EC directs to register FIR: الیکشن کمیشن کا مغربی بنگال کے چیف الیکٹورل آفیسر کو 5 اہلکاروں کے خلاف ایف آئی آر درج کرنے کا حکم

نئی دہلی: الیکشن کمیشن آف انڈیا (ECI) نے مغربی بنگال کے چیف الیکٹورل آفیسر (CEO) کو ہدایت دی ہے کہ انتخابی فہرست میں سنگین کوتاہیوں اور ناموں کے غلط اندراج کے معاملے میں پانچ قصوروار اہلکاروں کے خلاف ایف آئی آر درج کی جائے۔ الیکشن کمیشن نے مغربی بنگال کے چیف الیکٹورل آفیسر کو ہدایت دی ہے کہ وہ متعلقہ ضلعی الیکٹورل آفیسرز (DEO) کو فوری طور پر ان اہلکاروں کے خلاف ایف آئی آر درج کرنے کی ہدایت جاری کریں۔

لاگ ان تفصیلات غیر مجاز افراد کو دینے کا الزام

واضح رہے کہ گزشتہ سال اگست میں الیکشن کمیشن نے سنگین لاپرواہی اور فرائض کی انجام دہی میں ناکامی پر دو الیکٹورل رجسٹریشن آفیسرز (ERO) اور دو اسسٹنٹ الیکٹورل رجسٹریشن آفیسرز (AERO) کو معطل کرنے کا حکم دیا تھا۔ ان پر الزام تھا کہ انہوں نے ای آر او ڈیٹا بیس کے لاگ اِن کی تفصیلات غیر مجاز افراد کے ساتھ شیئر کر کے ڈیٹا سیکیورٹی پالیسی کی خلاف ورزی کی۔

معطل کیے گئے اہلکار

معطل کیے گئے اہلکاروں میں جنوبی 24 پرگنہ کے ای آر او دیبوتّم دت چودھری، اسسٹنٹ ای آر او تتھگٹ منڈل اور ان کے ڈیٹا انٹری آپریٹر سروجیت ہلدر شامل ہیں۔ اس کے علاوہ پوربا میدنی پور کے ای آر او بپلب سرکار اور ای ای آر او سدپتا داس کو بھی معطل کیا گیا تھا۔ الیکشن کمیشن نے ان تمام اہلکاروں کے خلاف ایف آئی آر درج کرنے کی بھی ہدایت دی ہے۔

ایف آئی آر درج نہ ہونے پر کمیشن کی ناراضگی

الیکشن کمیشن کے خط میں کہا گیا ہے کہ اگرچہ ریاستی حکومت نے 20 اگست 2025 کو مذکورہ اہلکاروں کی معطلی پر عمل کر دیا تھا، تاہم ایف آئی آر درج کرنے کی ہدایت تاحال پوری نہیں کی گئی ہے۔

قانونی کارروائی کی ہدایت

الیکشن کمیشن نے چیف الیکٹورل آفیسر مغربی بنگال کو ہدایت دی ہے کہ وہ متعلقہ ضلعی الیکٹورل آفیسرز کو عوامی نمائندگی ایکٹ 1950 کی دفعہ 32، بھارتی نیائے سنہتا 2023 اور انفارمیشن ٹیکنالوجی ایکٹ 2000 کی متعلقہ دفعات کے تحت فوری ایف آئی آر درج کرانے کو یقینی بنائیں۔

سخت وارننگ

الیکشن کمیشن نے خبردار کیا ہے کہ ایف آئی آر کے اندراج میں ناکامی کو انتہائی سنجیدگی سے لیا جائے گا۔ ساتھ ہی ہدایت دی گئی ہے کہ جلد از جلد تعمیلی رپورٹ پیش کی جائے۔

بھارت ایکسپریس اردو۔