ECI is running on WhatsApp: ’الیکشن کمیشن واٹس ایپ پر چل رہا ہے‘‘ ممتا بنرجی نے بنگال میں ایس آئی آر مہم پر ای سی آئی کو بنایا نشانہ

مغربی بنگال کی وزیراعلیٰ ممتا بنرجی نے ریاست میں جاری اسپیشل انٹینسو ریویژن (SIR) مہم کو لے کر الیکشن کمیشن آف انڈیا (ECI) پر سخت تنقید کی ہے اور الزام لگایا ہے کہ الیکشن کمیشن ’’واٹس ایپ پر چل رہا ہے‘‘۔ یہ بیان انہوں نے پیر کے روز موری گنگا ندی پر تعمیر ہونے والے گنگا نگر سیٹو (پل) کے سنگِ بنیاد رکھنے کے بعد گنگا ساگر میں ایک عوامی اجتماع سے خطاب کے دوران دیا۔

’واٹس ایپ کمیشن‘ کا الزام

وزیراعلیٰ نے اپنے خطاب میں کہا: ’’الیکشن کمیشن واٹس ایپ پر چل رہا ہے۔ یہ کہتے ہوئے مجھے افسوس ہے، مگر ایک دن ایسا الیکشن کمیشن ختم ہو جائے گا۔‘‘ انہوں نے ترنمول کانگریس کے قومی جنرل سیکریٹری ابھیشیک بنرجی کے سابقہ بیانات کا حوالہ دیتے ہوئے الزام لگایا کہ ایس آئی آر مہم کو بنگال کو ہراساں کرنے کے لیے استعمال کیا جا رہا ہے۔

ایس آئی آر کے دوران ہلاکتوں اور دباؤ کے الزامات

ابھیشیک بنرجی نے اس سے قبل دعویٰ کیا تھا کہ ایس آئی آر مشق کے دوران 45 افراد کی موت ہوئی، 6 افراد اسپتال میں داخل ہوئے اور 29 بوتھ لیول افسران (BLOs) نے خودکشی کی کوشش کی۔ انہوں نے یہ بھی الزام لگایا کہ الیکشن کمیشن پارٹی کی جانب سے اٹھائے گئے بنیادی سوالات کا جواب دینے میں ناکام رہا ہے۔

ووٹر لسٹ سے نام حذف کرنے کا الزام

ممتا بنرجی نے الزام لگایا کہ ووٹر فہرستوں سے من مانی طریقے سے نام حذف کیے جا رہے ہیں اور کہا: ’’بنگال نے کبھی سر نہیں جھکایا اور نہ ہی آئندہ جھکائے گا۔‘‘  انہوں نے بزرگوں اور حاملہ خواتین کو طلب کیے جانے پر اعتراض جتایا۔ انہوں نے کہا کہ 85 سال سے زائد عمر کے افراد کو بھی طلب کیا جا رہا ہے، جن میں سے بعض آکسیجن کے سہارے پیش ہو رہے ہیں، جبکہ حاملہ خواتین کو بھی طلب کیا جا رہا ہے۔ انہوں نے سوال اٹھایا: ’’اتنے برس اس ملک میں رہنے کے بعد کیا انہیں اب بھی یہ ثابت کرنا ہوگا کہ وہ اس ملک کے شہری اور ووٹر ہیں؟‘‘

بنگال کی گنگا جمنی تہذیب پر زور

بنگال کی تکثیری شناخت پر زور دیتے ہوئے ممتا بنرجی نے کہا: ’’کوئی مندر میں عبادت کرتا ہے، کوئی مسجد میں، کوئی گردوارے میں یہی بنگال ہے۔‘‘ انہوں نے خبردار کیا کہ انتخابات کے قریب آتے ہی بدامنی پھیلانے اور جھوٹے سوالات کھڑے کرنے کی کوششیں کی جا رہی ہیں۔

بھارت ایکسپریس اردو۔