From CM To PM-Narendra Modi And Vladimir Putin : وزیر اعلیٰ سے وزیراعظم تک: وزیراعظم مودی اور روس کے صدر پوتن کے درمیان 25 سال کا رشتہ

روس کے صدر ولادیمیر پوتن دوروزہ دورے پربھارت پہنچ گئے ہیں۔ دہلی کے پالم ہوائی اڈے پروزیراعظم نریندرمودی نے ان کا پرتپاک استقبال کیا۔ وزیر اعظم مودی نے ایکس پر پوسٹ کرتے ہوئے لکھا کہ ’مجھے اپنے دوست صدر پوتن کا دہلی میں استقبال کرتے ہوئے خوشی ہو رہی ہے۔ میں آج شام اور کل ہماری ملاقاتوں کا منتظر ہوں‘۔ اس درمیان سوشل میڈیا پر 2001 کی ایک پرانی تصویر وائرل ہو رہی ہے، جو دونوں لیڈروں کے تقریباً 25 سالہ تعلقات کو واضح طور پر اجاگر کرتی ہے۔

یہ تصویر اس وقت کی ہے جب نریندر مودی گجرات کے وزیراعلیٰ تھے اور ایک وفد کے رکن کے طور پر اُس وقت کے وزیراعظم اٹل بہاری واجپائی کے ساتھ ماسکو گئے تھے۔ تصویر میں آگے کی قطار میں وزیراعظم واجپائی اور صدر پوتن بیٹھے نظر آ رہے ہیں جبکہ پیچھے کھڑے مودی اور اُس وقت کے وزیر خارجہ جسونت سنگھ کو دیکھا جا سکتا ہے۔ یہ منظر بھارت-روس تعلقات کی مضبوط بنیاد اور مودی کی روس کے ساتھ دیرینہ وابستگی کو ظاہر کرتا ہے، جو ان کے وزیر اعلیٰ یا بعد میں وزیراعظم بننے سے بہت پہلے سے قائم ہے۔

مودی نے 4 ستمبر 2019 کو سوشل میڈیا پر کچھ پرانی تصاویر اور یادیں شیئر کرتے ہوئے لکھا تھا، “2001 اور 2019 کی یادیں! آج 20ویں بھارت-روس سربراہی اجلاس میں شریک ہوتے ہوئے میرا دل نومبر 2001 کے روس-بھارت سربراہی اجلاس کی یاد میں چلا گیا، جب اٹل جی وزیراعظم تھے۔ اس وقت مجھے گجرات کے وزیراعلیٰ کی حیثیت سے ان کے وفد کا حصہ بن کر فخر محسوس ہوا”۔ نریندر مودی کے وزیراعظم بننے کے بعد 2014 سے، انہوں نے اور پوتن نے دونوں ممالک کے تعلقات کو نئی بلندیوں تک پہنچایا ہے۔ آج، عالمی اور اسٹریٹجک مسائل پر مودی اور پوتن براہِ راست گفتگو کرتے ہیں، جس سے دو طرفہ تعلقات میں مزید گہرائی اور اعتماد پیدا ہوا ہے۔

جیسا کہ پوتن کے بھارت دورے کی خبر سامنے آئی، 2001 کی تصاویر دوبارہ شیئر کی جانے لگیں، جس پر صارفین لکھ رہے ہیں کہ بھارت اور روس کی شراکت داری صرف حکمتِ عملی پر مبنی نہیں بلکہ شخصی تعلقات کی مضبوط بنیاد پر بھی قائم ہے۔ یہی وجہ ہے کہ مودی اور پوتن کی دوستی ہمیشہ سے خبروں کی زینت بنی رہتی ہے۔ یہ پرانی تصویر اور موجودہ دورہ دونوں یہ ثابت کرتے ہیں کہ دونوں لیڈر نہ صرف اپنے عہدوں میں اہم کردار ادا کر رہے ہیں بلکہ ذاتی سطح پر بھی ایک دوسرے کے ساتھ گہرا اعتماد رکھتے ہیں۔ 25 سالہ تعلقات کی یہ کہانی بھارت-روس شراکت داری کی دیرپا بنیادوں، دوستانہ روابط اور باہمی احترام کی عکاس ہے، جس نے عالمی سیاست میں ایک مستحکم اور دیرپا شراکت کی مثال قائم کی ہے۔

بھارت ایکسپریس اردو