Guillain-Barre syndrome Cases: مہاراشٹر میں گیلین بیری سنڈروم کے معاملوں میں اضافہ، ایک موت کی تصدیق، 55 مریضوں کی حالت تشویشناک، وینٹی لیٹر پر 21 مریض

ممبئی: مہاراشٹر کے محکمہ صحت نے جمعرات کے روز گیلین بیری سنڈروم (جی بی ایس) کے معاملات میں مزید اضافے کی جانکاری دی۔ محکمہ نے اس بیماری سے ایک اور موت ہونے کی بھی تصدیق کی ہے۔ ریاست میں اس بیماری سے اب تک کل چھ اموات ہو چکی ہیں۔ ان میں سے ایک موت کی تصدیق جی بی ایس سے ہوئی ہے، جب کہ پانچ اموات کو مشکوک قرار دیا جا رہا ہے۔

محکمہ صحت کی جانب سے شیئر کی گئی معلومات کے مطابق جمعرات کو جی بی ایس کے تین نئے مشتبہ کیس رپورٹ ہوئے۔ ریاست میں اب تک کل 173 مشتبہ مریضوں کا پتہ چلا ہے، جن میں سے 140 میں انفیکشن کی تصدیق ہوئی ہے۔

محکمہ صحت کی جانب سے جاری کردہ رپورٹ میں یہ بھی کہا گیا ہے کہ متاثرہ مریضوں میں سے 34 کا تعلق پونے میونسپل کارپوریشن کے علاقے سے، 87 کا تعلق نئے شامل کیے گئے گاؤں سے، 22 کا پمپری-چنچواڑ میونسپل کارپوریشن سے، 22 کا پونے دیہی علاقے سے اور آٹھ دیگر اضلاع سے ہیں۔ ان مریضوں میں سے 72 کو اسپتال سے ڈسچارج کر دیا گیا ہے جبکہ 55 مریضوں کی حالت تشویشناک ہے اور وہ آئی سی یو میں داخل ہیں۔ ساتھ ہی 21 مریضوں کو وینٹی لیٹر پر رکھا گیا ہے۔

قابل ذکر ہے کہ اس سے قبل 27 جنوری کو پونے میں جی بی ایس کے بڑھتے ہوئے معاملات کے پیش نظر مرکزی وزارت صحت اور خاندانی بہبود نے ریاست میں صحت عامہ کی مداخلت اور انتظام میں مدد کے لیے سات رکنی ٹیم کو تعینات کیا تھا۔ مرکز کی اعلیٰ سطحی ٹیم کثیر الضابطہ ماہرین پر مشتمل تھی۔ اس کا مقصد جی بی ایس کے مشتبہ اور تصدیق شدہ کیسوں میں اضافے کے کو دیکھتے ہوئے پبلک ہیلتھ انٹروینشن اور انتظام کے قیام میں ریاستی صحت کے اہلکاروں کی مدد کرنا ہے۔

ریاستی محکمہ صحت نے مشورہ دیا کہ عام احتیاطی تدابیر اختیار کر کے جی بی ایس کو کسی حد تک روکا جا سکتا ہے، جیسے کہ ابلا ہوا/بوتل بند پانی پینا، پھلوں اور سبزیوں کو کھانے سے پہلے اچھی طرح دھونا، چکن اور گوشت کو صحیح طریقے سے پکانا، کچے یا کم پکے ہوئے کھانے، خاص طور پر سلاد، انڈے، کباب یا سمندری غذا سے پرہیز کرنا۔

بھارت ایکسپریس۔