If we come to power at the center, we will ban RSS: مرکز میں کانگریس کی حکومت بنے گی تو آر ایس ایس پر ملک بھر میں پابندی لگادی جائے گی:پرینک کھرگے

کانگریس صدر ملکارجن کھرگے کے بیٹے اور کرناٹک حکومت میں وزیر پرینک کھرگے نے اعلان کیا ہے کہ اگر کانگریس دوبارہ مرکز میں برسراقتدار آتی ہے تو راشٹریہ سویم سیوک سنگھ (آر ایس ایس) پر ملک بھر میں پابندی عائد کردی جائے گی۔ کانگریس کے سینئر لیڈر اور لوک سبھا میں اپوزیشن لیڈر راہل گاندھی مسلسل آر ایس ایس پر تنقید کر رہے ہیں اور اس تنظیم پر ملک کو تقسیم کرنے کا الزام لگایا ہے۔ لیکن پرینک کھرگے نے آر ایس ایس پر ملک گیر پابندی کی بات کرکے ایک نئی بحث شروع کردی ہے۔

انہوں نے کہا کہ ملک میں نفرت کون پھیلا رہا ہے، فرقہ وارانہ تشدد کا ذمہ دار کون ہے، آئین کو تبدیل کرنے کی بات کون کر رہا ہے۔ پرینک کھرگے نے کہا کہ آر ایس ایس اپنے سیاسی ونگ بی جے پی سے اہم سوالات کیوں نہیں پوچھتی جیسے ملک میں بے روزگاری کیوں بڑھ رہی ہے، پہلگام میں دہشت گرد حملہ کیسے ہوا؟ یہ نہ پوچھ کر سنگھ کے لوگ سماج میں نفرت پھیلا رہے ہیں۔ انہوں نے کہا کہ اقتدار میں آنے کے بعد قانونی عمل کے تحت آر ایس ایس پر ملک میں پابندی لگائی جائے گی۔

کرناٹک حکومت کے  وزیر پرینک نے کہا کہ کیا ای ڈی، آئی ٹی جیسی تمام تحقیقاتی ایجنسیاں صرف اپوزیشن کے لیے ہیں، حکومت آر ایس ایس کی تحقیقات کیوں نہیں کرتی، ان کا پیسہ کہاں سے آرہا ہے، ان کی آمدنی کا ذریعہ کیا ہے۔ پرینک کھرگے نے کہا کہ سنگھ کے لوگ ہر بار نفرت انگیز تقریر اور آئین کو بدلنے کی بات کرکے کیسے بچ جاتے ہیں، معاشی جرائم کرنے کے بعد کیسے بچ جاتے ہیں، ان تمام معاملات کی تحقیقات ہونی چاہیے۔

دراصل، پرینک کھرگے نے بی جے پی ایم پی تیجسوی سوریا کو جواب دیتے ہوئے ایکس پر پوسٹ کیا تھا، جس میں سوریا نے ملکارجن کھرگے سے کانگریس ہائی کمان کے بارے میں سوال کیا تھا۔ پرینک نے پوچھاکہ بی جے پی کی ہائی کمان کون ہے؟ آپ کے زیادہ تر کارکن آپ کی قومی پارٹی کے صدر کا نام تک نہیں بتا سکتے، ان کے لیے مودی صدر، وزیر اعظم اور شاید پنچایت سیکرٹری تینوں ہیں۔

پرینک کھرگے نے کہاکہ جب صورتحال مشکل ہو جاتی ہے تو وزیر اعظم پارلیمنٹ نہیں جاتے، بلکہ آر ایس ایس کو رپورٹ کرنے ناگپور جاتے ہیں۔انہوں نے تیجسوی سوریا کو چیلنج کرتے ہوئے کہاکہ میں آپ کو چیلنج کرتا ہوں کہ آپ اسے اونچی آواز میں کہیں – مجھے آر ایس ایس کی ضرورت نہیں ہے، میں الیکشن جیت سکتا ہوں کیونکہ مودی جی اور نڈا جی میری واحد ہائی کمان ہیں، اب اور ہمیشہ۔یہ پہلا موقع نہیں ہے جب پرینک کھرگے نے ایسا بیان دیا ہو۔ دو سال قبل بھی کرناٹک کے تناظر میں انہوں نے کہا تھا کہ اگر کوئی تنظیم ریاست میں امن کو خراب کرنے یا فرقہ وارانہ ماحول کو خراب کرنے کی کوشش کرتی ہے تو حکومت اس پر پابندی لگانے سے بالکل نہیں ہچکچائے گی۔ کانگریس نے کرناٹک میں اپنے منشور میں کہا تھا کہ ریاست میں اقتدار میں آتے ہی وہ ذات پات اور مذہب کی بنیاد پر برادریوں کے درمیان نفرت پھیلانے والی تمام تنظیموں پر پابندی عائد کر دے گی، بشمول بجرنگ دل، پی ایف آئی۔

پرینک کھرگے نے اس منشور پر کہا تھا کہ ہم صرف قانون کے مطابق اور قانون توڑنے والوں کے خلاف کارروائی کرنے جا رہے ہیں۔ جب پرینک سے پوچھا گیا کہ کیا حکومت آر ایس ایس اور بجرنگ دل پر بھی پابندی لگائے گی؟ تو اس پر انہوں نے کہا، ‘جو بھی تنظیم یا شخص امن کو خراب کرنے کی کوشش کرے گا اس کے خلاف کارروائی کی جائے گی۔

بھارت ایکسپریس۔