PM Modi during Pariksha pe Charcha: ’پریکشا پہ چرچا‘ کے دوران وزیراعظم مودی کا اظہار خیال، کہا-’’میری شخصیت سازی میں اساتذہ کا بہت بڑا کردار رہا‘‘

نئی دہلی: وزیراعظم نریندر مودی نے کہا ہے کہ ان کی ابتدائی زندگی میں اساتذہ کا گہرا اثر رہا ہے اور طلبہ کی شخصیت سازی میں اساتذہ اور والدین کا کردار بنیادی حیثیت رکھتا ہے۔ وہ پیر کے روز ’پریکشا پہ چرچا‘ کے نویں ایڈیشن کی دوسری قسط کے دوران طلبہ سے خطاب کر رہے تھے۔ وزیراعظم مودی نے کہا: ’’میری زندگی کے ابتدائی برسوں میں میرے اساتذہ کا مجھ پر بہت گہرا اثر رہا۔ وہ ہمیں لائبریری جانے اور اگلے دن موضوع پر بحث کرنے کے لیے کہتے تھے۔ جسمانی فٹنس میں میری دلچسپی بھی میرے اساتذہ ہی کی وجہ سے ہے۔ اگر آپ کسی بھی عظیم شخصیت سے پوچھیں گے تو وہ یہی کہیں گے کہ ان کی ماں اور اساتذہ نے ان کی زندگی کو سنوارا۔‘‘ انہوں نے زور دیتے ہوئے کہا کہ بچوں کو کامیابی کی راہ پر گامزن کرنے میں اساتذہ اور والدین دونوں کا رہنما کردار ہوتا ہے۔

’پریکشا پہ چرچا‘ صرف امتحانی تیاری تک محدود نہیں

وزیراعظم نے کہا کہ ’پریکشا پہ چرچا‘ محض بورڈ امتحانات کی تیاری تک محدود نہیں بلکہ یہ طلبہ کو اپنی سوچ، جذبات، دباؤ اور زندگی کے مختلف پہلوؤں پر کھل کر بات کرنے کا موقع فراہم کرتا ہے۔ انہوں نے کہا: ’’جب میں آپ کے سوالات سنتا ہوں تو وہ میرے دل کو چھو جاتے ہیں۔ مجھے محسوس ہوتا ہے کہ ہمارے نوجوانوں کے ذہن میں زندگی کے کئی پہلوؤں سے جڑے خیالات مسلسل گردش کر رہے ہوتے ہیں۔ امتحان کی تیاری، امتحان کے دوران آنے والے خیالات، ذہنی دباؤ اور لوگوں کی توقعات — یہ سب اس گفتگو کا حصہ بنتے ہیں۔ ’پریکشا پہ چرچا‘ کا مقصد ہی یہی ہے کہ طلبہ ان باتوں کو کھل کر بیان کریں۔‘‘

امتحانی دباؤ سے نمٹنے کے عملی مشورے

وزیراعظم مودی نے طلبہ کو امتحانی دباؤ کم کرنے کے لیے باقاعدہ لکھنے کی مشق اور مناسب نیند لینے کا مشورہ دیا۔ انہوں نے کہا:  ’’امتحانات میں سب سے اہم چیز سوال حل کرنے کی عادت ڈالنا ہے، یعنی لکھنے کی مشق۔ زیادہ تر لوگ صرف پڑھتے ہیں، لیکن اگر آپ باقاعدگی سے لکھنے کی مشق کریں تو مجھے پورا یقین ہے کہ آپ کو کسی قسم کا دباؤ محسوس نہیں ہوگا۔‘‘ انہوں نے نیند کی اہمیت پر زور دیتے ہوئے کہا: ’’آج کل لوگ نیند پر توجہ نہیں دیتے، جبکہ اچھی نیند لینے سے ذہن تازہ، مثبت اور پُرسکون رہتا ہے۔‘‘ وزیراعظم نے خود احتسابی اور عزم کو ترقی کی کنجی قرار دیتے ہوئے کہا کہ زندگی میں آگے بڑھنے کے لیے خود سے مسلسل مقابلہ کرنا چاہیے۔ انہوں نے کہا: ’’اگر انسان زندگی میں مطمئن ہو جائے تو ترقی رک جاتی ہے۔ ذہن میں ہمیشہ مضبوط عزم ہونا چاہیے۔ ہمیں خود سے پوچھنا چاہیے کہ میری زندگی میں یہ تبدیلی کیوں آئی؟ یہ کمی کیوں رہی؟ اس کی وجہ کیا تھی؟‘‘

’پریکشا پہ چرچا 2026‘: ملک گیر سطح پر توسیع

2026 کا ایڈیشن ’پریکشا پہ چرچا‘ کو واقعی ایک آل انڈیا پروگرام بناتا ہے۔ پہلی بار یہ پروگرام ملک کے مختلف خطوں میں منعقد کیا جا رہا ہے، جن میں کوئمبٹور (تمل ناڈو)، رائے پور (چھتیس گڑھ)، دیوموگرا (گجرات)، گوہاٹی (آسام) اور نئی دہلی شامل ہیں۔ خاص بات یہ رہی کہ آسام میں برہم پتر ندی پر کروز کے دوران خصوصی نشست منعقد کی گئی، جو علاقائی نمائندگی اور اختراعی رسائی کی علامت بنی۔

بھارت ایکسپریس اردو۔