EasyMyTrip warns of national security risks: ایزمائی ٹرپ کا چینی ملکیت والے ٹریول ایپس سے قومی سلامتی کو لاحق خطرات پر انتباہ، چینی سرمایہ کاری والی ایپس ہندوستانی پاسپورٹ کا ڈیٹا حاصل کر سکتی ہیں

نئی دہلی— ایز مائی ٹرپ (EaseMyTrip) کے بانی اور چیئرمین نِشانت پِٹّی نے چینی ملکیت والے ٹریول پلیٹ فارمز سے قومی سلامتی کو لاحق ممکنہ خطرات پر شدید تشویش کا اظہار کیا ہے۔ انہوں نے سوشل میڈیا پلیٹ فارم “ایکس” پر اپنے پیغام میں دعویٰ کیا کہ بعض معروف ٹریول ایپس جن میں چینی سرمایہ کاری نمایاں ہے، بھارتی پاسپورٹ کا ڈیٹا حاصل کر سکتی ہیں۔

نِشانت پِٹّی نے اپنی پوسٹ میں سوال اٹھایا کہ ‘‘سفر بک کرنے سے پہلے یہ ضرور سوچیں کہ آیا یہ پلیٹ فارم واقعی بھارت دوست ہے یا ایسے غیر ملکی حکومتوں کے زیر اثر ہے جو بھارت کی مخالف ہیں؟’’ انہوں نے اس مسئلے کو محض کاروباری نہیں بلکہ قومی سلامتی کا معاملہ قرار دیا۔

انہوں نے رِکانت پِٹّی، ایز مائی ٹرپ کے سی ای او اور شریک بانی کی جانب سے دی گئی پوسٹ کی حمایت کی، جس میں چینی ملکیت والے ایپس کے ممکنہ ڈیٹا کے غلط استعمال پر تشویش کا اظہار کیا گیا تھا۔

رِکانت پِٹّی نے اپنی پوسٹ میں یہ بھی واضح کیا کہ ایز مائی ٹرپ واحد آن لائن ٹریول ایجنسی تھی جس نے مالدیپ سے کشیدہ تعلقات کے پیش نظر وہاں کی بکنگز ایک سال سے زائد عرصے تک بند رکھی۔ انہوں نے کہا کہ ’’یہ اقدام محض توجہ حاصل کرنے کے لیے نہیں، بلکہ ملک کے وقار کے لیے اٹھایا گیا تھا۔‘‘

انہوں نے مزید کہا کہ پاہلگام حملے کے بعد جب دیگر کمپنیاں خاموش رہیں، ایز مائی ٹرپ نے ترکی اور آذربائیجان کے خلاف سفری ایڈوائزری جاری کی کیونکہ ان ممالک نے پاکستان کی کھلی حمایت کی تھی۔ کمپنی نے بھارتی مسافروں سے ان ممالک کا غیر ضروری سفر نہ کرنے کی اپیل کی۔

ایز مائی ٹرپ نے اس موقع پر اس بات پر زور دیا کہ ان کی پالیسی ہمیشہ ’’پہلے ملک، بعد میں کاروبار‘‘ پر مبنی رہی ہے۔ رِکانت پِٹّی نے کہا کہ انہیں خوشی ہے کہ اب دیگر کمپنیاں بھی ایسے ہی قومی مفاد پر مبنی اقدامات کر رہی ہیں۔

سوشل میڈیا پر بھی صارفین کی جانب سے ترکی اور آذربائیجان کے خلاف شدید ردعمل دیکھنے میں آیا، جنہوں نے ان ممالک میں سیاحت نہ کرنے کو حب الوطنی کا مظہر قرار دیا۔

بھارت ایکسپریس اردو۔