Former President Dr APJ Abdul Kalam on his death anniversary: امت شاہ اور کئی مرکزی وزراء نے ’’میزائل مین‘‘ ڈاکٹر اے پی جے عبدالکلام کو ان کی برسی پر پیش کیا خراج عقیدت

نئی دہلی: بھارت کے سابق صدر، ممتاز سائنس داں اور ’’میزائل مین‘‘ کے نام سے معروف ڈاکٹر اے پی جے عبدالکلام کی برسی کے موقع پر مرکزی وزیر داخلہ امت شاہ، وزیر دفاع راج ناتھ سنگھ، لوک سبھا اسپیکر اوم برلا، مرکزی وزیر جے پی نڈا، نتن گڈکری، منوہر لال، شیوراج سنگھ چوہان سمیت کئی مرکزی وزراء نے انہیں خراجِ عقیدت پیش کرتے ہوئے ان کی خدمات کو یاد کیا۔مرکزی وزیر داخلہ امت شاہ نے سوشل میڈیا پلیٹ فارم ایکس پر اپنے پیغام میں کہا کہ ڈاکٹر اے پی جے عبدالکلام بھارت کے خلائی اور میزائل پروگرام کے معمار اور دوراندیش سائنس دان تھے۔ انہوں نے کہا کہ سائنس کے میدان میں ڈاکٹر کلام کی غیر معمولی کامیابیوں نے بھارت کو ایک مضبوط دفاعی طاقت بنانے میں اہم کردار ادا کیا، جبکہ ان کی دانشمندی اور رہنمائی نے لاکھوں افراد کو بڑے خواب دیکھنے اور انہیں حقیقت میں بدلنے کی ترغیب دی۔ امت شاہ نے کہا کہ “عوام کے صدر” ڈاکٹر عبدالکلام ہمیشہ محب وطن افراد کے لیے ایک مثالی شخصیت رہیں گے۔

لوک سبھا اسپیکر اوم برلا نے اپنے پیغام میں کہا کہ ڈاکٹر عبدالکلام ایک ترقی یافتہ، خود کفیل اور مضبوط بھارت کے خواب دیکھنے والے عظیم رہنما تھے۔ انہوں نے کہا کہ دیسی میزائل اور خلائی پروگرام کو نئی بلندیوں تک پہنچانے میں ان کی خدمات بھارتی سائنسی تاریخ میں سنہرے حروف سے لکھی جائیں گی۔ اوم برلا نے ڈاکٹر کلام کے مشہور قول، “خواب وہ نہیں جو نیند میں آئیں، خواب وہ ہیں جو آپ کو سونے نہ دیں” کا ذکر کرتے ہوئے کہا کہ یہ الفاظ آج بھی نوجوانوں کو اپنے مقاصد کے لیے مسلسل محنت کرنے کی ترغیب دیتے ہیں۔وزیر دفاع راج ناتھ سنگھ نے ڈاکٹر عبدالکلام کو “عوام کے صدر”، “بھارت کے میزائل مین” اور ایک غیر معمولی سائنس دان قرار دیتے ہوئے کہا کہ انہوں نے بھارت کی دفاعی اور اسٹریٹجک صلاحیتوں کو مضبوط بنانے میں کلیدی کردار ادا کیا۔ ان کے مطابق ڈاکٹر کلام کی سادگی، دیانت داری اور وطن سے بے لوث محبت آنے والی نسلوں کے لیے ہمیشہ مشعلِ راہ رہے گی۔

مرکزی وزیر صحت اور بی جے پی کے قومی صدر جے پی نڈا نے کہا کہ ڈاکٹر عبدالکلام نے بھارت کو دفاعی اور ایٹمی طاقت کے میدان میں نئی بلندیوں تک پہنچایا۔ انہوں نے اگنی اور پرتھوی میزائل پروگرام، ایس ایل وی-3 کی تیاری، روہنی سیٹلائٹ کے کامیاب لانچ اور پوکھرن-2 ایٹمی تجربات میں ڈاکٹر کلام کے کردار کو تاریخی قرار دیا۔مرکزی وزیر منوہر لال نے کہا کہ ڈاکٹر عبدالکلام کی پوری زندگی قوم کی خدمت کے لیے وقف رہی اور ان کا کردار ایک تعلیم یافتہ، مضبوط اور باوقار بھارت کی تعمیر کے لیے ہمیشہ تحریک دیتا رہے گا۔مرکزی وزیر نتن گڈکری نے سابق صدر اور “بھارت رتن” ڈاکٹر اے پی جے عبدالکلام کو ان کے یومِ وفات پر خراجِ عقیدت پیش کرتے ہوئے انہیں عظیم سائنس دان اور قوم کا فخر قرار دیا۔مرکزی وزیر زراعت شیوراج سنگھ چوہان نے کہا کہ ڈاکٹر عبدالکلام نے بھارت کو ایٹمی طاقت بنانے میں ناقابلِ فراموش کردار ادا کیا۔ انہوں نے کہا کہ ڈاکٹر کلام کے افکار، نظریات اور مثالی زندگی نوجوان نسل کو قوم کی تعمیر اور ترقی یافتہ بھارت کے عزم کے لیے ہمیشہ حوصلہ بخشتی رہے گی۔

بھارت ایکسپریس اردو