Earthquake in Jammu and Kashmir: جموں و کشمیر میں پیر کی صبح زلزلے کے تیز جھٹکے، لوگ خوفزدہ ہو کر گھروں سے باہر نکل آئے

نئی دہلی :جموں و کشمیر میں پیر کی صبح شدید سردی کے دوران زلزلے کے تیز جھٹکے محسوس کیے گئے، جس سے لوگوں میں خوف و ہراس پھیل گیا۔ حکام کے مطابق زلزلہ صبح تقریباً پانچ بج کر پینتیس منٹ پر آیا، جب زیادہ تر لوگ اپنے گھروں میں سو رہے تھے۔ اچانک زمین کے لرزنے سے کئی علاقوں میں لوگ گھبرا کر احتیاطاً گھروں سے باہر نکل آئے۔ حکام نے بتایا کہ زلزلے کا مرکز جموں و کشمیر کے ضلع بارہمولہ کے پٹن علاقے میں واقع تھا۔ ریکٹر اسکیل پر زلزلے کی شدت 4.6 ریکارڈ کی گئی ہے۔ ابتدائی اطلاعات کے مطابق اس زلزلے سے کسی جانی یا مالی نقصان کی خبر سامنے نہیں آئی ہے، تاہم انتظامیہ صورتحال پر نظر رکھے ہوئے ہے۔

جرمن ریسرچ سینٹر فار جیو سائنسز کے مطابق زلزلے کی گہرائی تقریباً دس کلو میٹر تھی، جسے کم گہرائی والا زلزلہ مانا جاتا ہے۔ ماہرین کے مطابق اس نوعیت کے زلزلے زمین کی سطح پر زیادہ شدت سے محسوس ہوتے ہیں۔ یہی وجہ ہے کہ بارہمولہ کے ساتھ ساتھ سری نگر، پلوامہ، شوپیاں اور چرارِ شریف سمیت آس پاس کے علاقوں میں بھی زلزلے کے جھٹکے واضح طور پر محسوس کیے گئے۔آزاد موسمی پورٹل کشمیر ویدر نے بھی اس زلزلے کی تصدیق کی ہے اور کہا ہے کہ وادی کشمیر زلزلہ خیز خطے میں واقع ہونے کی وجہ سے یہاں اس طرح کی سرگرمیاں وقتاً فوقتاً سامنے آتی رہتی ہیں۔ حکام نے عوام سے اپیل کی ہے کہ وہ افواہوں پر توجہ نہ دیں اور کسی بھی ہنگامی صورتحال میں انتظامیہ کی ہدایات پر عمل کریں۔

دریں اثنا، پیر کی ہی صبح تقریباً تین بج کر تیس منٹ پر انڈمان اور نکوبار جزائر میں بھی 4.6 شدت کا زلزلہ ریکارڈ کیا گیا۔ نیشنل سینٹر آف سیسمولوجی کے مطابق اس زلزلے کا مرکز بھی تقریباً دس کلو میٹر کی گہرائی میں تھا۔ واضح رہے کہ انڈمان و نکوبار جزائر کو زلزلہ خیز زون فائیو میں رکھا گیا ہے، جو دنیا کے سب سے زیادہ فعال زلزلہ متاثرہ علاقوں میں شمار ہوتا ہے۔ ماہرین کے مطابق اگرچہ دونوں مقامات پر آنے والے زلزلوں سے کسی بڑے نقصان کی اطلاع نہیں ملی، لیکن ایسے واقعات اس بات کی یاد دہانی ہیں کہ زلزلہ خیز علاقوں میں احتیاطی تدابیر اختیار کرنا بے حد ضروری ہے۔

بھارت ایکسپر یس اردو