Gold – Silver price: کرسمس پر چمکا سونا ، مگر چاندی نے مچا دی ’ہاہاکار‘؛ سرمایہ کاری کرنے والے ہو جائیں ہوشیار!

آج جب پورا ملک کرسمس کی خوشیوں میں ڈوبا ہوا ہے، اسی دوران بلین مارکیٹ (سرافہ بازار) سے آنے والی خبریں سرمایہ کاروں کی دھڑکنیں تیز کر رہی ہیں۔ اگر آپ آج سانتا کلاز سے تحفے میں سونا یا چاندی کی امید کر رہے تھے تو آپ کو اپنی جیب کچھ زیادہ ہی ڈھیلی کرنی پڑے گی۔ سال 2025 سرمایہ کاروں کے لیے کسی رولر کوسٹر رائیڈ سے کم ثابت نہیں ہوا، اور سال کے اختتام تک آتے آتے قیمتیں آسمان کو چھونے لگی ہیں۔ آج بازار کھلتے ہی سونے کی قیمتوں میں معمولی اضافہ درج کیا گیا۔ اگر دہلی کے سررافہ بازار کی بات کریں تو 24 کیریٹ سونا 1,39,090 روپے فی دس گرام تک پہنچ گیا ہے۔ وہیں زیورات میں عام طور پر استعمال ہونے والا 22 کیریٹ سونا 1,27,510 روپے کے سطح پر ٹریڈ کر رہا ہے۔ اگر آپ چھوٹی سرمایہ کاری کا ارادہ رکھتے ہیں تو آج 1 گرام 24 کیریٹ سونے کے لیے تقریباً 13,894 روپے ادا کرنے ہوں گے۔ ماہرین کا ماننا ہے کہ شادی بیاہ کا موسم اور عالمی بازار میں ڈالر کے اتار چڑھاؤ سونے کی قیمتوں کو نیچے آنے نہیں دے رہی ہے۔ بھارت میں سونے کو صرف زیور ہی نہیں بلکہ مشکل وقت کا سہارا بھی سمجھا جاتا ہے، اسی لیے مہنگے داموں کے باوجود اس کی مانگ میں کمی نظر نہیں آ رہی۔

چاندی نے توڑے تمام ریکارڈ

حیران کن خبریں چاندی کے محاذ سے سامنے آ رہی ہیں۔ اگر آپ کو لگتا تھا کہ سونا مہنگا ہو گیا ہے تو ذرا چاندی کے گراف پر نظر ڈال لیجیے۔ گزشتہ محض چار دنوں میں چاندی 20 ہزار روپے تک مہنگی ہو چکی ہے۔ دہلی میں ایک کلو چاندی کی قیمت 2,34,000 روپے تک پہنچ گئی ہے، جبکہ چنئی جیسے شہروں میں یہ خوفناک حد یعنی 2,45,000 روپے تک جا پہنچی ہے۔ سب سے دلچسپ بات یہ ہے کہ اس سال منافع کے معاملے میں چاندی نے سونے کو بہت پیچھے چھوڑ دیا ہے۔ جہاں سونے نے سال 2025 میں تقریباً 65 فیصد کا منافع دیا، وہیں چاندی نے 120 فیصد سے زائد کا زبردست ریٹرن دے کر سب کو حیران کر دیا ہے۔

بھارت ایکسپریس اردو۔