Major boost for IAF: بھارت کی دفاعی طاقت میں اضافہ: 120 تیجس فائٹر جیٹ کا دیا آرڈر،ہرسال ملیں گے 30 لڑاکا طیارے

بھارت نے ہندوستان ایئروناٹکس لمیٹڈ (ایچ اے ایل) کے ساتھ تقریباً 120 تیجس ایم کے 2 لڑاکا طیاروں کی ایک بڑی ڈیل طے کی ہے، جو بھارتی فضائیہ کی طاقت کو مزید بڑھائے گی۔ ایچ اے ایل نے واضح کیا کہ وہ ہر سال 30 لڑاکا طیارے فضائیہ کے حوالے کرے گا، جس سے پرانے مگ-29، میراج-2000، اور جیگوار طیاروں کی جگہ بروقت پُر کی جا سکے گی۔ اندازوں کے مطابق بھارتی فضائیہ کا حتمی آرڈر 200 سے زائد طیاروں تک جا سکتا ہے۔ یہ اقدام بھارت کی فوجی جدیدیت اور دفاعی شعبے میں خود انحصاری کی طرف ایک بڑی کامیابی ہے۔

بھارتی فضائیہ آنے والے برسوں میں اپنے تقریباً 230 پرانے لڑاکا طیاروں کو ریٹائر کرے گی، جن میں روس کا مگ-29، فرانس کا میراج-2000، اور اینگلو-فرانسیسی جیگوار شامل ہیں۔ ان کی جگہ پُر کرنے کے لیے تیجس ایم کے 2 کو شامل کیا جائے گا، جو 4.5ویں نسل کا درمیانے وزن کا کثیر المقاصد لڑاکا طیارہ ہے۔ یہ تیجس ایم کے 1 اے سے زیادہ طاقتور ہے، جس میں جنرل الیکٹرک ایف 414 انجن اور دیسی ساختہ عتماد ای ای ایس اے ریڈار نصب کیا جائے گا۔ یہ جدید ہتھیاروں، بشمول بھارت کی لمبی رینج کی استرا میزائل، کو استعمال کرنے کی صلاحیت رکھتا ہے۔ یہ طیارہ موجودہ اور پانچویں نسل کے ای ایم سی اے طیاروں کے درمیان تکنیکی خلا کو پُر کرے گا۔

ڈیفنس کی رپورٹ کے مطابق، ایچ اے ایل نے تیجس ایم کے 1 اے کے لیے تین اسمبلی لائنیں تیار کی ہیں، جو 2028 تک سالانہ 30 طیارے تیار کریں گی۔ تیجس ایم کے 2 کے لیے ابتدائی پیداوار 24 طیارے فی سال ہوگی، جو 2036 تک 120 طیاروں کی فراہمی یقینی بنائے گی۔ اگر آرڈر 200 سے تجاوز کرتا ہے، تو ایچ اے ایل سالانہ 30 طیاروں تک پیداوار بڑھائے گا۔ تیجس ایم کے 2 کے ایف 414 انجن بھارت میں لائیسنس کے تحت بنائے جائیں گے۔ ایچ اے ایل اور امریکی کمپنی جنرل الیکٹرک کے درمیان ہونے والا تاریخی معاہدہ خود انحصار بھارت مہم کی کامیابی ہے۔ تیجس ایم کے 2 کا ترقیاتی کام تیزی سے جاری ہے۔ اس لڑاکا طیارے کی پہلی پرواز 2027 میں متوقع ہے، اور سیریل پروڈکشن 2031 سے شروع ہوگا۔ یہ منصوبہ بھارتی فضائیہ کی جنگی صلاحیت اور مستقبل کی ضروریات کو پورا کرنے میں اہم کردار ادا کرے گا۔