India’s Defense Equipment: ’’ہندوستان کے دفاعی سازوسامان اور ٹیکنالوجی پر بڑھ رہا ہے دنیا کا اعتماد‘‘ دفاعی پیداوار اور برآمدات میں ہندوستان کی پیش رفت پر وزیراعظم مودی کا اظہار خیال

نئی دہلی: وزیراعظم نریندر مودی نے اتوار کو ’من کی بات‘ پروگرام کی 136ویں قسط میں رواں ماہ کے اوائل میں اپنے انڈونیشیا دورے کو یاد کرتے ہوئے کہا کہ ہندوستان کے دفاعی سازوسامان اور ٹیکنالوجی پر دنیا کا اعتماد مسلسل بڑھ رہا ہے۔ ان کے دورۂ انڈونیشیا کے دوران دونوں ممالک کے درمیان براہموس اور استرا میزائلوں سے متعلق اہم معاہدے ہوئے تھے۔ اپنے ماہانہ ریڈیو پروگرام ’من کی بات‘ میں وزیراعظم مودی نے کہا، ’’چاہے دفاعی پیداوار ہو، برآمدات ہوں یا دوست ممالک کے ساتھ سیاسی تعاون، ہندوستان مسلسل نئی بلندیوں کو چھو رہا ہے۔‘‘  انہوں نے کہا، ’’اس ماہ کے اوائل میں میں انڈونیشیا میں تھا، جہاں براہموس اور استرا میزائلوں کے لیے ایک بڑا معاہدہ ہوا۔ ہندوستان کے دفاعی سازوسامان اور ٹیکنالوجی پر دنیا کا اعتماد بڑھ رہا ہے۔‘‘

برہموس اور استرا میزائل خریدے گا انڈونیشیا

گھریلو دفاعی صنعت کو بڑے پیمانے پر فروغ دیتے ہوئے ہندوستان اور انڈونیشیا نے اس ماہ کے اوائل میں انڈونیشیائی فوج کو برہموس میزائلوں کی فراہمی کے لیے ایک معاہدے پر دستخط کیے تھے۔ انڈونیشیا ہندوستان میں تیار کردہ استرا ایئر ٹو ایئر میزائل بھی خریدے گا۔ دفاعی تحقیق و ترقی کی تنظیم (ڈی آر ڈی او) کے تیار کردہ اس بائیونڈ وژول رینج (بی وی آر) میزائل میں انتہائی پھرتیلے دشمن جنگی طیاروں کا تعاقب کرکے انہیں نشانہ بنانے کی صلاحیت ہے۔ ہندوستان انڈونیشیا کو برہموس سپرسونک کروز میزائل کی اضافی بیٹریاں بھی فراہم کرے گا۔ دونوں ممالک نے بحری سلامتی اور تحفظ کے شعبے میں تعاون کے لیے ایک فریم ورک کو بھی حتمی شکل دی ہے۔

کارگل وجے دیوس پر شہیدوں کو خراج عقیدت

وزیراعظم مودی نے 1999 کی کارگل جنگ کے بہادر شہیدوں کو خراج عقیدت پیش کرتے ہوئے کہا کہ کارگل وجے دیوس ہر ہندوستانی کو فخر سے بھر دیتا ہے اور ہندوستانی مسلح افواج کی غیر معمولی بہادری کی یاد دلاتا ہے۔ انہوں نے کہا، ’’ہماری زندگی میں کچھ ایسی تاریخیں ہوتی ہیں جن کے لیے ہمیں کیلنڈر دیکھنے کی ضرورت نہیں پڑتی۔ 26 جولائی بھی ایسی ہی ایک تاریخ ہے۔ آج کارگل وجے دیوس ہے۔ یہ دن ہمیں فخر سے بھر دیتا ہے اور ہمارے بہادر فوجیوں کی غیر معمولی بہادری کی یاد دلاتا ہے۔‘‘ انہوں نے کہا کہ کارگل کی بلند چوٹیوں، خراب موسم اور دشمن کی دشواریوں کے باوجود ہندوستانی فوجیوں کا حوصلہ ہر چیلنج سے بلند رہا۔ انہوں نے مادر وطن کی حفاظت کے لیے سب کچھ قربان کردیا۔ وزیر اعظم نے کہا کہ آج کا ہندوستان نہ صرف اپنے بہادروں کو یاد کرتا ہے بلکہ یہ بھی یقینی بناتا ہے کہ ان کی کہانیاں نئی نسلوں تک پہنچیں۔ انہوں نے کہا کہ اسی جذبے کے ساتھ اس سال ’شوریہ وجے یاترا‘ کا انعقاد کیا گیا ہے۔ یہ موٹر سائیکل مہم 14 جولائی کو دہلی کے نیشنل وار میموریل سے شروع ہوئی اور دراس میں واقع کارگل وار میموریل تک جائے گی۔

’آتم نربھر بھارت‘ کی بڑھتی طاقت کی علامت آئی این ایس مہندرگری

پی ایم مودی نے کہا کہ ہندوستان اپنے فوجیوں کی بہادری کے ساتھ ساتھ اپنی تکنیکی صلاحیتوں کو بھی مسلسل مضبوط بنا رہا ہے۔ انہوں نے ہندوستانی بحریہ میں شامل کیے گئے آئی این ایس مہندرگری کا ذکر کرتے ہوئے کہا، ’’یہ جدید جنگی جہاز ہندوستان میں ڈیزائن کیا گیا اور ہندوستان میں ہی تیار کیا گیا ہے۔ اس میں 75 فیصد سے زیادہ دیسی ٹیکنالوجی کا استعمال کیا گیا ہے۔ یہ ’آتم نربھر بھارت‘ کی بڑھتی ہوئی طاقت کی علامت ہے۔‘‘ وزیر اعظم نے پنّاکا لانگ رینج گائیڈیڈ راکٹ (ایل آر جی آر-120) کا بھی ذکر کیا۔ یہ ایک جدید پریسیژن گائیڈیڈ آرٹلری راکٹ نظام ہے، جس کی زیادہ سے زیادہ اسٹرائیک رینج تقریباً 120 کلومیٹر اور تصدیق شدہ کم از کم رینج 60 کلومیٹر ہے۔ اسے ڈی آر ڈی او نے ہندوستان میں ہی تیار کیا ہے۔ انہوں نے کہا، ’’اس کامیابی کے پیچھے ہمارے سائنس دانوں اور انجینئروں کی مشترکہ محنت ہے۔‘‘ وزیر اعظم نے خوشا میزائل کے کامیاب فلائٹ ٹیسٹ کا بھی ذکر کیا اور کہا کہ کارگل وجے دیوس کے موقع پر ہمیں اپنے شہیدوں کو دل سے خراج عقیدت پیش کرتے ہوئے ایک محفوظ، مضبوط اور خود کفیل ہندوستان کی تعمیر کے عزم کو مزید مضبوط کرنا چاہیے۔

بھارت ایکسپریس اردو۔