Highway blocked due to rain in J&K: جموں و کشمیر میں بارش سے ہائی وے بند، ہزاروں ٹرک پھنسے، ڈرائیوروں نے بنیادی سہولیات کا کیا مطالبہ

جموں: جموں و کشمیر میں گزشتہ 15 دنوں سے مسلسل ہو رہی موسلا دھار بارش نے قومی شاہراہ کو بری طرح متاثر کر دیا ہے۔ اس کے نتیجے میں ہزاروں ٹرک ہائی وے پر قطار میں پھنسے ہوئے ہیں اور ڈرائیوروں کو شدید پریشانیوں کا سامنا کرنا پڑ رہا ہے۔

خبر رساں ایجنسی آئی اے این ایس سے گفتگو کرتے ہوئے ایک ڈرائیور نے کہا، ’’گزشتہ 15 دنوں سے ہمیں ہائی وے کی صورتحال کے بارے میں کوئی اطلاع نہیں دی جا رہی ہے۔ ہمارے پاس جو تھوڑے بہت پیسے اور راشن تھا، وہ ختم ہو چکا ہے۔‘‘

ڈرائیوروں نے شکایت کی کہ ہائی وے پر بیت الخلاء، پانی اور دیگر بنیادی سہولیات کا فقدان ہے۔ ایک ڈرائیور نے کہا، ’’جو کپڑے ہم نے 15 دن پہلے پہنے تھے، اب بھی وہی پہنے ہوئے ہیں۔ ہم امید کر رہے ہیں کہ انتظامیہ جلد ہی ہائی وے کو درست کرے تاکہ ہم عام زندگی جی سکیں۔‘‘

ڈرائیوروں نے پولیس پر لگائے سنگین الزامات

ڈرائیوروں نے جموں و کشمیر حکومت سے مطالبہ کیا ہے کہ قومی شاہراہ کو فوری طور پر درست اور بحال کیا جائے۔ کچھ ڈرائیوروں نے پولیس پر سنگین الزامات بھی لگائے ہیں۔ ان کا کہنا ہے کہ پولیس اہلکار پیسے لے کر کچھ گاڑیوں کو آگے جانے کی اجازت دے رہے ہیں جبکہ باقی گاڑیوں کو طویل وقت تک انتظار کرنا پڑ رہا ہے۔ وہیں، جموں ٹریفک ڈپارٹمنٹ کے ایس ایس پی فاروق قیصر نے کہا کہ یہ ایک بحرانی صورتحال ہے۔ ہائی وے شاذ و نادر ہی اس طرح بند رہا ہے۔ اس وقت مسلسل کام ہو رہا ہے لیکن کچھ چیزیں ہمارے ہاتھ میں نہیں ہیں۔

جلد ہی ٹریفک کے لیے ہائی وے کھلنے کی امید

ایس ایس پی نے کہا کہ کبھی بارش ہو رہی ہے تو کبھی زمین تھوڑی گاڑیاں چلنے کے بعد دھنس جا رہی ہے۔ اس وجہ سے ٹریفک ڈپارٹمنٹ اور نیشنل ہائی وے اتھارٹی آف انڈیا (این ایچ اے آئی) ہائی وے کو بحال کرنے کے لیے دن رات کام کر رہے ہیں۔ انہوں نے امید ظاہر کی کہ جلد ہی ہائی وے ٹریفک کے لیے کھول دیا جائے گا۔

ٹریفک ڈپارٹمنٹ سے جانکاری لینے کی اپیل

ایس ایس پی نے کہا، ’’یہ شاہراہ کشمیر کو ملک کے دیگر حصوں سے جوڑنے والا واحد راستہ ہے۔ ہم مسلسل اس سمت میں کام کر رہے ہیں۔‘‘ انہوں نے ٹرانسپورٹروں اور ڈرائیوروں سے اپیل کی کہ وہ کوئی خطرناک قدم نہ اٹھائیں اور سفر سے پہلے ٹریفک ڈپارٹمنٹ سے ہائی وے کی صورتحال کی معلومات ضرور حاصل کریں۔

بھارت ایکسپریس۔