Acharya Pramod Krishnam: ’’اگر راہل گاندھی پاکستان سے الیکشن لڑیں گے تو بہت ووٹوں سے جیتیں گے‘‘، آچاریہ پرمود کرشنم نے پھر سادھا کانگریس لیڈر پر نشانہ

آچاریہ پرمود کرشنم نے ہفتہ کے روز اپوزیشن لیڈر راہل گاندھی پر حملہ کرتے ہوئے دعویٰ کیا کہ وہ پاکستان میں بے حد مقبول ہیں اور اگر وہ کبھی وہاں الیکشن لڑتے ہیں تو زبردست جیت حاصل کریں گے۔ آچاریہ پرمود کرشنم کا یہ تبصرہ پاکستان میں راہل گاندھی کے کچھ ویڈیوز وائرل ہونے کے بعد آیا ہے۔

آئی اے این ایس سے بات کرتے ہوئے آچاریہ پرمود کرشنم نے کہا ’’اگر راہل گاندھی پاکستان سے الیکشن لڑتے ہیں تو وہ زبردست اکثریت سے جیتیں گے۔ راہل گاندھی کو ہندوستانی لیڈروں یا اداروں کے بیانات پر بھروسہ نہیں ہے۔،جب ہندوستانی فوج کہتی ہے کہ اس نے پاکستان کو منہ توڑ جواب دیا ہے تو راہل گاندھی ثبوت مانگتے ہیں، لیکن اگر پاکستان کا کوئی لیڈر کچھ کہتا ہے تو وہ فوراً اس پر یقین کر لیتے ہیں۔ یہی وجہ ہے کہ پاکستان کے لوگ ان سے بہت محبت کرتے ہیں اور ایسا لگتا ہے کہ راہل گاندھی کو بھی پاکستان سے لگاؤ ہے۔‘‘

آچاریہ پرمود کرشنم نے مزید کہا کہ راہل گاندھی نے ہندوستانی فوج، پارلیمنٹ اور آئین پر سوال اٹھانا اپنی عادت بنالی ہے۔ انھوں نے کہا ’’جب کوئی بچہ بھٹک جاتا ہے تو عام طور پر اصلاح کی امید ہوتی ہے۔ لیکن راہل گاندھی، اتنے بڑے خاندان سے آنے کے باوجود، مکمل طور پر بگڑے ہوئے نظر آتے ہیں۔ مجھے ان کے سدھرنے کا کوئی امکان نظر نہیں آتا۔ پھر بھی میں انھیں مشورہ دیتا ہوں کہ وہ ملک کے خلاف بات نہ کریں۔‘‘

اس کے علاوہ وزیر اعظم نریندر مودی کا سابق وزیر اعظم اندرا گاندھی سے موازنہ کرنے والے کانگریس لیڈروں پر تبصرہ کرتے ہوئے آچاریہ کرشنم نے کہا ’’اندرا گاندھی ایک بہت مقبول لیڈر تھیں، جنھوں نے پاکستان کو سبق سکھایا۔ لیکن اس ملک کو نریندر مودی جیسا وزیر اعظم کبھی نہیں ملا۔ آج ہندوستان ان کی وجہ سے عالمی احترام کا مالک ہے۔‘‘