Harbhajan Singh Meets Amit Shah: مرکزی وزیر داخلہ امت شاہ سے ہربھجن سنگھ کی ملاقات، پنجاب سے متعلق اہم امور پر تبادلۂ خیال

نئی دہلی،بھارتی کرکٹ ٹیم کے سابق آف اسپنر اور راجیہ سبھا رکن ہربھجن سنگھ نے ہفتہ کے روز مرکزی وزیر داخلہ امت شاہ سے ملاقات کی۔ ہربھجن سنگھ نے اس ملاقات کی اطلاع سوشل میڈیا کے ذریعے دی۔

پنجاب کے مسائل پر تفصیلی گفتگو

ہربھجن سنگھ نے اپنے ایکس اکاؤنٹ پر امت شاہ کے ساتھ ملاقات کی تصویر شیئر کرتے ہوئے لکھا کہ انہوں نے نئی دہلی میں مرکزی وزیر داخلہ سے ملاقات کی۔ اس دوران پنجاب سے متعلق اہم مسائل، ریاست کی ترقی، عوامی فلاح و بہبود اور قانون و انتظام کی صورتحال کو مزید مضبوط بنانے کے موضوعات پر تفصیلی تبادلۂ خیال کیا گیا۔ انہوں نے بتایا کہ انہوں نے پنجاب کے مفادات کے تحفظ اور ریاست کی ترقی کو مزید آگے بڑھانے کے لیے مرکزی حکومت سے تعاون کی درخواست بھی کی۔

بی جے پی کے بڑے لیڈر سے پہلی ملاقات

عام آدمی پارٹی (آپ) چھوڑنے کے بعد بھارتیہ جنتا پارٹی (بی جے پی) کے کسی بڑے لیڈڑ کے ساتھ ہربھجن سنگھ کی یہ پہلی اہم ملاقات مانی جا رہی ہے۔ بھارتی کرکٹ کے نمایاں چہروں میں شمار ہونے والے ہربھجن سنگھ نے 2007 کے ٹی20 ورلڈ کپ اور 2011 کے ایک روزہ ورلڈ کپ میں اپنی شاندار گیندبازی کے ذریعے بھارتی ٹیم کو چیمپئن بنانے میں اہم کردار ادا کیا تھا۔ اس کے بعد وہ 2022 میں عام آدمی پارٹی کے امیدوار کے طور پر پنجاب سے راجیہ سبھا کے لیے منتخب ہوئے تھے۔

عآپ سے علیحدگی اور بی جے پی میں شمولیت

سال 2026 میں اختلافات کے باعث راگھو چڈھا کی قیادت میں عام آدمی پارٹی کے سات راجیہ سبھا اراکین نے پارٹی چھوڑنے اور بی جے پی میں شامل ہونے کا اعلان کیا تھا۔ ان سات اراکین میں ہربھجن سنگھ بھی شامل تھے۔ بی جے پی میں شمولیت کے بعد ہربھجن سنگھ کو عام آدمی پارٹی کے کارکنوں کی شدید مخالفت کا سامنا کرنا پڑ رہا ہے۔ جالندھر میں واقع ان کی رہائش گاہ کے باہر کارکنوں نے احتجاجی مظاہرے کیے اور ان کے خلاف نعرے بازی بھی کی۔ سوشل میڈیا پر بھی انہیں سخت تنقید کا سامنا ہے، جبکہ بعض عآپ کارکنان ان سے راجیہ سبھا کی رکنیت سے استعفیٰ دینے کا مطالبہ کر رہے ہیں۔

سرکاری سکیورٹی واپس، مرکز نے فراہم کی سرکاری

پنجاب میں بھگونت مان کی قیادت والی عام آدمی پارٹی حکومت نے ہربھجن سنگھ کے بی جے پی میں شامل ہونے کے فوراً بعد ریاستی حکومت کی جانب سے فراہم کردہ سکیورٹی واپس لے لی تھی۔ اس کے بعد مرکزی حکومت نے انہیں سکیورٹی فراہم کی۔

بھارت ایکسپریس۔