Weather Update Today: کئی ریاستوں میں شدیدبارش کا الرٹ،دہلی میں اگلے5دن بارش کا امکان،پہاڑی علاقوں میں یلوالرٹ

نئی دہلی: مانسون کے اثر سے ملک کے بیشتر حصوں میں موسم کا مزاج بدلا ہوا ہے۔ کئی علاقوں میں موسلادھار بارش کا سلسلہ جاری ہے اور محکمہ موسمیات نے آج اتر پردیش، بہار، مدھیہ پردیش، راجستھان، اتراکھنڈ سمیت کئی ریاستوں میں شدید بارش کا الرٹ جاری کیا ہے۔ جھارکھنڈ کے اوپر بنا نمن دباؤ کا علاقہ اب آہستہ آہستہ مغرب، شمال مغرب کی سمت بڑھ رہا ہے، جس کے اثر سے شمالی ہندوستان سے وسطی ہندوستان، شمال مشرق اور جنوبی ریاستوں میں بارش کی سرگرمی مزید بڑھ سکتی ہے۔ دہلی میں آج ہلکی بارش اور بوندا باندی کا امکان ہے۔ دارالحکومت میں زیادہ سے زیادہ درجہ حرارت 33 ڈگری اور کم سے کم 26 ڈگری سیلسیس کے آس پاس رہ سکتا ہے۔ محکمہ موسمیات کے مطابق 31 اگست تک دہلی میں ہلکی بارش اور بوندا باندی کا سلسلہ جاری رہنے کا امکان ہے۔ تاہم دہلی میں مانسون اب کمزور پڑ رہا ہے اور اگلے 15 دنوں میں شدید بارش کے امکانات کم ہیں۔

یوپی اور بہار میں بارش کا الرٹ

اتر پردیش میں مانسون کی سرگرمی برقرار رہے گی۔ محکمہ موسمیات کے مطابق آج ریاست کے ترائی اور بندیل کھنڈ سمیت مجموعی طور پر 29 اضلاع میں شدید بارش ہوسکتی ہے، جس کے پیش نظر یلو الرٹ جاری کیا گیا ہے۔ بہار کے پورنیہ، جہان آباد، دربھنگہ، بھاگلپور، ویشالی، لکھی سرائے، مدھوبنی، کشن گنج، بیگوسرائے، سیوان اور بکسر میں بارش کے ساتھ آندھی کا الرٹ ہے۔ جھارکھنڈ میں بھی بارش کی سرگرمی بڑھنے کا امکان ہے۔

وسطی اور مغربی ہندوستان میں بھی شدید بارش

راجستھان میں مانسون فی الحال کمزور ہوتا دکھائی نہیں دے رہا۔ ریاست کے کئی اضلاع میں آج بارش کے ساتھ طوفان کا امکان ہے۔ مدھیہ پردیش میں بھی کئی علاقوں کے لیے شدید بارش کی وارننگ جاری کی گئی ہے۔ چھترپور، دتیا، گوالیار، نواڑی، پنّا، ریوا، ستنا، سدھی، سنگرولی اور ٹیکم گڑھ میں بارش کا اثر زیادہ رہ سکتا ہے۔ چھتیس گڑھ کے کچھ حصوں میں بھی شدید بارش کا الرٹ جاری کیا گیا ہے۔ کونکن اور گوا میں 31 اگست تک وسیع پیمانے پر بارش کی پیش گوئی ہے۔ وسطی مہاراشٹر میں آج شدید بارش ہوسکتی ہے، جبکہ ودربھ میں 28 اگست تک کئی مقامات پر بارش کا امکان ہے۔ گجرات اور سوراشٹر، کچھ میں بھی 31 اگست تک بعض مقامات پر بارش ہوسکتی ہے۔

مشرقی اور شمال مشرقی ریاستوں میں بھی بارش جاری

مشرقی ہندوستان میں بھی بارش کا سلسلہ رکنے والا نہیں ہے۔ ذیلی ہمالیائی مغربی بنگال اور سکم میں 28 اگست تک شدید بارش ہوسکتی ہے۔ اوڈیشہ میں کل اور پھر 28 سے 30 اگست کے دوران بارش کی سرگرمی بڑھنے کا امکان ہے۔ اروناچل پردیش میں آج شدید بارش ہوسکتی ہے، جبکہ آسام اور میگھالیہ میں 28 سے 31 اگست کے دوران بارش میں اضافہ ہوسکتا ہے۔ ناگالینڈ، منی پور، میزورم اور تریپورہ میں اگست کے باقی تمام دنوں میں بارش کا امکان برقرار رہے گا۔ وہیں جنوبی ہندوستان میں بھی موسم سرگرم ہے۔ کیرالہ میں آج شدید بارش ہوسکتی ہے۔ ساحلی کرناٹک میں 31 اگست تک وسیع پیمانے پر بارش کی توقع ہے۔ تمل ناڈو، پڈوچیری اور کرائیکل میں آج گرج چمک کے ساتھ تیز ہوائیں چل سکتی ہیں۔

پہاڑی علاقوں میں یلو الرٹ

اتراکھنڈ کے باگیشور، چمپاوت، دہرادون، پتھورا گڑھ، رشی کیش، ہری دوار اور ٹہری گڑھوال میں شدید بارش کی وارننگ جاری کی گئی ہے۔ ہماچل پردیش کے سولن، کانگڑا، اونا، لاہول اسپیتی، منڈی، کلو اور بلاسپور سمیت کئی علاقوں میں بھی تیز بارش ہوسکتی ہے۔ جموں و کشمیر کے ادھم پور، کولگام، اننت ناگ، جموں، مظفرآباد، رام بن، کشتواڑ، بارہمولہ اور راجوری میں بارش کا یلو الرٹ جاری کیا گیا ہے۔ پہاڑی علاقوں میں رہنے والے لوگوں اور سیاحوں کو خراب موسم کے دوران احتیاط برتنے کا مشورہ دیا گیا ہے۔

بھارت ایکسپریس اردو۔