U.S.-India partnership in Bengaluru: امریکہ کی آزادی کے 250 سال کا جشن، ٹرمپ کی سوچ لے کر آیا ہوں، امریکی سفیر سرجیو گور نے بنگلورو میں کیا کچھ کہا؟

نئی دہلی : امریکہ کی آزادی کے 250 سال مکمل ہونے کے موقع پر کرناٹک کی راجدھانی بنگلورو میں ایک شاندار تقریب کا انعقاد کیا گیا۔ اس تقریب میں ریاست کے وزیر اعلیٰ ڈی کے شیوکمار کے ساتھ بھارت میں امریکی سفیر سرجیو گور بھی شریک ہوئے۔بنگلورو میں تقریب سے خطاب کرتے ہوئے امریکی سفیر سرجیو گور نے کہا کہ امریکہ کی آزادی کے 250 سال مکمل ہونا یقیناً جشن منانے کا موقع ہے، لیکن صدر ڈونالڈ ٹرمپ نے انہیں ماضی کی طرف دیکھنے کے لیے بھارت نہیں بھیجا ہے۔ انہوں نے کہا، ’’صدر ٹرمپ نے مجھے یہاں کام مکمل کرنے اور مستقبل کی طرف دیکھنے کے لیے بھیجا ہے۔‘‘گور نے کہا کہ ان کی توجہ اس بات پر ہے کہ امریکہ اور بھارت کے عام لوگوں کے لیے حقیقی نتائج سامنے آئیں اور دونوں ممالک کو باہمی تعاون سے فائدہ حاصل ہو۔

گور نے بنگلورو کی تعریف کی

بھارت میں امریکی سفیر سرجیو گور نے بنگلورو کی تعریف کرتے ہوئے کہا کہ اس موضوع پربات کرنے کے لیے بنگلورو سے بہتر جگہ کوئی نہیں ہوسکتی، کیونکہ یہ شہر کام کرتا ہے، چیزیں بناتا ہے اور کام کو انجام تک پہنچاتا ہے۔ انہوں نے کہا کہ بنگلورو انتظار کرنے والا شہر نہیں ہے اور یہاں کی انتظامیہ بھی اسی جذبے کے ساتھ کام کرتی ہے۔گور نے مزید کہا کہ یہی جذبہ صدر ڈونالڈ ٹرمپ امریکہ اور بھارت کے تعلقات میں لے کر آئے ہیں۔

بھارت-امریکہ تعلقات پر کیا کہا؟

تقریب سے خطاب کرتے ہوئے گور نے کہا کہ ایک سفیر کی حیثیت سے انہوں نے بھی ہر روز اسی جذبے کو آگے بڑھانے کی کوشش کی ہے۔ انہوں نے کہا کہ ہر ہفتے دونوں ممالک کے لیے فائدہ مند حالات، یعنی ’ون-ون سچویشنز‘ کی مثالیں تلاش کرنے کی کوشش کی جاتی ہے۔انہوں نے کہا کہ انہیں TRUST فیلوشپ شروع کرنے میں مدد کرنے پر فخر ہے۔ امریکی سفیر کے مطابق یہ ایک نئی شراکت داری ہے، جس کے تحت امریکہ اور بھارت کے اعلیٰ سطح کے محققین کو ایک ساتھ لایا جارہا ہے، تاکہ وہ ان ٹیکنالوجیز پر کام کرسکیں جو اس صدی کی سمت متعین کریں گی۔انہوں نے ان شعبوں میں مصنوعی ذہانت (AI)، سیمی کنڈکٹر، کوانٹم ٹیکنالوجی اور بایوٹیکنالوجی کا ذکر کیا۔

ڈی کے شیوکمار سے ملاقات

سرجیو گور نے کرناٹک کے وزیر اعلیٰ ڈی کے شیوکمار سے بھی ملاقات کی۔ انہوں نے کہا کہ کرناٹک میں بھارت اور امریکہ کے تعلقات تیزی سے آگے بڑھ رہے ہیں۔ اس دوران انہوں نے خلائی ٹیکنالوجی، مصنوعی ذہانت (AI) اور کاروباری شعبوں میں تعاون کا ذکر کیا۔گور نے کہا کہ Pax Silica اور TRUST جیسی پہل کے ذریعے امریکی اور بھارتی صنعتوں کے لیے نئے مواقع پیدا کیے جارہے ہیں۔ انہوں نے کہا کہ دونوں ممالک کے درمیان شراکت داری کا مقصد ایسے حقیقی مواقع پیدا کرنا ہے جن سے امریکہ اور بھارت، دونوں کو فائدہ پہنچے۔

بھارت ایکسپریس اردو