PM Modi 25 Years Public Service: ’اقتدار کو خدمت میں بدلا‘، وزیر اعظم نریندر مودی کے 25 سالہ دور اقتدار پر ہماچل پردیش بی جے پی نے کیا اظہار تشکر

متفقہ طور پر جامع سیاسی قرارداد منظور

اجلاس کی خاص بات وزیر اعظم نریندر مودی کے دور حکمرانی کے ڈھائی دہائیاں مکمل ہونے پر پیش کی گئی جامع سیاسی قرارداد تھی۔ پارٹی نے متفقہ طور پر ’25 سال خدمت، اچھی حکمرانی اور لگن: قوم سب سے پہلے سے ترقی یافتہ بھارت تک‘ کے عنوان سے قرارداد منظور کی۔ اس قرارداد کے ذریعے ریاستی بی جے پی نے وزیر اعظم کی دور اندیش قیادت، عوامی خدمت کے تئیں غیر متزلزل عزم، اچھی حکمرانی کے لیے ان کی وابستگی اور غریبوں کی فلاح و بہبود کے لیے اٹھائے گئے تاریخی اقدامات کی بھرپور ستائش کی۔ پارٹی لیڈروں نے وزیر اعظم کی اچھی صحت، درازی عمر اور ملک کی خدمت کا سلسلہ جاری رکھنے کے لیے نیک خواہشات کا بھی اظہار کیا۔

اقتدار کو خدمت اور عوامی ذمہ داری کا ذریعہ بنایا

میڈیا سے گفتگو کرتے ہوئے ریاستی صدر ڈاکٹر راجیو بندل نے یاد دلایا کہ وزیر اعظم مودی نے اپنے اس تاریخی انتظامی سفر کا آغاز 7 اکتوبر 2001 کو گجرات کے وزیر اعلیٰ کی حیثیت سے کیا تھا۔ 7 اکتوبر 2026 کو اس سفر کے 25 سال مکمل ہوگئے۔ انہوں نے کہا کہ گجرات میں 12 سال سے زیادہ عرصہ گزارنے اور ملک کے وزیر اعظم کے طور پر ایک دہائی سے زیادہ وقت تک خدمات انجام دینے کے باوجود نریندر مودی نے ہمیشہ ذاتی اور سیاسی مفادات سے بالاتر ہوکر قومی مفاد کو ترجیح دی ہے۔ ڈاکٹر بندل نے مزید کہا کہ یہ 25 سال محض کسی سرکاری عہدے پر فائز رہنے کی مدت نہیں، بلکہ اس بات کا ثبوت ہیں کہ حکمرانی کو عوامی خدمت کا سب سے بڑا ذریعہ کیسے بنایا جاسکتا ہے۔ انہوں نے کہا کہ وزیر اعظم نے ثابت کیا ہے کہ اقتدار کو خدمت، عوامی عہدے کو بڑی ذمہ داری اور سرکاری پالیسیوں کو ٹھوس نتائج میں کیسے بدلا جاسکتا ہے۔ آخر میں انہوں نے کہا کہ پی ایم مودی کا وژن صرف فلاحی اسکیموں تک محدود نہیں، بلکہ اس کا مرکز ہر غریب اور محروم شخص کی زندگی میں مثبت تبدیلی لانا ہے۔

بھارت ایکسپریس اردو۔