار میں  برس سکتی ہے مشکلات میں اضافہ کرنے والی بارش

اتر پردیش اور بہار میں بھی موسمی صورتحال تشویشناک بنی ہوئی ہے۔ میرٹھ، آگرہ، مظفر نگر، کانپور، لکھنؤ، بجنور اور اعظم گڑھ سمیت کئی اضلاع میں تیز آندھی، موسلا دھار بارش اور بعض مقامات پر ژالہ باری کی پیش گوئی کی گئی ہے۔ مسلسل بارش کے باعث فصلوں کو نقصان پہنچنے کا اندیشہ ظاہر کیا گیا ہے۔بہار کے گیا، پٹنہ، مشرقی و مغربی چمپارن، مظفرپور اور سمستی پور میں آسمانی بجلی گرنے کا شدید خطرہ ہے۔ گنگا اور اس کی معاون ندیوں کے پانی کی سطح میں مسلسل اضافہ ہو رہا ہے، جس کے باعث کئی اضلاع میں سیلاب کا خدشہ پیدا ہو گیا ہے اور مقامی انتظامیہ کو ہائی الرٹ پر رہنے کی ہدایت دی گئی ہے۔مدھیہ پردیش اور راجستھان میں بھی کم دباؤ کا یہ نظام شدید بارش کا سبب بن سکتا ہے۔ بھوپال، اندور، گوالیار، ساگر اور اجین میں کئی ڈیموں کے گیٹ کھولنے کی نوبت آ سکتی ہے، جبکہ کسانوں کو کھیتوں سے پانی نکالنے کے مناسب انتظامات کرنے کا مشورہ دیا گیا ہے۔راجستھان کے جے پور، اجمیر، ادے پور، جودھ پور اور کوٹا میں تیز آندھی کے ساتھ موسلا دھار بارش کی پیش گوئی کی گئی ہے، جس سے کچے مکانات کو نقصان پہنچنے کا خدشہ ہے۔ دوسری جانب پنجاب اور ہریانہ میں شدید گرمی اور حبس کے بعد بارش سے موسم خوشگوار ہونے کی امید ہے۔

ممبئی سے لیکر کیرل تک سمندر میں ہائی الرٹ

پہاڑی اور ساحلی علاقوں میں بھی خطرات برقرار ہیں۔ اتراکھنڈ میں رشی کیش، ہری دوار اور نینی تال میں لینڈ سلائیڈنگ اور بادل پھٹنے کے خدشے کے پیش نظر احتیاط برتی جا رہی ہے، جبکہ ہماچل پردیش کے منالی، کلو اور شملہ میں پہاڑی سڑکوں پر ملبہ گرنے کے واقعات سامنے آ رہے ہیں۔ جنوبی بھارت میں کیرالہ کے ملاپورم، کوژیکوڈ اور وائناڈ کے لیے اورنج الرٹ جاری کیا گیا ہے۔ ادھر ممبئی، پونے اور کونکن خطے میں مسلسل بارش سے معمولاتِ زندگی متاثر ہیں۔ سمندر میں اونچی لہریں اٹھنے کے باعث ماہی گیروں کو گہرے سمندر میں جانے سے روک دیا گیا ہے۔

بھارت ایکسپریس اردو۔