Jammu Kashmir Election: جموں و کشمیر میں ووٹنگ کا پہلا مرحلہ مکمل، کشتواڑ میں سب سے زیادہ 77 فیصد ووٹ ڈالے گئے

جموں و کشمیر میں اسمبلی انتخابات کے لیے ووٹنگ کا پہلا مرحلہ آج (بدھ) کو اختتام پذیر ہوا، جس میں ریاست کے شہریوں نے جوش و خروش سے حصہ لیا۔ پہلے مرحلے میں پلوامہ کی 4، شوپیاں کی 2، کولگام کی 3، اننت ناگ کی 7، رامبن کی 2، کشتواڑ کی 3 اور ڈوڈہ ضلع کی 3 نشستوں پر ووٹنگ کے بعد امیدواروں کی قسمت ای وی ایم میں قید ہوگئی۔ ووٹنگ کے لیے پولنگ مراکز پر صبح سے ہی لوگوں کی لمبی لمبی قطاریں دیکھی گئیں، شام کو ووٹنگ ختم ہونے تک 58.85 فیصد سے زائد شہری اپنا حق رائے دہی استعمال کر چکے تھے۔ وادی میں آخری بار اسمبلی انتخابات کے لیے ووٹنگ سال 2014 میں ہوئی تھی۔ آرٹیکل 370 ہٹائے جانے اور مرکز کے زیر انتظام علاقہ بننے کے بعد جموں و کشمیر میں آج پہلی بار ووٹنگ ہوئی۔

219 امیدواروں کی قسمت ای وی ایم میں قید

قابل ذکر ہے کہ الیکشن کمیشن آف انڈیا نے جموں و کشمیر کی 90 اسمبلی سیٹوں کے لیے تین مرحلوں میں ووٹنگ کرانے کا اعلان کیا تھا۔ آج پہلے مرحلے کی ووٹنگ مکمل ہونے کے بعد اب دوسرے مرحلے کے لیے ووٹنگ 25 ستمبر کو ہوگی اور آخری مرحلے کے لیے ووٹنگ یکم اکتوبر کو ہوگی۔ جموں کشمیر اور ہریانہ اسمبلی انتخابات کے نتائج کا اعلان 8 اکتوبر کو ایک ساتھ کیا جائے گا۔ پہلے مرحلے میں وادی کے عوام نے کل 24 نشستوں پر 219 امیدواروں کے لیے اپنا حق رائے دہی استعمال کیا۔ پہلے مرحلے میں جموں و کشمیر کی سابق وزیر اعلیٰ محبوبہ مفتی کی بیٹی التجا مفتی ان امیدواروں میں سے ایک تھیں، جن کی قسمت آج ای وی ایم میں سیل کر دی گئی۔

سب سے زیادہ اور سب سے کم ٹرن آؤٹ کہاں تھے؟

چیف الیکٹورل آفیسر پی کے پول نے کہا کہ جموں و کشمیر اسمبلی انتخابات کے پہلے مرحلے میں سب سے زیادہ ٹرن آؤٹ کشتواڑ میں 77 فیصد جبکہ پلوامہ میں سب سے کم 46 فیصد رہا۔ جموں و کشمیر میں پرامن ووٹنگ ہوئی،  انہوں نے بتایا کہ جموں و کشمیر میں اسمبلی انتخابات کے پہلے مرحلے میں تقریباً 59 فیصد ووٹنگ ہوئی۔ پہلگام میں 58.89 فیصد ووٹنگ ہوئی۔ ڈی ایچ پورہ میں 55.14 فیصد، کولگام میں 50.75 فیصد، دورو میں 50.50 فیصد اور کوکرناگ (محفوظ) میں 50 فیصد ووٹ ڈالے گئے۔ کمیشن کے عہدیدار نے بتایا کہ ترال میں سب سے کم ووٹنگ فیصد 32.87 فیصد ریکارڈ کی گئی۔