Ujjain Hotel Incident: مدھیہ پردیش کے اجین میں بڑا حادثہ، ہوٹل کے چیمبر میں دم گھٹنے سے 4 افراد کی موت

نئی دہلی : مدھیہ پردیش کے اجین میں دیواس روڈ پر واقع سری گنگا ہوٹل میں دیر رات ایک بڑا حادثہ پیش آیا، جہاں ہوٹل کے احاطے میں بنے فوڈ ویسٹ پلانٹ کے چیمبر میں اترنے کے دوران 4 افراد کی موت ہوگئی۔ ابتدائی معلومات کے مطابق، چیمبر میں صفائی یا کسی دوسرے کام کے لیے اترنے والا ایک شخص اندر پھنس گیا۔ اسے بچانے کے لیے تین دیگر افراد بھی چیمبر میں اتر گئے۔ خدشہ ظاہر کیا جا رہا ہے کہ چیمبر میں گیس کے اخراج کے باعث چاروں افراد بے ہوش ہوگئے اور ان کی جان چلی گئی۔ مرنے والوں کی شناخت وحید، منوج، کملیش اور نتن کے طور پر ہوئی ہے۔

ایک کو بچانے کے لیے تین افراد بھی چیمبر میں اترے

موصولہ اطلاعات کے مطابق، سری گنگا ہوٹل کے پچھلے حصے میں کھانے کے بچے ہوئے کچرے کو جمع کرنے اور اس کے تصفیے کے لیے ایک چیمبر بنایا گیا تھا۔ دیر رات ایک آؤٹ سورس ملازم اس چیمبر میں اترا، لیکن وہ باہر نہیں نکل سکا۔ اس کے بعد اسے بچانے کے لیے تین دیگر افراد بھی اندر چلے گئے۔ چیمبر میں گیس کا اخراج ہونے کے باعث تمام افراد بے ہوش ہوگئے۔ واقعے کی اطلاع ملتے ہی پولیس اور انتظامیہ کی ٹیم موقع پر پہنچ گئی۔ تمام افراد کو چیمبر سے باہر نکال کر اسپتال پہنچایا گیا، جہاں انہیں مردہ قرار دے دیا گیا۔

کلکٹر نے تحقیقات کے دیے احکامات

اجین کے ایس پی پردیپ شرما نے بتایا کہ ہوٹل کے ملازمین اور باہر سے کام کے لیے بلائے گئے کچھ افراد کھانے کے کچرے کے لیے بنائے گئے چیمبر میں اترے تھے۔ ابتدائی طور پر گیس کے اخراج کو حادثے کی وجہ مانا جا رہا ہے۔ بتایا گیا ہے کہ گیس کے باعث چیمبر کا فرش بھی پھسلن بھرا ہوگیا تھا، جس کی وجہ سے اندر موجود لوگ گر کر بے ہوش ہوگئے۔ انہیں بچانے کے لیے اندر اترنے والے دیگر افراد بھی بے ہوش ہوگئے۔وہیں ضلع کلکٹر روشن کمار سنگھ نے بتایا کہ ہوٹل کے احاطے میں بنے کھانے کے کچرے کے ٹینک میں پہلے دو افراد اترے تھے۔ اس کے بعد انہیں بچانے کے لیے دو دیگر افراد بھی اندر چلے گئے۔ حادثہ کن حالات میں پیش آیا، اس کی تفصیلی جانچ کی جا رہی ہے۔

10 سال سے چل رہا ہے ہوٹل

سری گنگا ہوٹل گزشتہ تقریباً 10 سال سے چل رہا ہے، جبکہ اس سے وابستہ فرم گزشتہ 50 سال سے اجین میں کاروبار کر رہی ہے۔ پولیس اور انتظامیہ کے افسران نے معاملے کی تحقیقات شروع کردی ہیں۔حکام کا کہنا ہے کہ اگر تحقیقات میں ہوٹل انتظامیہ کی لاپروائی سامنے آتی ہے تو متعلقہ افراد کے خلاف کارروائی کی جائے گی۔ فی الحال حادثے کی اصل وجہ جاننے کے لیے تحقیقات جاری ہیں۔

بھارت ایکسپریس اردو