Gitanjali J Angmo: میری اجازت کے بغیر سونم وانگچک کا کوئی علاج نہ کیا جائے!اہلیہ گیتانجلی انگمو کامطالبہ

نئی دہلی: لداخ کے معروف سماجی کارکن اور ماحولیاتی مصلح سونم وانگچک، جو دہلی کے جنتر منتر پر غیر معینہ مدت کی بھوک ہڑتال پر تھے، انہیں ہفتہ کی صبح طبیعت بگڑنے کے بعد صفدر جنگ اسپتال منتقل کر دیا گیا۔ ان کی بھوک ہڑتال کا یہ اکیسواں دن تھا۔ اسپتال کے اندر اور باہر سخت سکیورٹی انتظامات کیے گئے ہیں اور دہلی پولیس کی بھاری نفری تعینات کر دی گئی ہے تاکہ کسی بھی ناخوشگوار صورتحال سے نمٹا جا سکے۔

آئی اے این ایس کے مطابق، دہلی پولیس نے دہلی ہائی کورٹ کے احکامات اور طبی ماہرین کے مشورے کی بنیاد پر سونم وانگچک کو جنتر منتر سے اسپتال منتقل کیا۔ پولیس کا کہنا ہے کہ وانگچک کی صحت مسلسل خراب ہو رہی تھی، اس لیے انہیں فوری طبی نگرانی میں رکھنا ضروری تھا۔ادھر سونم وانگچک کی اہلیہ گیتانجلی انگمو بھی صفدر جنگ اسپتال پہنچ گئیں۔ انہوں نے سوشل میڈیا پلیٹ فارم “ایکس” پر ایک بیان جاری کرتے ہوئے کہا کہ ان کی، خاندان کی اور گزشتہ بیس دنوں سے وانگچک کی نگرانی کرنے والے ڈاکٹروں کی اجازت کے بغیر انہیں نہ منہ کے ذریعے اور نہ ہی رگ کے ذریعے کوئی دوا یا غذائی محلول دیا جائے۔ ان کا کہنا تھا کہ علاج سے متعلق ہر فیصلہ متعلقہ معالجین اور اہل خانہ کی رضامندی سے ہونا چاہیے۔

I am at Safdarjung hospital in Delhi where @Wangchuk66 has been admitted. Nothing should be administered to him orally or intravenous without take consent from me, his family and his doctors who have been monitoring his health for the past 20 days.

— Gitanjali J Angmo (@GitanjaliAngmo) July 18, 2026

سونم وانگچک کو اسپتال منتقل کیے جانے کے دوران احتجاجی مقام پر موجود مظاہرین نے شدید مخالفت کی۔ اس دوران پولیس اور مظاہرین کے درمیان معمولی دھکم پیل بھی ہوئی اور حکومت و پولیس انتظامیہ کے خلاف نعرے بازی کی گئی۔ تاہم پولیس نے سونم وانگچک کو ہجوم کے درمیان سے محفوظ طریقے سے ایمبولینس تک پہنچایا اور انہیں اسپتال منتقل کر دیا۔دہلی پولیس نے اپنے سرکاری بیان میں کہا کہ ہائی کورٹ کے احکامات پر عمل کرتے ہوئے اور طبی ماہرین کی سفارشات کی روشنی میں یہ قدم اٹھایا گیا۔ پولیس کے مطابق بعض مظاہرین نے کارروائی میں رکاوٹ ڈالنے کی کوشش کی، جس سے کچھ دیر کے لیے افراتفری کا ماحول پیدا ہوا، تاہم اہلکاروں نے تحمل کا مظاہرہ کرتے ہوئے پوری کارروائی پرامن انداز میں مکمل کی۔ پولیس نے جنتر منتر پر موجود مظاہرین سے بھی اپیل کی ہے کہ وہ پرامن طریقے سے احتجاج ختم کرکے مقام خالی کر دیں۔

نئی دہلی کے ڈپٹی کمشنر آف پولیس (ڈی سی پی) سچن شرما نے میڈیا سے گفتگو کرتے ہوئے کہا کہ سونم وانگچک کو عدالت کے احکامات، طبی مشورے اور ان کی بگڑتی ہوئی صحت کے پیش نظر سرکاری اسپتال منتقل کیا گیا ہے۔ ان کے مطابق وانگچک اس وقت ڈاکٹروں کی مسلسل نگرانی میں ہیں اور ان کی صحت پر نظر رکھی جا رہی ہے۔ اسپتال کے باہر سکیورٹی مزید سخت کر دی گئی ہے تاکہ کسی بھی غیر متوقع صورتحال سے نمٹا جا سکے۔

بھارت ایکسپریس اردو