Collision between two trains in Bilaspur: چھتیس گڑھ کے بلاسپور میں خوفناک ٹرین حادثہ — کوربا مسافر ٹرین اور مال گاڑی میں ٹکراؤ، 6 مسافر ہلاک، 15 سے زائد زخمی

چھتیس گڑھ کے بلاسپور ریلوے منڈل میں منگل کی دوپہر ایک بھیانک حادثہ پیش آیا جب کوربا جانے والی مسافر ٹرین کوئلہ سے لدی ایک تیز رفتار مال گاڑی سے ٹکرا گئی۔ ٹکر اتنی شدید تھی کہ پیسنجر ٹرین کے دو ڈبے مکمل طور پر تباہ ہوگئے۔ ابتدائی اطلاعات کے مطابق حادثے میں کم از کم 6 مسافر ہلاک اور 15 سے زائد زخمی ہوگئے۔ زخمیوں کو فوری طور پر بلاسپور کے اسپتال منتقل کیا گیا، جہاں ان کا علاج جاری ہے۔

ریسکیو اور راحت کا کام جاری

حادثے کی اطلاع ملتے ہی ریلوے کے اعلیٰ افسران اور ریسکیو ٹیمیں موقع پر پہنچ گئیں۔ جائے حادثہ پر افرا تفری کا عالم ہے اور ریسکیو اہلکار ملبہ ہٹانے میں مصروف ہیں۔ ریلوے نے میڈیکل یونٹ اور ریلیف ٹرین روانہ کردی ہے تاکہ زخمیوں کو فوری طبی امداد فراہم کی جا سکے۔

بلاسپور میں دونوں ٹرینیں ایک ہی پٹری پر آ گئیں

یہ حادثہ بلاسپور ریلوے اسٹیشن کے قریب پیش آیا، جہاں گیورا سے بلاسپور جا رہی میموٹرین اور بلاسپور سے آنے والی مال گاڑی ایک ہی ٹریک پر آ گئیں اور آمنے سامنے ٹکرا گئیں۔ تصادم اتنا شدید تھا کہ مسافر ٹرین کے کئی ڈبے پٹری سے اتر گئے، جب کہ کچھ حصے مال گاڑی کے اوپر چڑھ گئے۔ حادثے کے بعد علاقے میں افرا تفری مچ گئی اور مقامی لوگ بھی بڑی تعداد میں موقع پر جمع ہو گئے۔

حادثے کی ابتدائی وجہ اور عینی شاہدین کے بیانات

کچھ عینی شاہدین کے مطابق مال گاڑی اچانک بے قابو ہوکر پیسنجر ٹرین سے ٹکرا گئی، جس کے نتیجے میں ٹرین کے انجن میں آگ لگ گئی اور گھنے دھوئیں کے بادل چھا گئے۔ ٹکر کے بعد دونوں ٹرینوں کے کئی ڈبے پٹری سے اتر گئے، جبکہ حادثے کی شدت کے باعث علاقے میں بجلی کی لائن اور سگنل نظام کو بھی شدید نقصان پہنچا ہے۔

ٹرین سروسز متاثر، تحقیقات کے احکامات

حادثے کے بعد بلاسپور–کوربا ریلوے روٹ پر آمد و رفت مکمل طور پر بند کردی گئی ہے۔ کم از کم آٹھ ٹرینوں کو منسوخ کیا گیا ہے، جب کہ کئی دیگر کو متبادل راستوں پر موڑا گیا ہے۔ ریلوے حکام نے واقعے کی تحقیقات کے لیے ایک اعلیٰ سطحی کمیٹی تشکیل دے دی ہے۔

ریاستی حکومت کا ردعمل

چھتیس گڑھ کے وزیراعلیٰ نے حادثے پر گہرے رنج و غم کا اظہار کیا ہے اور متاثرہ خاندانوں کے لیے معاوضے کا اعلان کیا ہے۔ حکومت نے زخمیوں کو بہترین علاج فراہم کرنے کی ہدایت دی ہے، جب کہ ریلوے انتظامیہ نے کہا ہے کہ حادثے کی وجوہات کا مکمل جائزہ لے کر آئندہ ایسے واقعات کی روک تھام کے لیے اقدامات کیے جائیں گے۔

بھارت ایکسپریس اردو۔