Sunetra Pawar gets portfolios: مہاراشٹرکی نائب وزیراعلیٰ سنیترا پوار کو ملا قلمدان، ایکسائز ڈیوٹی، اقلیتی بہود اور کھیل کے محکمے کی ملی کمان

ممبئی: مہاراشٹر کی نئی نائب وزیراعلیٰ سنیترا پوار کو ریاستی ایکسائز ڈیوٹی، کھیل و امورِ نوجوانان اور اقلیتی ترقی و اوقاف کے محکمے الاٹ کیے گئے ہیں، جبکہ وزیراعلیٰ دیویندر فڑنویس نے منصوبہ بندی اور خزانہ کا قلمدان اپنے پاس رکھا ہے۔ قابل ذکر ہے کہ یہ دونوں محکمے اس سے قبل مہاراشٹر کے سابق نائب وزیراعلیٰ اجیت پوار کے پاس تھے، جن کا حال ہی میں ایک افسوسناک طیارہ حادثے میں انتقال ہو گیا تھا۔

پہلی خاتون نائب وزیراعلیٰ بننے کا اعزاز

سنیترا پوار نے ہفتہ کے روز ممبئی کے لوک بھون میں مہاراشٹر کی نائب وزیراعلیٰ کے طور پر حلف لیا۔ ریاست کے گورنر آچاریہ دیوورت نے وزیراعلیٰ دیویندر فڑنویس اور نائب وزیراعلیٰ ایکناتھ شندے کی موجودگی میں انہیں عہدے اور رازداری کا حلف دلایا۔ سنیترا پوار نے یہ عہدہ اپنے شوہر اور سابق نائب وزیراعلیٰ اجیت پوار کی ناگہانی موت کے بعد سنبھالا، جو 28 جنوری کو بارامتی میں پیش آنے والے طیارہ حادثے میں جاں بحق ہو گئے تھے۔ اس کے ساتھ ہی سنیترا پوار مہاراشٹر کی پہلی خاتون نائب وزیراعلیٰ بن گئیں۔

اجیت پوار کے مشن کو آگے بڑھانے کا عزم

حلف برداری کے بعد سنیترا پوار نے سوشل میڈیا پلیٹ فارم ایکس پر کہا: ’’محترم اجیت دادا نے کسانوں، مزدوروں، خواتین، نوجوانوں اور محروم طبقات کے لیے اپنی پوری زندگی وقف کرنے کا جو منتر دیا تھا، آج میں ’شیو–شاہو–پھولے–امبیڈکر‘ کے اصولوں کے ساتھ ان کے نظریات کی وراثت کو آگے بڑھانے کی ذمہ داری قبول کرتے ہوئے جذبات سے پُر ہوں۔‘‘ انہوں نے کہا کہ اجیت پوار کی اچانک موت نے غم کا پہاڑ توڑ دیا ہے، لیکن عوام کی محبت اور اعتماد ہی ان کی اصل طاقت ہے اور وہ انصاف، مساوات اور ترقی یافتہ مہاراشٹر کے خواب کو پورا کرنے کے لیے پوری دیانت داری سے کام کرتی رہیں گی۔

این سی پی رہنماؤں کی مبارکباد

این سی پی کے سینئر رہنما اور مہاراشٹر کے وزیر چھگن بھجبل نے امید ظاہر کی کہ مستقبل میں مہاراشٹر کو ایک خاتون وزیراعلیٰ بھی ملے گی۔ این سی پی کی رکن اسمبلی ثنا ملک نے اس تقرری کو ریاست کے لیے تاریخی لمحہ قرار دیتے ہوئے کہا کہ سنیترا پوار ہمیشہ سماجی بہبود اور خواتین کے فروغ کے لیے سرگرم رہی ہیں۔ واضح رہے کہ بدھ کے روز اجیت پوار اس وقت جاں بحق ہو گئے تھے جب انہیں لے جانے والا چارٹرڈ طیارہ بارامتی میں حادثے کا شکار ہو گیا تھا۔ اس حادثے میں ان کے ذاتی سکیورٹی افسر، ایک فلائٹ اٹینڈنٹ اور دو پائلٹس بھی ہلاک ہوئے تھے۔

بھارت ایکسپریس اردو۔