Delhi CM Rekha Gupta On MCD By-Election : ”بی جے پی کے لیے ان 12 سیٹوں پر جیتنا ضروری“، دہلی کی وزیر اعلیٰ ریکھا گپتا کا ایم سی ڈی ضمنی انتخابات پر بیان

نئی دہلی: دہلی کی وزیر اعلیٰ ریکھا گپتا نے پیر کو کہا کہ دہلی میونسپل کارپوریشن (ایم سی ڈی) کے آئندہ ضمنی انتخابات میں بھارتیہ جنتا پارٹی (بی جے پی) کے لیے تمام 12 سیٹوں پر کامیابی حاصل کرنا انتہائی اہم ہے۔ انہوں نے کہا کہ بی جے پی کا بنیادی ہدف دہلی کے دیرینہ شہری مسائل کو حل کر کے ایک “ترقی یافتہ، صاف اور سرسبز دہلی” تعمیر کرنا ہے۔ میڈیا سے گفتگو کرتے ہوئے ریکھا گپتا نے کہا، ’’ہم 12 سیٹوں پر پوری قوت سے میدان میں اتریں گے۔ دہلی نے برسوں سے جو مشکلات جھیلی ہیں، اب وقت آ گیا ہے کہ ان تمام مسائل کو حل کیا جائے۔ بی جے پی کے لیے ان 12 نشستوں پر جیتنا ضروری ہے کیونکہ ہم دہلی کو صاف، خوبصورت اور ترقی یافتہ بنانا چاہتے ہیں۔ پچھلی حکومتوں نے صرف سیاست کی، ہم کام کر کے دکھائیں گے‘‘۔

انہوں نے مزید کہا کہ ان کی حکومت کا مقصد دہلی کے ہر وارڈ کو ترقی کا نمونہ بنانا ہے۔ ’’ہم چاہتے ہیں کہ دہلی کا ہر وارڈ ایک ماڈل وارڈ ہو، صاف ستھرا، منظم اور سرسبز۔ یہ ہمارا وعدہ ہے اور اس سمت میں ہم مسلسل کام کر رہے ہیں‘‘۔ بہار انتخابات کے حوالے سے پوچھے گئے سوال پر وزیر اعلیٰ نے کہا، ’’دہلی ترقی کرے گی، بہار بھی ترقی کرے گا، کیونکہ دہلی اور بہار کا رشتہ دل اور روح جیسا ہے‘‘۔ بی جے پی، کانگریس اور عام آدمی پارٹی (اے اے پی) نے اتوار کو دہلی میونسپل کارپوریشن کے ضمنی انتخابات کے لیے اپنے امیدواروں کی فہرست جاری کر دی۔ یہ انتخابات 30 نومبر کو ہوں گے۔ کاغذاتِ نامزدگی جمع کرانے کی آخری تاریخ 10 نومبر مقرر کی گئی ہے، جبکہ جانچ 12 نومبر کو ہوگی۔ امیدوار اپنی نامزدگی 15 نومبر تک واپس لے سکیں گے۔

بی جے پی کی طرف سے اعلان کردہ 12 امیدواروں میں سے 8 خواتین ہیں۔ پارٹی کے بیان کے مطابق، جے پال سنگھ سرل منڈکا سے، انیتا جین شالیمار باغ بی سے، وینا اسیجا اشوک وہار سے، سمن کمار گپتا چاندنی چوک سے، سنیل شرما چاندنی محل سے، منیشا راجپال سہراؤت دوارکا بی سے اور ریکھا رانی ڈھیچاؤں کلاں سے میدان میں اتریں گی۔ دیگر امیدواروں میں چندرکانتا شیوانی (نرائنا)، روہنی راج (دکشن پوری)، شبھراجیت گوتَم (سنگم وہار اے)، انجوم منڈل (گریٹر کیلاش) اور سرلا چودھری (وِنوَد نگر) شامل ہیں۔

کانگریس کی جانب سے جاری فہرست میں بھی پانچ خواتین امیدوار شامل ہیں۔ کانگریس کے امیدواروں میں مُکیش (منڈکا)، سرتا کماری (شالیمار باغ بی)، وشاکھا رانی (اشوک وہار)، اجے کمار جین (چاندنی چوک)، کنور شہزاد احمد (چاندنی محل)، سُمیِتا ملک (دوارکا بی)، رشمی شرما (ڈھیچاؤں کلاں)، منوج تَنور (نرائنا)، سریش چودھری (سنگم وہار اے)، وکرم (دکشن پوری)، شِکھا کپور (گریٹر کیلاش)، اور وِنے شنکر دوبے (وِنوَد نگر) شامل ہیں۔

عام آدمی پارٹی (اے اے پی) نے بھی 12 امیدواروں کے ناموں کا اعلان کیا ہے۔ اے اے پی کے امیدواروں میں رام سوروپ کنوجیا (دکشن پوری)، انوج شرما (سنگم وہار اے)، ایشنا گپتا (گریٹر کیلاش)، گیتا راوت (ونود نگر)، ببیتا اہلاوت (شالیمار باغ بی)، سیما وکاس گویل (اشوک وہار)، ہرش شرما (چاندنی چوک)، مدثر عثمان قریشی (چاندنی محل)، راجبالا سہراؤت (دوارکا بی)، انل لکڑا (منڈکا)، راجن اروڑہ (نرائنا) اور کیشَو چوہان (ڈھیچاؤں کلاں) شامل ہیں۔

ایم سی ڈی کی یہ 12 سیٹیں دہلی کے مختلف علاقوں میں واقع ہیں اور سیاسی جماعتوں کے لیے خاص اہمیت رکھتی ہیں۔ سیاسی تجزیہ کاروں کا کہنا ہے کہ ان ضمنی انتخابات کے نتائج دہلی کی آئندہ سیاسی سمت کا تعین کر سکتے ہیں، خاص طور پر ایسے وقت میں جب بی جے پی اور عام آدمی پارٹی کے درمیان براہ راست مقابلہ متوقع ہے۔

بھارت ایکسپریس اردو