Greater Noida Farmers Protest: زمین ہماری، مگر حق کہاں؟ 6 فیصد پلاٹ ملا، 4 فیصد کا انتظار، گریٹر نوئیڈا کے کسان 26 برس سے کاٹ رہے ہیں چکر، 29 جون کو لکھنؤ کی جانب کریں گے مارچ

گریٹر نوئیڈا اتھارٹی سے متاثرہ کسانوں نے آج ایک مہاپنچایت کا انعقاد کیا، جس میں 4 فیصد آبادی پلاٹ سے محروم تقریباً 40 دیہاتوں کے کسانوں نے شرکت کی۔ پنچایت میں فیصلہ کیا گیا کہ کسان اپنی مطالبات کے حق میں 29 جون کو گریٹر نوئیڈا سے لکھنؤ تک پیدل مارچ کریں گے۔ لکھنؤ پہنچ کر وہ وزیر اعلیٰ یوگی آدتیہ ناتھ سے آبادی پلاٹ کے معاملے پر بات چیت کریں گے۔

کسانوں نے بتایا کہ دو دہائیاں قبل اتھارٹی نے ان کی زمینیں ایکوائر کی تھیں۔ اس وقت معاوضے کے ساتھ انہیں 6 فیصد آبادی پلاٹ دیے گئے تھے، یعنی جتنی زمین اتھارٹی نے حاصل کی، اس کا 6 فیصد حصہ کسانوں کو واپس دیا گیا۔ کسانوں کے مطابق اُس وقت انہیں 10 فیصد آبادی پلاٹ دینے کا وعدہ کیا گیا تھا، لیکن صرف 6 فیصد پلاٹ ہی دیے گئے۔ بعد ازاں کسان اس معاملے کو ہائی کورٹ لے گئے، جہاں تمام کسانوں کو 10 فیصد آبادی پلاٹ دیے جانے کی بات سامنے آئی۔

26 برس سے اتھارٹی کے چکر کاٹ رہے کسان

کسانوں کا کہنا ہے کہ 26 سال گزر جانے کے باوجود اتھارٹی نے باقی 4 فیصد پلاٹ انہیں نہیں دیے۔ وہ برسوں سے مسلسل اتھارٹی کے دفاتر اور افسران کے چکر لگا رہے ہیں، مگر مسئلہ حل نہیں ہوا۔احتجاجی کسانوں کے مطابق کئی بار بورڈ میٹنگوں میں تجاویز منظور ہونے کے باوجود انہیں پلاٹ الاٹ نہیں کیے جا رہے۔ اسی وجہ سے کسانوں نے مہاپنچایت بلا کر آئندہ کی حکمت عملی طے کی ہے۔

40 دیہاتوں کے کسانوں کی شرکت

کسان رہنماؤں کا کہنا ہے کہ مہاپنچایت میں 40 دیہاتوں کے کسانوں کے ساتھ خواتین کسانوں نے بھی شرکت کی۔ پنچایت میں متفقہ طور پر فیصلہ کیا گیا کہ 29 جون کو گریٹر نوئیڈا کے زیرو پوائنٹ سے لکھنؤ کے لیے پیدل مارچ شروع کیا جائے گا۔اب دیکھنا یہ ہوگا کہ 29 جون سے پہلے اتھارٹی کے افسران متاثرہ کسانوں سے ملاقات کرکے ان کے مسئلے کا کوئی حل نکالتے ہیں یا پھر کسان اپنے اعلان کے مطابق لکھنؤ کی جانب مارچ کریں گے۔

بھارت ایکسپریس اردو۔