Giriraj Singh Hindu Swabhiman Yatra: مسلم اکثریتی علاقے سے جان بوجھ کر ہندو سوابھیمان یاترا نکال رہے ہیں گری راج سنگھ،سیمانچل میں حالات خراب ہونے کا خدشہ

مرکزی وزیر گری راج سنگھ جمعہ کو بہار کے بھاگلپور سے اپنی ہندو سوابھیمان یاترا شروع کر رہے ہیں۔ یاترا کے پہلے مرحلے میں وہ مسلم اکثریتی علاقے سیمانچل کے کٹیہار، ارریہ، پورنیہ اور کشن گنج اضلاع کا دورہ کریں گے۔ وہ جمعرات کی شام ہی بھاگلپور پہنچ گئے۔ انہوں نے نہ صرف بی جے پی بلکہ جے ڈی یو، آر جے ڈی سمیت ہر پارٹی اور تنظیم سے وابستہ ہندوؤں سے بھی ان کی یاترا میں شامل ہونے کی اپیل کی۔ گری راج کے اس دورے نے سیمانچل میں سیاسی ماحول کو گرما دیا ہے۔ وزیر اعلیٰ نتیش کمار کی پارٹی جے ڈی یو نے اس دورے پر اعتراض کیا ہے۔ اس کے ساتھ ہی پورنیہ سے آزاد رکن پارلیمنٹ پپو یادو نے گری راج سنگھ کو خبردار کیا ہے۔ انہوں نے کہا کہ اگر کوسی اور سیمانچل کے امن اور ہم آہنگی کو بگاڑنے کی کوشش کی گئی تو گری راج کو ان کی لاش سے گزرنا پڑے گا۔

یہاں تک کہ ان کی پارٹی بی جے پی نے گری راج سنگھ کے اس دورے سے خود کو الگ کر لیا ہے۔ بی جے پی کے ریاستی صدر دلیپ جیسوال نے جمعرات کو واضح کیا کہ یہ ان کا ذاتی دورہ ہے۔ پارٹی کا اس سے کوئی تعلق نہیں۔ تاہم اگر کوئی پارٹی لیڈر یا کارکن یاترا میں شریک ہوتا ہے تو اس پر کوئی پابندی نہیں ہے۔ بی جے پی کی حلیف جے ڈی یو کے کئی رہنماؤں نے اس یاترا کی مخالفت کی اور سیمانچل میں فرقہ وارانہ ہم آہنگی کے بگڑنے کا خدشہ ظاہر کیا۔چونکہ یہ پورا علاقہ مسلم اکثریت والا ہے۔ اور جان بوجھ کر مسلم اکثریتی علاقے سے یاترا نکالنے کا منصوبہ بنانا کہیں نہ کہیں پرامن ماحول کیلئے خطرہ مانا جاسکتا ہے۔

جب تک جسم میں خون ہے، سفر جاری رہے گا: گری راج سنگھ

وہیں اس یاترا کے سلسلے میں  مرکزی وزیر گری راج نے کہا کہ یہ بی جے پی یا جے ڈی یو یا کسی پارٹی کی یاترا نہیں ہے۔ وہ ہندو بن کر جا ر ہے ہیں۔ اس کے ذریعے وہ ہندوؤں کو بیدار اور متحد کریں گے۔ بھاگلپور کے سرکٹ ہاؤس میں میڈیا سے بات کرتے ہوئے انہوں نے کہا کہ ہندوستان اور بالخصوص بہار میں ڈیموگرافی بدل رہی ہے۔ 1951 کے بعد کے حالات کے مطابق بھاگلپور، کٹیہار، پورنیہ جیسے اضلاع میں ہندوؤں کی آبادی کم ہو رہی ہے۔ انہوں نے دعویٰ کیا کہ ملک کے 400 اضلاع میں 1600 مقامات پر ایک مخصوص طبقے کی آبادی میں اضافہ ہوا ہے۔ گری راج نے کہا کہ جب تک ان کے جسم میں خون ہے یہ یاترا جاری رہے گی۔

بھارت ایکسپریس۔