Harjinder Kaur Wins Silver: ہرجندر کور نے دولت مشترکہ کھیلوں میں تاریخ رقم کر دی، ویٹ لفٹنگ میں بھارت کو ساتواں میڈل دلا دیا

نئی دہلی : دولتِ مشترکہ کھیل 2026 میں بھارتی ویٹ لفٹرز کی شاندار کارکردگی کا سلسلہ جاری ہے۔ خواتین کے 69 کلوگرام وزن کے زمرے میں بھارت کی اسٹار ویٹ لفٹر ہرجندر کور نے اپنے کیریئر کی بہترین کارکردگی کا مظاہرہ کرتے ہوئے چاندی کا تمغہ اپنے نام کر لیا۔ انہوں نے اس مقابلے میں مجموعی طور پر 227 کلوگرام وزن اٹھا کر پوڈیم پر دوسری پوزیشن حاصل کی اور بھارت کی جھولی میں ویٹ لفٹنگ کا ساتواں تمغہ ڈال دیا۔ہرجندر کور نے مقابلے کا آغاز اسنیچ راؤنڈ میں عمدہ انداز سے کیا۔ انہوں نے اپنے تینوں کامیاب اٹیمپٹس میں بالترتیب 96، 99 اور 101 کلوگرام وزن اٹھایا اور اسنیچ میں 101 کلوگرام کے ساتھ مضبوط بنیاد رکھی۔ اس کے بعد کلین اینڈ جرک راؤنڈ میں بھی انہوں نے غیر معمولی اعتماد کا مظاہرہ کیا۔

کلین اینڈ جرک کے پہلے اٹیمپٹ میں ہرجندر نے 120 کلوگرام، دوسرے میں 123 کلوگرام اور آخری کوشش میں باآسانی 126 کلوگرام وزن اٹھایا، جو ان کے کیریئر کی اب تک کی بہترین کارکردگی ثابت ہوئی۔ اس طرح اسنیچ کے 101 اور کلین اینڈ جرک کے 126 کلوگرام ملا کر انہوں نے مجموعی طور پر 227 کلوگرام وزن اٹھایا اور سلور کا میڈل  اپنے نام کر لیا۔ اس مقابلے میں کینیڈا کی شارلٹ سیمونیو نے شاندار کھیل پیش کرتے ہوئے نیا گیمز ریکارڈ قائم کیا اور طلائی تمغہ جیت لیا۔ سیمونیو نے اسنیچ میں 108 کلوگرام اور کلین اینڈ جرک میں 127 کلوگرام وزن اٹھایا، جس کے ساتھ ان کا مجموعی اسکور 235 کلوگرام رہا۔ اس غیر معمولی کارکردگی نے انہیں سونے کا تمغہ دلایا۔

یہ بھی پڑھیں: دہلی-این سی آر میں تیز آندھی کی پیش گوئی،ملک کے 16ریاستوں میں شدید طوفان اور موسلادھار بارش کا الرٹ

دوسری جانب آسٹریلیا کی فیبی ہیمین نے مجموعی طور پر 218 کلوگرام وزن اٹھا کر کانسی کا تمغہ حاصل کیا۔ انہوں نے اسنیچ میں 97 کلوگرام اور کلین اینڈ جرک میں 121 کلوگرام وزن اٹھایا۔ہرجندر کور کی اس کامیابی سے دولتِ مشترکہ کھیل 2026 میں بھارتی دستے کی تمغوں کی تعداد میں مزید اضافہ ہوا ہے۔ ان کی شاندار کارکردگی کو کھیلوں کے ماہرین اور شائقین کی جانب سے خوب سراہا جا رہا ہے۔ یہ کامیابی نہ صرف ان کے ذاتی کیریئر کی بہترین کارکردگی ہے بلکہ بھارتی ویٹ لفٹنگ کے لیے بھی ایک اہم سنگِ میل سمجھی جا رہی ہے۔

بھارت ایکسپریس اردو